“Lahi ʻa e Ngaahi Founga ke Pehē ai ʻʻOku ou ʻOfa ʻIate Koe,’” Ko e Kaumeʻá, Sepitema 2023, 36–37.
Lahi ʻa e Ngaahi Founga ke Pehē ai “ʻOku ou ʻOfa ʻIate Koe”
ʻE tokoni fēfē ʻa Tulina ki hono tuongaʻané?
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe pehē ange ʻe he tamai ʻa Tuliná, “Tau kamataʻi ʻetau fakataha alēlea fakafāmilí ʻaki ha lotu.”
Naʻe tūʻulutui ʻa Tulina ʻi he tafaʻaki hono ngaahi tuongaʻané mo e tokouá kae fai ʻe hono tuongaʻane ko Teilá ʻa e lotú. Pea nau tangutu kotoa ki lalo.
Naʻe pehē ange ʻe Teti, “ʻOku ou fie talanoa mo Mami fekauʻaki mo ʻĀtama.” Naʻe hoko ʻa e tuongaʻane ʻo Tuliná ko ʻĀtama ko ha faifekau. Naʻá ne mavahe ʻi he māhina ʻe tolu kuo hilí, pea naʻe ʻofa lahi ʻa Tulina kiate ia.
Naʻe pehē ange ʻe Mami, “ʻOkú ne foki mai mei heʻene ngāue fakafaifekaú ʻi he uiké ni.”
Naʻe ʻohovale ʻa Tulina. ʻOkú ne sai pē? ko ʻene fakakaukaú ia.
“Ko e hā? Anga fēfē?” ko e fehuʻi ia ʻa Teilá.
Naʻe pehē ange ʻe Mami, “Kuó ne fefaʻuhi mo e loto-hohaʻá mo e loto-taʻotaʻomiá. ʻA ia ʻoku ʻuhinga ia ʻoku lahi ʻa e ongoʻi hohaʻa mo e loto-mamahi ʻoku fefaʻuhi mo iá. Te ne maʻu ha tokoni mei he kau toketā ʻi hení, ʻo hangē pē ko ha motu hono vaʻé pe puke.”
Naʻe ʻikai ʻilo ʻe Tulina pe ko e hā e meʻa te ne lea ʻakí. Naʻe ʻi ai hano ngaahi kaungāmeʻa naʻe foki vave mai honau ngaahi tokouá mo e tuongaʻané mei heʻenau ngāue fakafaifekaú ke maʻu ha tokoni mei ha toketā. ʻE sai pē nai ʻa ʻĀtama?
“ʻOku tau fie fai ʻa e meʻa kotoa te tau malavá ke tokoni kia ʻĀtama. Kātaki muʻa ʻo lotu ke ke ʻiloʻi ʻa e founga te ke lava ai ʻo tokoni ki homou tokouá/tuongaʻané?” ko e kole ange ia ʻa Tetí.
Naʻe kamokamo pē ʻa Tulina mo hono ngaahi tokouá mo e tuongaʻané.
Naʻe pehē ʻe mami, “Te mou lava ʻo ʻeke mai ha faʻahinga fehuʻi pē mo talamai homou ngaahi ongó ʻi ha faʻahinga taimi pē. ʻOkú ma ʻofa moʻoni ʻiate kimoutolu.” Naʻe lele ʻa Tulina ke fāʻofua kiate ia, pea kau atu mo e toenga ʻo e fāmilí he fāʻofuá.
ʻI he ngaahi ʻaho siʻi hono hokó, naʻe fakakaukau ʻa Tulina kia ʻĀtama. Naʻá ne lotua ʻa e meʻa te ne lava ʻo fai maʻaná. Naʻá ne fakakaukau ki ha ngaahi taimi naʻá ne ongoʻi hohaʻa pe mamahi ai pea mo e lahi hono tokoniʻi ia ʻe hono fāmilí. Ka naʻe hangē ʻa e loto-hohaʻá mo e loto-taʻotaʻomiá ha ngaahi meʻa lalahí.
Naʻe fehuʻi ange ʻe Tulina kia mami. “Ko e hā te u lava ʻo fai ke tokoni kia ʻĀtamá?”
Naʻe pehē ange ʻe Mami, “He ʻikai ke tau lava ʻo liliu e ongo ʻa ʻĀtamá. Ka te tau lava ʻo poupouʻi ia mo fakahaaʻi ʻoku tau tokanga kiate ia.”
Naʻe talaange ʻe Tulina, “Te tau lava ʻo ʻofa ʻiate ia!”
Naʻe malimali ʻa Mami mo fāʻofua kiate ia. “Ko e meʻa lelei taha ia te tau lava ʻo faí.”
Naʻe ʻiloʻi ʻe Tulina naʻe lahi ha ngaahi founga ke pehē ai “ʻOku ou ʻofa ʻiate koe,” naʻa mo e taimi ʻoku ʻikai lea ʻaki ai iá. ʻI he taimi naʻe fai ai ʻe hono fāmilí ha ngaahi meʻa lelei maʻana pe fāʻofua kiate iá, naʻá ne ʻiloʻi ʻoku nau ʻofa ʻiate ia. ʻE lava ʻe Tulina ʻo fai ia maʻa ʻĀtama!
Naʻe fakakaukau ʻa Tulina te ne lava ʻo kamata fakahaaʻi ʻene ʻofa kia ʻĀtamá ʻi he taimí ni. Naʻá ne fakaʻaongaʻi ʻa e sioká ke tohi ha pōpoaki maʻana ʻi he saitiuoká. Naʻá ne fūfuuʻi takai ʻi he falé ha fanga kiʻi tohi lelei. Naʻá ne tokoniʻi hono ngaahi tokouá mo e tuongaʻané ke faʻu ha lea talitali. Naʻe pehē ai, “ʻEletā Toasoni, ʻoku talitali lelei koe ki ʻapi! ʻOku mau ʻofa atu!”
ʻI he ʻaho hono hokó, naʻe ʻalu ʻa e fāmili ʻo Tuliná ki he malaʻe vakapuná. Naʻe tokoni ʻa Tulina ki hono ngaahi tokouá mo e tuongaʻané ke pukepuke ʻa e fakaʻilonga kuo nau ngaohí. ʻI he hū mai ʻa ʻĀtama ʻi he matapaá, naʻe lele ʻa Tulina mo hono fāmilí ke fāʻofua kiate ia.
“ʻOku ou ʻofa ʻia koe ʻĀtama!” Ko e lea ange ia ʻa Tuliná.
ʻI heʻenau aʻu ki ʻapí, naʻe puke ʻe Tulina ʻa e nima ʻo ʻĀtamá ʻo taki atu ia ki he saitiuoká ke sio ki he meʻa naʻá ne tohí.
Naʻe lau ʻe ʻĀtama ʻo pehē, “ʻʻOku mau laukau ʻaki koe, ʻEletā Toasoni.’” Naʻá ne sio hake ki heʻenau mātuʻá mo e ngaahi tokouá mo e tuofāfiné. “Fakamālō atu ki he taha kotoa.” Naʻá ne kuku e nima ʻo Tuliná.
Naʻe mavahe ʻa ʻĀtama ke tuku ʻene katoletá ʻi hono lokí. ʻI heʻene foki maí, naʻá ne malimali. “ʻOku ʻilo nai ʻe ha taha ko hai ʻokú ne fai ʻa e ngaahi meʻa lelei ʻi hotau falé? Naʻá ku toki maʻu ha kiʻi tohi fakapulipuli ʻi hoku piló.” Naʻá ne fakakuitaha kia Tulina.
Naʻe malimali ʻa Tulina. Naʻe ʻikai ke ne faʻa tatali ke fakakaukauʻi ha ngaahi founga lahi ange ke ne pehē ai “ʻOku ou ʻofa ʻiate koe”!
Ngaahi tā fakatātā ʻa Sammie Francis