Kumusta gikan sa Peru!

Kat-oni ang mahitungod sa mga anak sa Langitnong Amahan sa tibuok kalibotan.

Ang Peru usa ka nasod sa Habagatang America. Sobra sa 33 ka milyon ka tawo ang nagpuyo didto!

Machu Picchu

Ang Machu Picchu usa ka karaan nga siyudad sa Kabukiran sa Andes. Ang katawhan sa Inca mitukod niini gatosan ka tuig na ang milabay. Migamit sila og mga tulay sa pisi aron makakatkat sa mga canyon!

Pagbantay sa mga Hayop [Animal Herding]

Sa Peru, ang mga tawo nagbuhi og mga karnero, mga llama, ug mga alpaca sa mga kabukiran. Gigamit nila ang panit sa mga hayop aron himoon og mga sinina, habol, ug trapo.

Pink nga mga Dolphin

Ang pink nga mga dolphin nagpuyo sa Suba sa Amazon! Nagsugod ang suba sa kabukiran sa Peru ug modagayday agi sa kalasangan sa Amazon.

Mga Pinulongan

Ang Peru adunay tulo ka opisyal nga mga pinulongan: Kinatsila, Quechua, ug Aymara. Kasagaran sa mga tawo makasulti og Kinatsila. Daghang pinulongan ang gigamit didto sa kalasangan sa Amazon!

Mga templo

Sobra sa 600,000 ka miyembro sa Simbahan ang nagpuyo sa Peru. Ang Peru adunay tulo ka templo, nga adunay tulo pa nga umaabot!

Kalihokan

Mga Linya sa Nazca

Usa ka karaan nga katawhan nga gitawag og Nazca misulat og dagko kaayo nga mga linya sa yuta aron makahimo og mga hulagway. Makahimo kamo sa inyong kaugalingong gamay nga mga linya sa Nazca sa panimalay!

1. Taboni ang usa ka piraso nga papel nga gipahiran og nipis nga kula [glue].

2. Butangi og pino nga grano sa materyal sama sa balas, asukar, o abog diha sa papel.

3. Gamiti og tukog aron makadrowing og mga linya aron makahimo sa imong hulagway. Inig ka uga niini, hinaya og taktak ang nahibilin nga balas o asukar.

Resipe

Papa a la Huancaína

Sobra sa 4,000 ka klase sa patatas ang gitanom sa Peru! Aniay salsa nga imong masuwa inig kaon nimo ini.

Isagol ang 1–3 ka sili nga wala nay liso (o 1 ka kutsarita nga chili powder), 1 ka kutsara nga mantika sa utan, 1/2 sa tasa nga queso fresco (o cottage nga keso), 4 ka soda nga kraker, 1/2 sa tasa nga evaporada nga gatas, ug gamay kaayo nga asin. Isilbi ang salsa sa linuto na nga mga patatas nga may pinikas nga gipagahi nga mga itlog ug mga oliba.

Siguroa nga adunay hamtong nga motabang!

Sugyot sa Kahimsog

Bitamina gikan sa Kahayag sa Adlaw

Ang bitamina D makapalig-on sa imong kabukogan. Makuha ni nimo nga bitamina gikan sa adlaw. Paningkamot sa pagdula sa gawas matag adlaw. Pagbutang og sunscreen aron sa pagpanalipod sa imong panit!

Mga paghulagway pinaagi ni Kelly Smith