Hiva ʻi he ʻAho Sāpaté

Fai ʻe Joel B. Randall

(Makatuʻunga ʻi ha talanoa moʻoni)

Naʻe ʻikai ko ha meʻa kovi ia kapau naʻe tuʻo taha pē ʻa e liʻaki lotu ʻa ʻAlehanitulaá, ko ia?

Naʻe hoko ʻa e talanoa ko ʻení ʻi Kuatemala.

Naʻe māpuhoi ʻa ʻAlehanitulā ʻi he fiemālié. Ko e toki ʻosi pē ia ʻene hivaʻi ʻene foʻi soló ʻi he loki hivá ki heʻene faiakó. Naʻe ʻaonga kotoa ʻa e ngaahi uike ʻo ʻene ako hivá! Naʻe ʻikai ke ne toe faingataʻaʻia ʻi he konga faingataʻá.

“He toki leʻo fakaʻofoʻofa moʻoni.” Naʻe tuʻu ʻa Ms. Pelesi, ko e faiako mūsika ʻa e akó, ʻo pasipasi. “Te ke lava ʻo hoko atu ki he feʻauhi talēniti hono hokó.”

Naʻe fiefia ʻa ʻAlehanitulā! ʻI he feʻauhi ko ʻení, ʻe hiva, tauʻolunga, pe tā ʻe he kau ako mei ha ngaahi ʻapiako kehekehe ha meʻalea ke feʻauhi mo maʻu ai ha ngaahi pale. Ko Ms. Pelesi ʻa e fakamaau naʻá ne fili pe ko hai ʻe kau ʻi he feʻauhí. Pea ko ʻeni kuo paasi ʻa ʻAlehanitulā ki he takai hono hokó!

Naʻe pehē ʻe Ms. Pelesi, “ʻOku fiemaʻu ke ke lavaʻi ha ongo feʻauhi lalahi ʻe ua. Kapau te ke lavaʻi, te ke lava ʻo kau ki he feʻauhi fakaʻosí. ʻOku fai ia ʻi ha ʻaho Sāpate ʻamui ange ʻi he māhiná ni.”

Naʻe mole vave ʻa e fiefia ʻa ʻAlehanitulaá. Naʻá ne ongoʻi hangē naʻe ʻi ai ha mafasia lahi ʻi hono keté.

Naʻá ne ʻiloʻi ko e ʻaho Sāpaté ko ha ʻaho ia ke ʻalu ai ki he lotú ʻo ako fekauʻaki mo Sīsū Kalaisi. Ko ha ʻaho ia ke maʻu ai e sākalamēnití. Ko ha ʻaho ia ke mālōlō ai pea nofo mo e fāmilí.

Naʻá ne fehuʻi ange, “ʻAho Sāpaté? ʻOku ʻikai ke u ʻilo pe te u lava.”

“Kapau he ʻikai te ke lava ʻo kau ʻi he ʻaho fakaʻosí, he ʻikai leva ke ke lava ʻo kau ʻi he feʻauhí. ʻOku ou ʻiloʻi te ke fakahoko ha fakaʻaliʻali lelei kapau te ke kau, ka ko e fili pē ia ʻaʻau. Fakakaukau ki ai ʻi he fakaʻosinga ʻo e uiké pea talamai ke u ʻilo ʻi he ʻaho Mōnité.”

ʻI he ʻaho hono hokó, naʻe kei fakakaukau pē ʻa ʻAlehanitulā ki he meʻa ke faí. Naʻá ne ʻalu maʻu pē ki he lotú mo hono fāmilí ʻi he ʻaho Sāpaté. Ka naʻe pau nai ke ne ʻi ai ʻi he uike kotoa pē? Naʻe ʻikai ko ha meʻa kovi ia kapau naʻe tuʻo taha pē ʻene liʻaki lotú, ko ia?

ʻI heʻene mohé naʻá ne talanoa kia Papa fekauʻaki mo e meʻa ʻoku totonu ke ne faí. Naʻá ne fehuʻi ange, “ʻOku totonu nai ke u hiva ʻi he feʻauhí pe ʻalu ki he lotú?

Ko e ʻaho Sāpaté ko ha ʻaho ia ʻoku tau foaki maʻá e ʻOtuá.” Naʻe fusi hake ʻe Papa hono kafú ki hono kumukumú peá ne tangutu ʻi hono tafaʻakí ʻi hono funga mohengá. “ʻOku ʻi ai ha ʻaho ʻe ono maʻatautolu. ʻOku kole ʻe he ʻOtuá ha ʻaho pē ʻe taha. Ka he ʻikai ke u lava ʻo fai ʻa e fili ko ʻení maʻau.”

Primary children singing at a sacrament meeting. A mix of boys and girls of different ages and ethnicities. An adult woman is playing the piano in the background.

ʻI he ʻaho hono hokó ʻi he lotú, naʻe pau ke hivaʻi ʻe ʻAlehanitulā mo hono ngaahi kaungāmeʻa Palaimelí kotoa ʻa e “Lotu ʻa ha Kiʻi Tamasiʻí” ʻi muʻa ʻi he uōtí kotoa. Naʻe fuoloa pē ʻenau ako ʻa e hiva ko ʻení!

Naʻe hiva ʻa ʻAlehanitulā ʻaki hono lotó kotoa. Naʻe hanga ʻe he hivá ʻo fakangaloʻi ʻa e fili faingataʻa naʻe pau ke ne fai ʻapongipongí. ʻI he ʻosi ʻenau hivá, naʻá ne lue fiefia mai ʻo tangutu mo hono fāmilí.

Naʻe fāʻofua ʻa Mama ki ai. “Naʻe fakaʻofoʻofa hoʻo hivá!”

Naʻe pehē ʻe Papa, “ʻOku mau laukau ʻaki koe. Naʻe fakahaaʻi ʻe hono vahevahe ho talēnití hoʻo fakamoʻoní mo e tui ki he ʻOtuá.”

Naʻe fiefia ʻa ʻAlehanitulā ke fakaʻaongaʻi hono ngaahi talēnití ke hivaʻi e ngaahi hiva Palaimelí. Naʻá ne ʻiloʻi naʻe fiefia foki ai mo Sīsū.

Naʻe fakakaukau leva ʻa ʻAlehanitulā ki ha meʻa. Kapau ko e ʻahó ni ʻa e feʻauhí, naʻe ʻikai ke ne mei maʻu ha faingamālie ke hiva fekauʻaki mo e Tamai Hēvaní. Ko e hā ha meʻa ʻe mole meiate ia kapau he ʻikai ke haʻu ki he lotú ʻi he ʻaho feʻauhí? He ʻikai ke ne lava ʻo hivaʻi ʻene fakamoʻoní ʻi he Palaimelí mo hono ngaahi kaungāmeʻá. Pea ʻe ʻikai ke ne maʻu ʻa e sākalamēnití.

ʻI he ʻaho Mōnité, naʻe ʻiloʻi ʻe ʻAlehanitulā ʻa e meʻa naʻe pau ke ne faí. Naʻá ne ʻalu ki he loki hivá ke talanoa mo ʻene faiakó.

Naʻá ne pehē ange, “Fakamālō atu ʻi he maʻu ʻa e faingamālié. Ka ʻoku ʻikai ke u fie kau au ʻi he feʻauhi talēnití kapau te u fai ia ʻi he ʻaho Sāpaté.”

Naʻe tuku hifo ʻe Ms. Pelesi ʻa e laʻi hiva naʻá ne sio ki aí mo fakafulofula. “ʻOkú ke fakapapauʻi ʻokú ke loto ke liʻaki ʻa e feʻauhí?”

“ʻIo, ʻoku ou fakapapauʻi.” Naʻe laukau ʻaki ʻe ʻAlehanitulā ʻa ʻene filí. Naʻe faingataʻa ke fai ia, ka naʻá ne ʻiloʻi ko e fili totonú ia. “Te u liʻaki ha meʻa ʻe toe mahuʻinga ange kapau te u ʻalu.”

Friend Magazine, 2023-09 September

Tā fakatātaaʻi ʻe Janelle Anderson