“Giunsa Pagkahimong Maayo sa Akong Dili Maayo nga Adlaw,” Higala, Okt. 2023, 38.
Imong Sinulat
Giunsa Pagkahimong Maayo sa Akong Dili Maayo nga Adlaw
Paghulagway pinaagi ni Jared Beckstrand
Aduna akoy dili maayo nga adlaw. Kinahanglan kong moadto sa akong dula sa baseball, apan nahingo ang akong ngipon ug nagsakit. Nabilin nako sa balay ang ubang uniporme nako sa baseball. Ug gikapoy ko. Wala gyod ko ganahi nga modula og baseball nianang adlawa. Apan miadto lang gihapon ko sa dula tungod kay kinahanglan nakong iuli ang kalo sa usa sa akong kauban sa team.
Milingkod ko sa bleacher imbis moapil sa akong team. Nakabantay ang akong coach nga naglingkod ko sa lingkoranan nga magul-anon. Iya kong giawhag sa pagdula tungod kay gikinahanglan ko sa team. Iyang gipakita nako nga nagpakabana siya nako, sama sa pagmatikod ni Jesus niadtong nagmagul-anon ug nagkinahanglan og suporta.
Dayon, usa sa akong kauban sa team miduol ug mibarog tapad nako. Mipahiyom siya nako ug nangutana nako kanus-a ko miabot didto. Naghinamhinam siya nga nakakita nako ug gusto nga moapil ko og dula. Kini nga teammate sama usab kang Jesus tungod kay siya nagpakabana kanako. Iyang gipakita nako kon unsay buhaton sa maayong higala kon ang usa ka tawo adunay dili maayo nga adlaw. Nalipay gyod ko nga ang akong coach ug kauban sa team migahin og panahon aron mobati ko og maayo, ug sa kataposan midula ko sa baseball!
Ako adunay bookmark nga nag-ingon, “Usa ka buhat sa kamabination dili makapausab sa kalibotan, apan mahimong makapausab kini sa kalibotan sa usa ka tawo.” Ang akong coach og kauban sa team nakapausab sa akong kalibotan nianang hapon sa Sabado pinaagi sa pagpili nga mabination. Nasayod ko nga mahinungdanon nga mahimong sama ni Jesus ug mopakita og gugma ug kamabination ngadto sa tanan nga atong mahinabi. Ang Langitnong Amahan nagpakabana sa matag usa kanato ug nahigugma kanato. Matag usa kanato mahinungdanon ngadto Kaniya, mao nga Siya mopadala og mabination nga mga tawo aron pagpakita kanato sa Iyang gugma.