“Ko e Lēsoni ʻo e Peni Vahevahé,” Ko e Kaumeʻá, Sepitema 2023, 32.
Kaumeʻa ki he Kaumeʻa
Ko e Lēsoni ʻo e Peni Vahevahé
Mei ha ʻinitaviu mo Lori Fuller Sosa.
Naʻe tuʻo taha haʻaku ʻaʻahi ki ha fānau Palaimeli ʻi Samaika. Naʻá ku kole ange ke nau tā ha fakatātā ʻo ha meʻa te nau lava ʻo fai ʻi he uike ko iá ke fakahaaʻi ki he Tamai Hēvaní ʻoku nau ʻofa ʻiate Ia. Naʻe tangutu fakataha ha ongo tamaiki fefine.
Naʻe ngaue ʻaki ʻe he kiʻi taʻahine siʻisiʻi angé ha kiʻi peni vahevahe ka naʻe ʻikai ke ʻi ai hano meʻa tāmate. Naʻá ne faingataʻaʻia ke tā ʻene fakatātaá. Naʻe fakatokangaʻi ʻe he kiʻi taʻahine matuʻotuʻa angé ʻa e fiemaʻu tokoni ʻa e kiʻi taʻahine siʻisiʻi angé. Naʻá ne ʻoange ʻene peni vahevahé kiate ia. Naʻe malimali ʻa e kiʻi taʻahine siʻisiʻi angé, toʻo ʻa e peni vahevahé, pea kamata ke ne tā fakatātā.
Naʻá ku siofi ʻa e tatali ʻa e kiʻi taʻahine matuʻotuʻa angé ʻi he faʻa kātaki kae fakaʻosi ʻe he kiʻi taʻahine siʻisiʻi angé ʻene fakatātaá. Naʻe fakafoki leva ʻe he kiʻi taʻahine siʻisiʻi angé ʻa e peni vahevahé. Naʻá na taufetongi ʻi hono fakaʻaongaʻi ʻa e peni vahevahé ʻo ʻikai ha feleaʻaki. Naʻe loto fiemālie ʻa e kiʻi taʻahine matuʻotuʻa angé ke tokoni, pea naʻe houngaʻia moʻoni ʻa e kiʻi taʻahine siʻisiʻi angé mo ne tali ʻa e tokoni ko iá. Naʻá na ʻiloʻi te na lava ʻo fefalalaʻaki.
ʻI he ʻosi kotoa ʻenau ngaahi fakatātaá, ne u talaange ki he kiʻi taʻahine matuʻotuʻa angé naʻá ku sio ki heʻene vahevahe ʻene peni vahevahé. Naʻá ku fehuʻi ange, “Ko e hā naʻá ke fai ai iá?”
Naʻá ne pehē, “Naʻá ku sio pē ki heʻene fiemaʻu tokoní.”
Naʻá ku fehuʻi ange leva ki he kiʻi taʻahine siʻisiʻi angé, “Ko e hā ʻa e ongo naʻá ke maʻu ʻi he taimi naʻá ne tokoniʻi ai koé?”
Naʻá ne pehē, “Naʻá ku houngaʻia ʻaupito!” Naʻe makehe ʻaupito ia.
Mahalo te tau fifili ʻi he taimi ʻe niʻihi pe ʻe founga fēfē hono tauhi ʻetau ngaahi fuakavá. Mahalo te tau fakakaukau ko ha meʻa lahi mo faingataʻa ia. Ka ʻoku ʻikai! Naʻá ku mamata ki hano akoʻi au ʻe ha kiʻi taʻahine ʻi he founga hono tauhi ʻo e ngaahi fuakavá ʻaki ʻeku tokoniʻi ʻa e niʻihi ʻoku faingataʻaʻiá.
ʻOku ou fakamoʻoni ʻi hoʻo fai ʻa e fanga kiʻi meʻa faingofua ko iá ke tokoniʻi mo tauhi ki he niʻihi kehé, ʻokú ke tauhi ai hoʻo ngaahi fuakavá. Pea ʻi heʻetau tauhi ʻetau ngaahi fuakavá, ʻoku tau ongoʻi ai ʻa e mālohi ʻo e ʻOtuá ʻi heʻetau moʻuí.
Ngaahi tā fakatātā ʻa Marina Pessarrodona