“Pasulit ni Tashi,” Higala, Okt. 2023, 40–41.
Pasulit ni Tashi
Nag-ampo si Tashi nga ang iyang kahago magmapuslanon.
Kini nga istorya nahitabo sa Zimbabwe.
Si Tashi miginhawa og lawom samtang gihatag og balik sa iyang magtutudlo ang mga pasulit sa mga estudyante. Bisan tuod kadto praktis lang nga eksam, gikulbaan siya pagkakita sa iyang mga eskor.
Kataposan nga tuig na ni Tashi sa elementarya, ug siya daghan kaayo og mga eksam. Gawas sa mga pasulit sa math ug science, kinahanglan usab siya nga mokuha og mga pasulit sa language. Didto sa Zimbabwe, sila magkat-on sa pagsulat ug pag-istorya sa Iningles ug Shona. Ang Shona mao ang labing lisod alang kang Tashi.
“Naa ra, Tashi.” Gitunol sa magtutudlo ni Tashi ang iyang mga eskor. Nindot ang iyang eskor sa math! Ug maayo usab sa English. Apan nakita dayon ni Tashi ang iyang eskor sa Shona, ug sa kalit naglain ang iyang tiyan. Wala siyay nahimo nga maayo!
Si Tashi nagdungo sa tibuok higayon nga naglakaw pauli gikan sa eskwelahan.
“Unsay problema?” Nangutana si Mama.
“Nakakuha ko og dili maayo nga grado sa akong praktis nga eksam sa Shona,” miingon si Tashi. “Pirme gayod kong walay ayo sa Shona. Unsa kaha kon mahagbong ko sa tinuod nga eksam?”
Milingkod si Mama uban ni Tashi. Gitan-aw niya [Mama] ang iyang mga eskor. “Morag kinahanglan pa ka og dugang praktis.”
Nanghupaw si Tashi.
“Unsa kaha kon magtakda ka og tumong nga magpraktis sa pagsulat sa Shona?” Gikuha ni Mama ang Giya nga Basahon sa Kabataan ni Tashi. Dayon iyang gibasa ang kasulatan nga naa sa unang pahina. “Ug si Jesus mitubo sa kaalam ug sa gidak-on ug sa kahimuot kaniya sa Dios ug sa tawo.”* Mipahiyom siya kang Tashi. “Si Jesus hinay-hinay nga mitubo, ug mao usab ikaw.”
“OK,” miingon si Tashi. “Sa imong hunahuna motabang kaha ang Langitnong Amahan kanako?”
“Nasayod ko nga Siya motabang.”
Nianang gabhiona, nag-ampo si Tashi. “Pinalanggang Langitnong Amahan, palihog tabangi ko nga makapasar sa akong eksam sa Shona. Palihog tabangi ko nga makakat-on ug mahimong mas maayo. Sa ngalan ni Jesukristo, amen.”
Mapasalamaton si Tashi nga nakahimo siya sa pag-ampo alang sa tabang. Apan nasayod siya nga kinahanglan usab niyang maningkamot pag-ayo. Kada adlaw, magpraktis si Tashi sa pagsulat sa Shona. Nakakuha siya og dugang nga tabang gikan sa iyang mga magtutudlo. Usahay ganahan siyang makigdula sa iyang mga higala o mobuhat og laing butang. Apan padayon siya sa pagpraktis.
“Naglambo ka pag-ayo,” miingon ang magtutudlo ni Tashi.
Gibati ni Tashi nga masigarbohon sa iyang kaugalingon tungod sa pagtrabaho og maayo.
Sa wala madugay ang adlaw sa eksamin miabot. Nag-ampo pa siya ug nangayo sa Langitnong Amahan og tabang.
Ang magtutudlo mihatag sa mga eksam ngadto sa mga etudyante, ug gipunit ni Tashi ang iyang lapis. Sa iyang pagsugod og sulat, gibati niya ang kainit, malinawon nga pagabti. Nasayod siya nga kadto mao ang Espiritu Santo. Ang Langitnong Amahan naghupay kaniya ug nagtabang kaniya.
Sa dihang nahuman na ang pasulit, mahinamon si Tashi nga mosulti sa iyang mga ginikanan bahin niini. Wala pa siya kahibalo sa iyang eskor, apan maayo ang iyang gibati bahin niini. Gibuhat niya ang iyang labing maayo.
“Mapasigarbohon ko nimo,” miingon si Mama.
“Salamat!” Mipahiyom si Tashi ug gikuha ang iyang Giya nga Basahon sa Kabataan aron basahon pag-usab ang kasulatan. Apan iyang giusab ang usa ka gamay nga bahin. “Ug si Tashi mitubo sa kaalam ug sa gidak-on ug sa kahimuot kaniya sa Dios ug sa tawo.”
Mga paghulagway pinaagi ni Pauline Gregory