“Ko e Fakaafe ki he Maʻu Meʻatokoni Efiafí,” Ko e Kaumeʻá Sepitema 2023, 12–13.
Ko e Fakaafe ki he Maʻu Meʻatokoni Efiafí
Naʻe fiefia ʻa Sione ke ʻilo ki ha ʻAposetolo ʻe taha.
Naʻe hoko ʻa e talanoa ko ʻení ʻi Kuamu.
Naʻe siofi ʻe Sione hono fokotuʻutuʻu ʻe heʻene faʻē ohí ʻa e tēpilé. Naʻá ne fakapipiki ha tā ʻo ʻEletā Tieta F. ʻUkitofa ki ha sea ʻe taha, fakataha mo ha tā fakatātā ʻo ha vakapuna.
“Taimi kai!” Ko e ui atu ia ʻa Mamí.
Naʻe puna hake ʻa e tuofefine ʻo Sioné ko Lītia mei he seá. “ʻOku ou fuʻu fiekaia ʻaupito!”
Naʻe pehē atu ʻa Sione, “Mo au pē.”
Naʻe teke ʻe Mami e saliote teketeke ʻa Sioné ki he tēpilé pea tangutu ʻi hono tafaʻakí. Naʻe tangutu hifo foki mo Teti pea mo Lītia ʻi he tēpilé. Naʻe saiʻia ʻa Sione ʻi heʻenau ʻi ʻapi kotoa ke maʻu ʻa e meʻatokoni efiafí.
Naʻe tāpuakiʻi ʻe Teti ʻa e meʻakaí, pea paasi takai ʻe Mami ʻa e moá mo e laisé. Naʻá ne pehē, “Te tau ako ki ha taha ʻo e Kau ʻAposetoló he pooni.” Naʻá ne tuhu ki he laʻitā ʻi he seá. “ʻOku ʻilo nai ia ʻa e tokotahá ni?”
Naʻe pehē ange ʻe Sione, “Ko ʻEletā ʻUkitofa ia.”
Naʻe kamokamo ʻa Teti. “Naʻá ku fili ia ke hoko ko e fakaafe ki he pōní.”
“ʻE lava ke u fili ʻapongipongi?” Ko e fehuʻi ange ia ʻa Lītiá.
Naʻe pehē ange ʻe Mami, “ʻIo.”
Naʻe fiefia ʻa Sione ke ako fekauʻaki mo ʻEletā ʻUkitofa. Naʻe fai ʻa e konifelenisi lahí ʻi ha uike ʻe ua, pea naʻe maʻu ʻe he fāmili ohi ʻo Sioné ha tukufakaholo lelei ke nau teuteu ki ai. Naʻa nau fili ha ʻAposetolo he pō kotoa pē ke ako ki ai. Naʻe fakapipiki ʻe Mami ha fakatātā ʻo e ʻAposetoló ki ha sea. Naʻá ne fakamatala leva ki he fāmilí ha ngaahi moʻoniʻi meʻa fekauʻaki mo ia pea mo ha ngaahi talanoa fekauʻaki mo ʻene kei siʻí.
“Ko e hā ʻokú ke ʻilo fekauʻaki mo ʻEletā ʻUkitofá?” Ko e fehuʻi ange ia ʻa Tetí.
“ʻIo, ʻoku ou ʻiloʻi!” Ko Lītia ange ia. “Naʻá ne puna vakapuna!” Naʻá ne tuhu ki he tā ʻo e vakapuna ʻi he seá.
Naʻe pehē ange ‘e Mami, “ʻOku tonu ia. Kimuʻa pea ui ia ko ha ʻAposetoló, naʻá ne hoko ko ha pailate vakapuna ʻi Siamane.”
Naʻe fakatātā ʻe Sione ʻa e puná ʻaki hono nimá mo lea hangē ha vakapuná. “Fwoosh!”
Naʻe pehē ʻe Teti, “Naʻe kau ʻa ʻEletā ʻUkitofa ki he Siasí ʻi heʻene kei siʻí. Hangē ko ia naʻá ke faí, Sione.”
Naʻe sio ʻa Sione ki he taá. Naʻe faingataʻa ke fakakaukau ki he kei tamasiʻi ʻa ʻEletā ʻUkitofa ʻo hangē pē ko iá!
Naʻe pehē ange ʻe Mami, “Pea naʻe ʻi ai haʻane ngāue makehe ʻi he lotú he Sāpaté. Naʻe fiemaʻu ke pamu ha ʻea ki he ʻōkaní kae lava ke ngāue. Lolotonga ʻa e hivá, naʻá ne tokoni ke pamu ʻa e ʻeá ke tā ʻi he ʻōkaní ʻa e ngaahi himí.”
Naʻe talaange ʻe Teti, “ʻOku ou tui ko ha ngāue faingataʻa ia. Ka naʻá ne saiʻia ʻaupito ʻi he hivá. Ko e foʻi hiva naʻá ne saiʻia taha aí ko e ʻFiemaʻu Au ʻe Sīsū Ke u Ulo Hangē ko ha Hueló.’”
Naʻe malimali ʻa Lītia. “Ko e foʻi hiva ia ʻoku ou saiʻia taha aí!”
Naʻe pehē ʻe Mami, “ʻOku tatau pē ʻa ʻEletā ʻUkitofa mo kitautolu. Pea ʻi ha ngaahi uike siʻi pē, te tau fanongo ki heʻene lea ki he Siasí kotoa. Te ne vahevahe ha pōpoaki ʻoku finangalo ʻa Sīsū Kalaisi ke tau fanongo kotoa ki ai!”
Hili e maʻu meʻatokoni efiafí, naʻe toʻo ʻe Mami ʻa e taá mei he seá. Naʻá ne fakapipiki ia ki he holisí ʻi he tafaʻaki ʻo e ʻū tā ʻo e kau ʻAposetolo kehé. Te nau tuku ʻa e ʻū taá kae ʻoua kuo aʻu ki he konifelenisi lahí ke tokoni ke nau ʻiloʻi ʻa e kau leá.
Naʻe tokoni ʻa Sione kia Teti ʻi he ʻū peletí. Naʻe fufulu ʻe Teti, pea holo mātuʻu ʻe Sione. ʻI heʻene ngāué, naʻá ne malimali ki he ʻū tā ʻi he holisí.
Naʻe manako ʻa Sione ke ako fekauʻaki mo e kau ʻAposetoló! Naʻe ʻikai ke ne faʻa tatali ke fanongo meiate kinautolu ʻi he konifelenisí.
Tā fakatātaaʻi ʻe Brooke Smart