“E raka riki nakon Tamaroan Te Bong ni Kataneiai,” Te Rao, Nobembwa 2023, 14–15.
E raka riki nakon Tamaroan Te Bong ni Kataneiai
E aki raoiroi nanon te aine. E kona ni ibuobuoki Ismael?
E riki te karaki aei i Bolivia.
E moangare Ismael ngke e otinako i tinaniku iaan otantaai. Ngaia ao Papá a nakon te tabo ni kamaangang. Ngke anakonako, e taua bain Papá’ Ismael ao ni uota ana booro ni butibooro. E tatangiria ni mena irarikin Papa Ismael—riki ngkana a butibooro!
Ngke a roko n te tabo ni kamaangang, e tarataranako Ismael. E kouti uteute te aine irarikin te marae ni butibooro. A nakonako te utu n te kawai nakonako. Ma akea ae takakaro n te marae ni butibooro. Ismael ma Papá a bon mwaawawa n takakaro ni kataneiai!
“Ko tauraoi n takakaro?” E titiraki Papá.
“Eng!” E kabirimwaaka Ismael nakon te marae. E karaoa te biri ni kakamwaninga, oro booro mwiin te katuaa, ao karin booro man te koona.
E orea te booro ni kabanea angina Papá. E kiba riaon Ismael!
“N na anaia,” e taku Ismael. E biri nakon koonan te marae ao n anaa te booro. E noora te aine bwa e bon tabe ni kenken n te tano. E taraa ni kainano.
“N na riki bwa te kouru ngkai,” e weteia Papá. “Nooria ngkana ko kona n karina am booro!!”
E biri rikaaki Ismael ao n orea te booro nakon te kouru. E kaea te booro Papá bwa e na totokoa te booro ma e aki reke irouna.
“E rinnnn!” E tatakarua Ismael ngke rin te boro n te kouru.
E bane teuana te aoa. “Te tai n oki nakon mweengara,” e taetae Papá.
E taraa te aine are e kouteute Ismael. Te mwakuri iaan te riringa e aki kaunga n aron te butibooro, e iango. E tangiria ni kaungaa nanon neierei. E reke ana iango imwiina.
“Papá, n am iango te aine arei e karaoa te mwakuri ae tamaroa?” e titiraki.
“Tera?” E taraa te aine are e kouteute Papá. “O, Eng.”
“I iangoia bwa ti riai n nakoina n tuanga!” e taetae Ismael.
“Eng ma, ti riai ni waekoa n okira mweengara. E tataningaira Mamá, e taku Papá.
E taratara te aine are e kaoa ramwana Ismael. Te namakin bwa e na taetae nakoina e rikirake. “I namakinna bwa ti riai n nakoina,” e taku. E taua bain Papá’ ao n nakonako nakon te aine.
“Ko na mauri n te ingabong aei, neiko” e taetae Ismael ma baina ae kateiteia.
E aki taraiia te aine. “Tera ae ko tangiria?”
E kona n ataia Ismael bwa e aki rangi ni kukurei. Ma anne e aki katokia. “I tangiria n tuangko bwa e rangi n tamaroa am mwakuri ae ko karaoia!”
N te tai anne ao e a taraia te aine.
E wiingare Ismael. “Ko rabwa ngkai ko tararuaa te tabo ni kamaangang!”
E wiingare nakoina te aine. “Ko rabwa!” e taku te aine. Imwiina moangarena e a bubura riki. “Ko rangi ni bati n rabwa.”
E namakina te kukurei Ismael ngke a nakonako rikaaki nakon mweengaia ma Papá.
“I taku bwa te bwai are ko taekinna e rangi ni kakawaki nakon te aine arei,” e taku Papá. “I kukurei bwa ko kakauongo nakon te namakin are ko karekea.”
“Ngai naba.” E iango tabeua te tai Ismael. Imwiina e titiraki, “Ngkoe iroum bon mairoun te Tamnei ae Raoiroi?”
E katoutoua atuuna Papá. “N tabetai te Tamnei ae Raoiroi e anganiira te iango bwa tina buoka temanna. Ao ko karaoa raoi anne.”
E ngare Ismael. Te taetae ma te aine bon te bwai ae uarereke, ma e a tia ni kanakoraoa ana bong. E kakauongo nakon te Tamnei ae Raoiroi ao ni kanakoraoa naba ana bong!
Kamataata n te tamnei iroun Jennifer Bricking