“Padayon ug Pag-ani!” Higala, Okt. 2023, 32.
Higala ngadto sa Higala
Padayon ug Pag-ani!
Mga paghulagway pinaagi ni Garth Bruner
Nagpuyo ko sa California, USA, uban sa akong nagkadako nga pamilya. Sa ting-init miani kami og ubas sa parasan. Kami adunay dako nga pamilya, ug kaming tanan nagtambayayong og trabaho. Batan-on pa lang ko, apan ang akong amahan mitudlo kanako sa pagtrabaho og maayo.
Namutol kami og mga sanga sa punoan sa ubas. Dayon among gipundok ang mga ubas sa metal nga sudlanan. Kon mapuno na ang sudlanan, amo kining dad-on ngadto sa akong amahan. Iyang katagon ang mga ubas aron mauga sa init aron mahimong pasas. Ang tag-iya sa ubasan mibayad sa akong amahan alang sa mga pasas nga among nahimo.
Sa matag higayon nga magdala kami og mga ubas ngadto sa akong amahan, mosulti siya kanamo, “Padayon ug pag-ani.”
Nangadto kami sa sunod nga punoan sa ubas aron moani sa sunod nga pundok sa mga ubas. Amo kining gibuhat og pabalik-balik. Mipunting kami sa sunod nga punoan sa ubas ug sa buluhaton sa unahan namo. Wala kami nagpabalda sa unsay anaa sa among likod.
Matag semana gisweldoan sa akong amahan ang akong mga igsoon ug ako sa among trabaho. Gitudloan mi niya sa paggahin og 10 porsyento alang sa ikapulo. Among gitigom ang uban. Kon kami aduna nay igo, matag usa kanamo mopalit og kahoy nga eroplano o among paborito nga kendi. Among igahin ang mga hapon sa Sabado nga magdula sa parke sa among dulaan nga eroplano ug mangaon sa among kendi.
Ang panultihon sa akong amahan sa “pagpadayon ug pag-ani” nahimong tradisyon sa akong pamilya. Nagtudlo kini kanamo sa bili sa paghago. Importante kini alang kanamo ang “pagpadayon ug pag-ani” sa tanan namong buhaton. Kon kami motrabaho ug mosunod unsa ang gimando sa Dios nga among buhaton, makakaplag kami og hingpit nga kalipay sa kinabuhi.