“Ko e Ngāue Mālohi ke Tokoní,” Ko e Kaumeʻá, Sepitema 2023, 30–31.
Tohi ʻe Koe
Ko e Ngāue Mālohi ke Tokoní
Mālō e Lelei! Ko Kiniseli mo Seime kimaua. Naʻá ma fai ha ngāue tokoni ke tokoniʻi ha fāmili ʻi homau uōtí. Naʻá ma ohi hake ha lami mo ha puaka peá ma fakatau atu ia ʻi he fakaʻaliʻali homau vahefonuá.
Naʻe puke lahi ʻa e tangataʻeiki homa ngaahi kaungāmeʻá. Naʻe tuʻo lahi ʻene ʻalu ʻo sio ki he toketaá. Naʻe fuoloa ʻa e ʻikai lava honau fāmilí ʻo ʻalu ki he lotú. Naʻá ma ʻofa ki homa ngaahi kaungāmeʻa ʻi he Palaimelí. Naʻá ma fie tokoni!
Naʻá ma fakakaukau ke ʻoange ki he fāmilí ʻa e paʻanga naʻá ma maʻu ʻi he taimi naʻá ma fakatau atu ai ʻema fanga monumanú ʻi he fakaʻaliʻali ʻo e vahefonuá. ʻE lava ʻe he paʻangá ʻo tokoniʻi kinautolu ke totongi ʻa e ngaahi moʻua fakafaitoʻó.
Naʻá ma ngāue ʻi ha māhina ʻe hiva ʻi heʻema ngāué. Naʻá ma lotu mo ʻaukai ke ma filifili ha fanga monumanu lelei ke tauhi. ʻI heʻema ohi hake ʻema kiʻi lamí mo e puaká, ne ma fakaʻaongaʻi ha taimi lahi ki hono palani ʻo e fakaʻaliʻali ʻi he vahefonuá. Naʻá ma faʻu ha ngaahi sote, luelue ʻi he laká, kole ha ngaahi foaki, mo tokoni ki hono fokotuʻutuʻu ʻo e fakataú.
Naʻe moʻui lelei mo mālohi ʻema fanga monumanú ʻi he ʻaho ʻo e fakaʻaliʻalí. Naʻe lelei ʻema fakaʻaliʻali kinautolu ʻi he fakaʻaliʻali ʻa e fanga monumanú. Naʻá ma fiefia ʻi heʻemau lava ʻo foaki ʻa e paʻanga naʻá ma maʻú ki he fāmilí. Naʻá ma fakaʻosi ʻema ngāué ʻaki ha ʻaukai maʻanautolu.
Naʻe tokoni ʻema ngāue ko ʻení ke ma toe ofi ange ai ki he Tamai Hēvaní. Naʻá ma ako ke falala lahi ange kiate Ia. Naʻá ma fai homa lelei tahá pea tuku ke Ne tokoniʻi kimaua ʻi heʻema fakafanongo ki he Laumālie Māʻoniʻoní. Naʻá ma faingataʻaʻia ʻi he taimi naʻe ʻikai fai ai ʻe heʻema ongo monumanú ʻa e meʻa naʻá ma fiemaʻú. Ka naʻá ma manatuʻi ʻa e ʻuhinga naʻá ma ohi hake ai kinauá. Naʻá ma fai homa lelei tahá ke maʻu ha paʻanga ki he lahi taha te ma lavá. Naʻá ma fakafalala ki he ʻEikí mo ngāue mālohi.
ʻOkú ma ʻilo ʻoku tokanga mai ʻa e Tamai Hēvaní kiate kitautolu kotoa pea ʻokú Ne finangalo ke tokoniʻi kitautolu. ʻOkú ma fiefia ʻi heʻema lava ke tokoni foki ki he niʻihi kehé!
Ngaahi tā fakatātā ʻa Kiersten Eagan