Fuakava Foʻoú

Haʻu, ʻo Muimui ʻIate Aú Ngaahi ʻEkitivitī maʻá e Fānau Īkí

Ki he 1 Kolinitō 8–13

Tuhu ki ha ngaahi kongokonga ʻe niʻihi ʻo e sinó pea fehuʻi ki hoʻo fānau īkí pe ko e hā ʻoku mahuʻinga ai ʻa e konga takitaha. Fakamatalaʻi ange ʻoku ngāue fakataha ʻa e ngaahi kongá kotoa ke tokoniʻi kitautolu ke tau fai ha ngaahi meʻa. ʻOku ʻofa ʻa e ʻOtuá ʻi Heʻene fānaú kotoa. ʻOkú Ne finangalo ke tau ngāue fakataha ke tokoniʻi mo tauhi e niʻihi kehé.

Ki he 1 Kolinitō 14–16

Tā ha fale ʻi ha kiʻi laʻipepa. Fehuʻi ki hoʻo fānau īkí pe ko e hā e ngaahi meʻa ʻi he falé. Tā fakatātaaʻi kinautolu. ʻOku ongoʻi kakato nai ʻa e ʻapí? ʻIkai! ʻOku fiemaʻu ha kakai ke nofo ʻi loto. Fakamatalaʻi ange ʻoku finangalo ʻa e ʻOtuá ke tau toe nofo mo Ia ʻi Hono ʻapi fakalangí.

Ki he 2 Kolinitō 1–7

Fāʻofua ki hoʻo fānau īkí takitaha. Tokoniʻi kinautolu ke nau kumi ha ngaahi foʻi lea ke fakahā atu ʻa e ongo ʻoku maʻu ʻi ha fāʻofua ʻofá. Akoʻi ange ʻoku ʻofa ʻa e ʻOtuá ʻiate kitautolu pea ʻokú Ne finangalo ke fakahaaʻi mai ʻa e lahi ʻo ʻEne tokangá.

Ki he 2 Kolinitō 8–13

Hivaʻi mo hoʻo fānau īkí ʻa e “Lotu ʻa ha Kiʻi Tamasiʻi” (Tohi Hiva ʻa e Fānaú, 6). Fakamatalaʻi ange ʻoku fanongo maʻu pē ʻa e Tamai Hēvaní ki heʻetau ngaahi lotú. Talanoa ange ha taimi naʻe tali ai ʻe he Tamai Hēvaní haʻo lotu.

Kia Kalētia

Tokoniʻi hoʻo fānau īkí ke nau lea, “ʻOku finangalo ʻa Sīsū ke u tokoni ki he niʻihi ʻoku faingataʻaʻiá.” Talaange kiate kinautolu ko e kakai faingataʻaʻiá ko kinautolu ia ʻoku puke, loto mamahi, pe tuenoá. Fakakaukau ki he meʻa te ke lava ʻo fai fakafāmili ke tokoniʻi e niʻihi kehé.