“Pagpaminaw sa Propeta,” Higala, Okt. 2023, 4–5.
Pagpaminaw sa Propeta
Si Francesco naghinamhinam sa pagpaminaw ni Presidente Nelson.
Kini nga istorya nahitabo sa Argentina.
Milingkod si Francesco sa sopa duol sa bintana. Gilinya niya iyang duwaan nga mga sakyanan sa may bintana.
“Panahon na aron magbasa sa mga kasulatan,” miingon si Mamá. Si Francesco ug ang iyang mga igsoong lalaki ug mga igsoong babaye nagpundok diha sa sala. Giabli ni Mamá ang iyang Basahon ni Mormon.
Naminaw si Francesco samtang gibasa ni Mamá ang istorya ni Abinadi. Siya usa ka propeta kinsa misulay sa pagtudlo sa katawhan. Apan wala sila maminaw.
“Di ba siya isog?” Nangutana si Mamá. “Siya adunay importante nga mensahe gikan ni Jesukristo nga itudlo sa katawhan. Ug wala siya mohunong sa pagsulay!”
Mitando si Francesco. Naghunahuna siya ni Abinadi nga nagtudlo sa katawhan.
“Makahinumdom ba kamo unsay mahitabo sunod semana?” Nangutana si Papá.
“Oo!” Tisar nga milingkod si Francesco. “Kinatibuk-ang komperensiya!”
“Eksakto na,” miingon si Mamá. “Sa kinatibuk-ang komperensiya kita makapaminaw sa atong propeta.”
Sa kalit nakadungog sila og saba gikan sa dalan sa gawas. “Karon aduna koy kalabasa, sili, ug mga kamatis!” usa ka dakong tingog ang nanawag.
Nakaila si Francesco niadto nga tingog! Si Ramón kadto, ang tindero og prutas ug utanon. Kada adlaw magdrayb siya sa iyang trak sa dalan, magsulti sa tanang tawo unsa nga mga prutas ug mga utanon ang iyang baligya. Naggamit siya og mikropono aron madunggan siya sa mga tawo gikan sa ilang mga panimalay. Dayon manggawas sila aron mamalit og pagkaon.
“Ako usab adunay mga mansanas ug lamiang mga saging!” Nanawag ang tingog ni Ramón.
Nakahatag kadto ni Francesco og ideya. “Mamá! Ang mga propeta susama sa mga igpadakog tingog [loudspeaker]!”
“Unsay buot nimo nga ipasabot?” nangutana ang iyang igsoong babaye.
“Si Jesus naggamit sa propeta aron sa pagpakigbahin sa Iyang mga pulong, sama ni Ramón nga naggamit sa igpadakog tingog. Nianang paagiha ang tanan sa kalibotan makadungog Niya!” Dako ang pahiyom ni Francesco.
Milabay ang mga adlaw, ug sa wala madugay panahon na alang sa kinatibuk-ang komperensiya. Si Papá nag-andam og projector aron makatan-aw sila sa komperensiya diha sa bongbong. Mora kini og sine nga teatro!
Si Mamá naghimo og tsokoleyt chip nga mga biskwit aron magkaon samtang nagtan-aw sila. Mahinamon kaayo silang tanan sa dihang turno na sa propeta sa pagpakigpulong.
“Subaya ang dalan sa pakigsaad ug magpabilin dinha,” miingon si Presidente Nelson.*
“Gusto kong buhaton kana!” miingon si Francesco. “Apan unsaon?”
“Imo na kanang gibuhat.” Mipahiyom si Papá. “Nagsunod ka ni Jesukristo pinaagi sa pagpabunyag. Ug karon makapabilin ka sa dalan sa pakigsaad pinaagi sa pagpaningkamot sa pagsunod Kaniya matag adlaw.”
Mingisi si Francesco. Gusto siyang mosunod ni Jesukristo. Ug mabuhat niya kana pinaagi sa pagsunod sa propeta!
Paghulagway pinaagi ni Carolina Farías