Ngaahi Ongoongo ‘o e Konifelenisí

Ngaahi Kupuʻi Lea ʻo e Konifelenisí

“Ko e ongoongolelei ʻo Sīsū Kalaisí ko ha palani ia ʻokú ne fakahā mai kiate kitautolu ʻa e founga ke tau aʻusia ai ʻa e tuʻunga ʻoku finangalo ʻa ʻetau Tamai Hēvaní ke tau aʻusiá.”

Palesiteni Dallin H. Oaks, Tokoni ʻUluaki ʻi he Kau Palesitenisī ʻUluakí

“Ko e Kalaisí ʻa Sīsū. Ko Ia hotau Fakamoʻuí mo hotau Huhuʻí. Ko Ia ʻa hotau kaungāmeʻa lelei tahá.”

Palesiteni M. Russell Ballard, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá

“ʻE lava ke lelei ʻa e meʻa kotoa pē tuʻunga ʻia Sīsū Kalaisi.”

Sisitā Amy A. Wright, Tokoni ʻUluaki ʻi he Kau Palesitenisī Lahi ʻo e Palaimelí

Mamataʻi ʻa e Konifelenisí ʻi he funga ʻo e Māmaní

Koeʻuhí ko e kehekehe ʻa e taimí, ʻoku mau mamata ʻi he ngaahi fakataha pongipongi ʻo e konifelenisí ʻi he efiafí. Naʻa mau fiefia ʻi he taimi naʻe fanongonongo ai ʻe Palesiteni Nalesoni ʻa e ngaahi temipale foʻoú!

Sōfia D., taʻu 11, Vahefonua Peletisilavá, Solovākia

ʻOku mau teuteu ki he konifelenisí ʻaki ʻemau fakatau mai ha fanga kiʻi meʻakai ifo (treats) mo mālōlō ke ʻoua naʻa mau mohe ʻi he lolotonga ʻa e konifelenisí. ʻOku mau lotua fakafāmili ke maʻu ha mahino mo lau ʻa e folofolá. ʻOku ou fiefia maʻu pē ke fanongo ki ha palōfita moʻui pea mo fanongo ki he folofola ʻa e ʻOtuá.

Lunakouasi S., taʻu 7, Vahefonua Fakatonga, Malauī

Naʻe hanga ʻe heʻeku sio ʻi he konifelenisí ʻo ʻai ke u fie ofi kia Sīsū Kalaisi. Ko Ia ʻa e Tauhisipi Leleí, pea ʻokú Ne tokanga mai kiate kitautolu, ko ʻEne fanga sipí. ʻOku tau faʻa hē atu ʻo kiʻi mamaʻo ʻi he taimi ʻe niʻihi, ka ʻokú Ne fekumi maʻu pē kiate kitautolu.

ʻIfaleni C., taʻu 9, Vahefonua Sani Huani, ʻĀsenitina

Temipale ʻe 20!

Naʻe fanongonongo ha temipale foʻou ʻe 20 ʻi he konifelenisí! Fakaʻaongaʻi ha mape ke kumi ʻa e tuʻuʻanga ʻo e temipale foʻou takitaha. Valivali ʻa e konga ʻi he fakatātā ʻo e temipalé ʻi hoʻo maʻu ʻa e feituʻu takitaha.

Savaiʻi, Samoa

Cancún, Mexico

Piura, Peru

Huancayo, Peru

Viña del Mar, Chile

Goiânia, Brazil

João Pessoa, Brazil

Calabar, Nigeria

Cape Coast, Ghana

Luanda, Angola

Mbuji-Mayi, Democratic Republic of the Congo

Laoag, Philippines

Osaka, Japan

Kahului, Hawaii, USA

Fairbanks, Alaska, USA

Vancouver, Washington, USA

Colorado Springs, Colorado, USA

Tulsa, Oklahoma, USA

Roanoke, Virginia, USA

Ulaanbaatar, Mongolia

Vahehongofulú mo e Ngaahi Foakí

Naʻa tau ako ʻi he konifelenisí ha niʻihi ʻo e ngaahi founga ʻoku fakaʻaongaʻi ai ʻe he Siasí ʻetau paʻanga vahehongofulú mo e ngaahi foakí ke faitāpuekina ʻaki ʻa e kakai ʻi he funga ʻo e māmaní!

• ʻI he taʻu kuo ʻosí, naʻe laka hake ʻi he paʻanga ʻAmelika ʻe 1 pilioná naʻe fakaʻaongaʻi ke faitāpuekina ʻaki ʻa e kau faingataʻaʻiá.

• Naʻe tokoni ha toe paʻanga ʻAmelika ʻe 54 miliona ki he ngaahi faʻē mo e fānau faingataʻaʻiá.

• ʻOku tokoni ʻa e vahehongofulú ke poupouʻi ha kau faifekau ʻe toko 71,000 tupu ʻoku ngāue ʻi ha ngaahi misiona ʻe 414.

• ʻOku tokoni foki ʻa e vahehongofulú ke tokangaʻi ha ngaahi fakatahaʻanga lotu ʻe 30,000 ʻi ha ngaahi fonua mo ha vahefonua ʻe 195.

Ngaahi Lēsoni ʻo e Moʻuí mei he Palōfitá

Naʻe hoko ʻa e taʻu 99 ʻo Palesiteni Nalesoní ʻi he taʻú ni! ʻI heʻene leá, naʻá ne vahevahe ai ha niʻihi ʻo e ngaahi lēsoni kuó ne ako ʻi he meimei taʻu ʻe 100 ʻo ʻene moʻuí. ʻAlu ki he peesi 2 ke lau ʻa e meʻa naʻá ne akoʻí.