Ang Gamay nga Librarya

Ni Julia Willardson

(Gibase sa usa ka tinuod nga istorya)

Kini nga istorya nahitabo sa USA.

Gisirado ni Janie ang iyang libro ug malipayon nga nanghupaw. Kini nga libro ang iyang paborito! Nakahuman na siya niini sa makatulo ka higayon. Ganahan siya nga magbasa!

“Sa imong hunahuna makahimo ba ako og gamay nga librarya?” Nangutana si Janie ni Mama ug Papa nianang adlawa. Gusto siyang motabang sa uban pinaagi sa pagpakigbahin og mga libro ngadto kanila.

“Unsa ang gamay nga librarya?” Nangutana si Papa.

“Usa kini ka kahon nga dunay mga libro nga ibutang sa gawas,” miingon si Janie. “Ang mga tawo makahulam niini nga libre. O pwede silang makabilin og mga libro aron mabasa sa uban.”

“Sa akong hunahuna maayo kana nga ideya,” miingon si Mama.

Mitando si Papa. “Makatabang mi nimo sa paghimo niini.”

“Salamat!” miingon si Janie. “Tingali pwede tang mag-bake dayon ibaligya aron duna tay kwarta alang sa mga suplay!” Si Janie ug ang iyang igsoong babaye, si Carli, mihimo og mga karatola aron i-anunsiyo ang pagbaligya sa gi-bake. Gibutang nila kini sa palibot sa kasilinganan. Si Mama ug Papa mipahibalo sa mga tawo bahin sa pagbaligya sa gi-bake diha sa online. Naghinam-hinam na kaayo si Janie!

Nalingaw kaayo si Janie nga naghimo sa mga pagkaon. Naghimo siya og cookies, kagumkom nga mga cereal bar, ug mga snowball cake.

Sa wala madugay miabot ang adlaw sa pagbaligya sa mga gi-bake. Sila si Janie, Carli, ug ang ilang higala nga si Bella mibutang og lamesa sa tugkaran. Namaligya sila og mga pagkaon ngadto sa kadaghanan sa ilang mga silingan. Ang ubang mga tawo nagdonar usab og kwarta. Gibutang ni Janie ang tanang kwarta sa usa ka espesyal nga garapon.

Pagkahuman sa pagbaligya sa gi-bake, si Janie adunay laing ideya. Iyang giapil ang iyang ubang paborito nga mga pagkaon sa usa ka sangka sa fair sa probinsya ug nakadaog og premyo! Gibutang niya ang premyo nga kwarta sa garapon kauban ang ubang kwarta alang sa iyang gamay nga librarya.

Karon nga si Janie duna nay kwarta alang sa gamay nga librarya, nagkinahanglan siya og mga libro nga mopuno niini. Giadto niya tagsa-tagsa ug mihangyo sa iyang mga silingan sa pagdonar og mga libro nga dili na nila gamiton. Pipila sa iyang mga higala miabot aron mohatag usab ngadto kang Janie sa ilang mga libro.

Sa kataposan panahon na sa pagtukod sa iyang gamay nga librarya. Gigamit ni Janie ang kwarta nga iyang natigom aron sa pagpalit og mga suplay. Nagdrowing siya og usa ka desinyo sa kahon ug mihimo og mga sukod. Mitabang si Papa sa pagputol sa kahoy, ug mitabang si Janie kaniya sa pagsumpay sa mga piraso.

Gibulit ni Mama ang mga liki ug mga sinumpayan aron dili makasulod ang tubig kon mag-ulan. Mitabang si Jane sa pagtaod sa karatola nga nagpahibalo sa mga tawo sa pagkuha og libro o pagpaambit og libro.

Sa kataposan si Janie ug iyang pamilya mibutang sa kahon diha sa tugkaran duol sa ilang dako, landong nga kahoy. Si Papa mibutang og poste sa yuta, ug dungan nilang gibutang ang kahon diha sa poste. Nakahimo sila og gamay nga librarya!

Gibutangan ni Papa og tulo ka dagko nga bato sa palibot sa poste. “Aron makapugong niini nga dili mapalid,” miingon siya.

“Ganahan ko niini!” Miingon si Janie. “Karon mabutang na nato sa sulod ang mga libro.” Ilang gipuno ang gamay nga librarya sa gidonar nga mga libro.

Human niana, kada adlaw moadto si Janie aron susihon ang gamay nga librarya. Ganahan siyang makakita kon unsa nga mga libro ang gidugang o gikuha sa mga tawo. Usa ka adlaw nakakita siya og gamay nga batang babaye nga mipili sa usa sa kaugalingong mga libro nga paborito ni Janie! Nalipay kaayo siya nga siya makatabang sa iyang mga silingan pinaagi sa pagpakigbahin og mga libro diha sa gamay nga librarya.

Paghulagway pinaagi ni Barbara Bongini