“Nasayod ang Langitnong Amahan,” Higala, Okt. 2023, 28–29.
Nasayod ang Langitnong Amahan
Nganong nagkinahanglan man sila og daghan kaayong face mask?
Kini nga istorya nahitabo sa Pilipinas.
Si Spencer nakadungog sa pag-abli sa pultahan. Nakauli na ang iyang Papa! Ang mga bukton ni Papa puno sa mga gipamalit gikan sa tindahan.
Gibutang ni Papa ang mga bag ug gikakos si Spencer. “Nalipay ko nga nakakita nimo!”
Si Mama mitudlo sa usa ka dako nga kahon nga gidala ni Papa. “Unsa na?”
“Nakakita ko og kahon sa mga face mask nga gi-sale,” miingon si Papa. “Gibati nako nga magamit nato kini.”
Naglibog si Spencer. Nganong nagkinahanglan man sila og daghan kaayong mga face mask karon?
Usa ka semana ang milabay, si Spencer mipauli gikan sa eskwelahan uban sa iyang mga igsoon. Sa ilang pagsulod, si Mama nag-organisar og mga tapok sa mga butang diha sa lamesa.
“Ma, unsay imong gibuhat?” Ang igsoong lalaki ni Spencer nangutana.
“Akong giilisan ang mga suplay sa atong mga bag sa emerhensiya,” miingon si Mama. “Nakita nako kini diha sa estante karon ug naghunahuna ko nga kinahanglan nako kining susihon. Kini nga pagkaon hapit na diay maglima ka tuig! Mahimo ba ko ninyong tabangan?”
Si Spencer ug iyang mga igsoon mitabang kang Mama sa pagbutang sa mga sudlanan sa tubig ug mga pakete sa pagkaon diha sa mga bag. Dayon gitabangan ni Spencer si Mama sa pagbutang niini og balik diha sa estante. Bug-at kini!
Gibutang usab nila ang kahon sa mga face mask niana nga estante. Human sa pipila ka adlaw, nakalimot na si Spencer mahitungod niini.
Pipila ka bulan ang milabay, sa dihang si Spencer ug iyang pamilya migawas sa simbahan, dihay ngitngit, baga nga aso nga nagpalibot kanila. Giubo sila samtang misakay sila sa dyip pauli.
Sa ilang pag-abot sa balay, gi-on ni Papa ang TV aron makita kon unsay nahitabo. Ang pamilya nagpundok aron motan-aw.
“Ang Bulkang Taal nagsugod na sa pagbuga og abo karong adlawa,” ang reporter miingon. “Ang abo delikado sa pagginhawa. Palihog itaod ang face mask. Ang tanan kinahanglang magpabilin sa balay ugma.”
Mitan-aw si Spencer sa palibot sa iyang pamilya. Nahibulong and tanan.
“Oy!” Miingon si Mama. “Kana nga kahon sa mga face mask!”
Mingisi si Papa. “Nasayod ko nga dunay usa ka rason nga kini akong gipalit!”
“Pa, nakahibalo ka nga mobuto ang bulkan?” Nangutana si Spencer.
Milingo-lingo si Papa. “Wala,” miingon siya. “Apan ang Langitnong Amahan nasayod. Ug gipadala Niya ang Espiritu Santo sa pagsulti nako nga mopalit sa mga face mask. Duna tay daghan nga ikapaambit usab sa uban.”
“Ug naghunahuna ko nga ang Espiritu Santo mihatag nako og ideya sa pagsusi sa atong mga bag sa emerhensiya,” miingon si Mama. “Karon duna tay daghang tubig ug pagkaon samtang magpundo sa balay nga maghulat nga mawala na ang abo.”
Si Spencer mibati og kainit sa kahiladman. Itom ang hangin, apan ang ilang panimalay luwas, ug sila aduna kon unsay ilang gikinahanglan. Nasayod siya nga ang Langitnong Amahan padayon nga nagtabang kanila. Malipayon si Spencer nga ang iyang pamilya naminaw sa Espiritu Santo!
Mga paghulagway pinaagi ni Laura Catrinella