Ngaahi ʻEkitivitī ʻo e “Haʻu, ʻo Muimui ʻIate Aú,” Kaumeʻa, Nōvema 2023, 10–11.
Ngaahi ʻEkitivitī ʻo e Haʻu, ʻo Muimui ʻIate Aú
Maʻá e efiafi ʻi ʻapí pe ako folofolá—pe ke maʻu ai ha fiefia!
Ko Sīsū Kalaisi ʻa Hotau Fakahinohinó
Ki he Hepelū 1–6
ʻŪ tā fakatātā ʻa Katy Dockrill
Talanoa: Ko Sīsū Kalaisi ʻa e “ʻEiki ʻo [ʻetau] moʻuí” (Hepelū 2:10). ʻOku tataki ʻe ha ʻeikivaka ha vaka ʻi he tahí. ʻE lava foki ke tataki kitautolu ʻe Sīsū ki hēvani ke tau lava ʻo nofo mo Ia ʻi ha ʻaho!
Hiva: “ʻOku Ou Fie Maʻu Koe” (Ngaahi Himi, fika 48)
ʻEkitivitī: Tā ha fakatātā ʻo ha vaka ʻi he peaú. Hili iá peá ke tohi pe talanoa fekauʻaki mo ha ngaahi founga te ke lava ai ʻo muimui kia Sīsū Kalaisi. ʻOkú Ne tataki fēfē nai koe ʻi hoʻo moʻuí?
Kau Moʻungaʻi Tangata ʻo e Tuí
Ki he Hepelū 7–13
Talanoa: ʻOku pehē ʻe he folofolá ʻoku ʻuhinga ʻa e tuí ki he tui ki he ngaahi meʻa ʻoku ʻikai te ke lava ʻo mamata ki aí (vakai, Hepelū 11:1). ʻOku fakamatalaʻi ʻi he Hepelū 11 ha ngaahi talanoa ʻo ha kakai tokolahi naʻa nau maʻu ʻa e tuí. ʻOku ʻomi ʻe he tui kia Sīsū Kalaisí ʻa e nongá mo e loto-toʻá kiate kitautolu.
Hivá: “Ko e Tuí” (Tohi Hiva ʻa e Fānaú, 50)
ʻEkitivitī: Taufetongi ʻi hono fili ha moʻungaʻi tangata mei he Hepelū 11. ʻE fakahoko ʻe he tokotaha kotoa ha ngaahi fehuʻi ke mateʻi pe ko hai ʻa e moʻungaʻi tangatá. Te ke lava fēfē nai ʻo maʻu ʻa e tuí ʻo hangē ko e kakai ʻi he folofolá?
ʻEkitivitī Lová
Ki he Tohi ʻa Sēmisí
Talanoa: Naʻe akoʻi ʻe he ʻAposetolo ko Sēmisí ʻoku totonu ke tau tokoniʻi ʻa kinautolu ʻoku faingataʻaʻiá (vakai, Sēmisi 1:27). Ko hai ʻokú ne fiemaʻu hoʻo tokoní?
Hiva: “ʻI Heʻetau Tokoní” (Tohi Hiva ʻa e Fānaú, 108B)
ʻEkitivitī: Fakahoko ha lova! Fokotuʻu ha laine kamata mo e fakaʻosi. Lova leva ki he tepí ʻaki haʻo heke ho vaʻé ki muʻa ʻo ʻikai hiki ki ʻolunga. ʻE fili ʻe he ikuna ʻo e lová ha kiʻi ngāue tokoni faingofua ke fai ʻe he kulupú, hangē ko hano ʻave ha pōpoaki ʻofa ki ha taha pe ʻaʻahi ki ha taha ʻoku tuenoa.
Tokoni Maʻa ʻEtau Ngaahi Kuí
Ki he 1 mo e 2 Pitá
Talanoa: ʻE lava ke ako ʻetau ngaahi kuí fekauʻaki mo e ongoongoleleí hili ʻenau maté (vakai, 1 Pita 4:6). Te tau lava ʻo papitaiso maʻanautolu ʻi he temipalé mo tokoniʻi kinautolu ke muimui ʻia Sīsū Kalaisi!
Hiva: “Tohi Hohokó—ʻOku ou Fai Ia” (Tohi Hiva ʻa e Fānaú, 100)
ʻEkitivitī: Fakaʻaongaʻi ha ʻū poloka pe fanga kiʻi foʻi kiupi suka ke langa ʻaki ha temipale. Te ke teuteu fēfē nai ke hū ki he temipalé?
Ko Hono Foaki ʻo e ʻOfá
Ki he 1–3 Sione; Sute
Talanoa: ʻOku ʻofa ʻa e Tamai Hēvaní ʻiate kitautolu kotoa! Naʻe akoʻi mai ʻe he ʻAposetolo ko Sioné ke tau ʻofa foki ki he niʻihi kehé (vakai, 1 Sione 4:19, 21). Te ke fakahaaʻi fēfē nai ʻa e ʻofá ki he niʻihi kehé?
Hiva: “Feituʻu ʻoku ʻI ai ʻa e ʻOfá” (Tohi Hiva ʻa e Fānaú, 76)
ʻEkitivitī: ʻAlu ki he peesi 12 ke faʻu ha ngaahi foʻi haati pepa. Pea foaki leva ʻa e ngaahi foʻi hātí ki he kakai ʻokú ke ʻofa aí!