“Ko ha Fakalelei Taʻeʻamanekina,” Ko e Kaumeʻá, Sepitema 2023, 40–41.
Ko ha Fakalelei Taʻeʻamanekina
ʻE ngāue moʻoni nai ʻa e fakakaukau ʻa Tetí?
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe tā ʻa e fafangú feʻunga mo hono tohi ʻe Misa Nīkola ʻa e ngāue fakaako mei ʻapi fakauiké ʻi he palakipoé. Naʻe lahi fau ʻa e ngaahi palopalema ke vetekí! He ʻikai toe ʻosi ʻeni ia.
Naʻe pehē ange ʻe Misa Nīkola, “Fakafoki mai hoʻo ngāue fakaako ke fai mei ʻapí ʻi he ʻaho Falaité. ʻOku ʻikai fiemaʻu ha kumi ʻuhinga.”
Naʻe ngulu ʻa e tokotaha kotoa pē. Naʻe faʻo leva ʻe Teleki ʻene pepa fiká ki heʻene kato kuo ʻosi fonú.
Naʻe kehe ʻaupito ʻa e ʻapiako foʻou ʻa Telekí mei hono ʻapiako motuʻá. ʻI heʻene hoko ko ʻeni ʻo kalasi onó, naʻá ne ʻalu ai ki ha ʻapiako naʻe lahi ange, fakataha mo ha fānau ako tokolahi ange. Naʻe faingataʻa ange ʻa e ngaahi kalasí, pea naʻe toe lahi ange foki mo ʻene ngāue fakaako mei ʻapí.
Ka ko e meʻa naʻe hohaʻa lahi taha ki ai ʻa Telekí ko e toenga ʻo e fānaú. Naʻe ngali taʻeʻofa ha niʻihi ʻo kinautolu! Naʻe ʻikai ke ne loto ke ʻita ange ha taha kiate ia.
Naʻe fafa ʻe Teleki ʻene kato āfeí ʻo lue atu ki he holó. Naʻe ʻi he feituʻu kotoa pē ʻa e fānaú. Naʻá ne sio ki lalo peá ne feinga ke fakaʻehiʻehi mei haʻane fepaki mo ha taha. Ko e taimi ʻe niʻihi naʻe hangē ia ha fakatupu ʻita ki ha tokotaha ʻaki e sio atu pē ki aí.
Naʻe fehuʻi ange ʻa Teti ʻi he pō ko iá. “Naʻe fēfē ʻa e akó ʻi he ʻahó ni? Toe lelei ange?”
Naʻe pehē ange ʻe Teleki, “ʻIkai.”
Naʻe tuku hifo ʻe Teti ʻene tohí ki lalo. “ʻOkú ke ʻilo hoʻo talamai hoʻo hohaʻa ʻi he taimi ʻe niʻihi naʻa ʻita atu ha taha ʻi he akó taʻe ha ʻuhingá?”
Naʻe kamokamo pē ʻa Teleki ʻi heʻene sio fakamamaʻu ki heʻene ngāue fakaako mei ʻapí.
Naʻe pehē ange ʻe Teti, “ʻOku ʻi ai ʻeku fakakaukau. “Feinga ke ke malimali kiate kinautolu.”
Ko e hā? Naʻe ʻikai ko e meʻa ia naʻe ʻamanaki ki ai ʻa Telekí. Naʻá ne pehē ange, “Heiʻilo. Hangē ʻoku ongo ngali kehé ia.”
Naʻe pehē ange ʻe Mami, “ʻOku ʻikai ha meʻa ia ʻe ngali kehe ʻi he malimalí.”
Naʻe kamokamo mai ʻa Teti. “He ʻikai kovi ke ʻahiʻahiʻi. Hanga ki ʻolunga pea feinga ke malimali ki ha taha pē ʻokú ke sio ki ai. ʻOku faingataʻa ke ʻita ʻi ha malimali.”
Naʻe fakakaukau ʻa Teleki ki he fokotuʻu ʻa Tetí. Naʻá ne lotua ia kimuʻa peá ne mohé, pea naʻá ne ongoʻi nonga. Sai ia. Te ne ʻahiʻahiʻi ia.
ʻI he pongipongi hono hokó, naʻe hifo ʻa Teleki mei he pasí. Naʻe hū atu ha tamaiki tokolahi ʻi he matapā ʻi muʻa ʻo e ʻapiakó. Naʻe hū atu ʻa Teuleki ki loto mo punou hono ʻulú, ʻo hangē pē ko e angamahení.
Ka naʻe manatuʻi ʻe Teleki e fokotuʻu ʻa Tetí. Malimali pē, ko ʻene fakakaukaú ia.
Naʻe mānava lōloa ʻa Teleki mo hanga hake hono ʻulú. Naʻe lue mai ha tamasiʻi matuʻotuʻa ange kiate ia. Naʻá ne lahi hake ʻaki ha kalasi ʻe taha ʻia Teleki. Mahalo pe ko e ua. Naʻá ne tui ha falani sipoti pea naʻe manga lalahi mo lue vave.
Naʻe meimei hanga kehe ʻa Teleki. Ko e faʻahinga tamaiki ʻeni naʻá ne fakakaukau te ne ala tekeʻi ia mei he halá taʻe ʻi ai ha fakatokanga. Ka naʻá ne palōmesi te ne feinga.
Koia naʻá ne malimali pē.
Naʻe kiʻi fiefia e fofonga ʻo e kiʻi tamasiʻi ʻe tahá. Hili ʻene fakalaka haké, naʻe kiʻi tuʻu ʻa Teleki ʻi ha taimi siʻi. Naʻe ʻikai ke ne fuʻu ongoʻi tailiili he taimí ni!
Naʻe malimali ʻa Teleki ki ha niʻihi tokolahi ange ʻi heʻene fononga ki he kalasí. Naʻa nau meimei malimali kotoa mai! Naʻe moʻoni pē ʻa Teti. Naʻe ʻikai ha taha ia ʻe ʻita ʻi ha malimali.
ʻI he hū ʻa Teleki ki he loki akó, naʻá ne fakakaukau mahalo ʻe lelei pē ʻa e ako lotolotó. Naʻe kei lahi pē ʻa e ngaahi meʻa ke akó, pea kei ʻi ai pē mo ha ngaahi meʻa naʻá ne hohaʻa ki ai. Ka naʻe tokoni ʻa e malimalí. Mahalo ʻe lava ʻe heʻene malimalí ʻo tokoniʻi ha taha kehe ke ne ongoʻi sai ange.
Ngaahi tā fakatātā ʻa Daniel Duncan