“ʻOku Teuteu ʻa ʻAkoni ki he Temipalé,” Kaumeʻa, Nōvema 2023, 36–37
ʻOku Teuteu ʻa ʻAkoni ki he Temipalé
Feʻiloaki mo ʻAkoni pea ako ʻa e founga naʻá ne teuteu ai ke ʻalu ki he temipalé.
ʻOku taʻu 12 ʻa ʻAkoni. ʻOkú ne nofo ʻi Niu Mekisikou, ʻIunaiteti Siteiti ʻo ʻAmeliká, ʻi he Puleʻanga Navahoó. Ko ha feituʻu ʻeni ʻo e ʻIunaiteti Siteití ʻoku puleʻi ʻe he kakai Navahoó. ʻOku nofo ha kakai ʻe toko 250,000 tupu ʻi ai.
ʻI he kei siʻi ange ʻa ʻAkoní, naʻá ne sio ki he ʻalu ʻa e niʻihi naʻe lalahi ange ʻiate iá ki he Kau Finemuí mo e Kau Talavoú.
Naʻá ne mamata foki ki heʻenau fiefia ʻi heʻenau ʻalu ki he temipalé. Naʻe fiefia foki mo ʻAkoni ke ʻaʻahi ki he temipalé.
Naʻe teuteu ʻa ʻAkoni ki he Kau Talavoú ʻaki ʻene ʻalu ki he lotú pea talanoa mo hono fāmilí.
Naʻá ne ʻeke ha ngaahi fehuʻi fekauʻaki mo e temipalé koeʻuhí ke ne mateuteu ke hū ki loto.
ʻOku pehē ʻe ʻAkoni, “Naʻá ku manavasiʻi ke ʻalu ki he temipalé ʻi he fuofua taimí. Ka ʻi he taimi ʻoku ou ʻi he temipalé aí, ʻoku ou ongoʻi malu.”
Ko e temipale ofi taha kia ʻAkoní ʻa e Temipale ʻAlapakoki Niu Mekisikoú. Ko ha lele meʻalele houa ʻe fā ia. ʻOku fiefia ʻa ʻAkoni he ʻe vavé ni pē hano langa ha temipale foʻou ʻe ofi angé.
ʻOku ʻamanaki ʻa ʻAkoni ke ngāue fakafaifekau ʻi ha ʻaho, ʻo hangē pē ko e niʻihi lalahi ʻiate iá.
Kuó ne kamata vahevahe ʻa e ongoongoleleí ʻaki ʻene fakaafeʻi hono kaungāmeʻá ki he lotú. ʻOkú ne fie hoko ko ha faʻifaʻitakiʻanga ki hono tehiná mo e niʻihi kehé foki!
ʻOku ui ʻa e fanga fuʻu maka māʻolunga ʻi he fakatātā ko ʻení ko e “ʻū kapakau ʻo e ngaahi maká.” ʻOku mahuʻinga ʻa e feituʻú ni ki he kakai Navahoó.