“Buoka Tarina ae Uarereke,” Te Rao, Nobembwa 2023, 16–17.
Buokan Tarina ae Uarereke
Akea ae bane ana tai ma Lashia ngkai.
E riki te karaki aei i Aberika Maiaki.
E bungiaki mwanen Lashia te mwaane. Arana bon Liam. A roro irana ao baina ma waena a rang uarereke. E a bon rangi n tikiraoi!
Ma n tabetai ao rikin te teei ae uarereke n te utu e kangaanga. A rangi n tabetabe n taainako ngkai Tinana ao Tamana. Ao E rangi n korakora tangin Liam.
“Tinau, ko kona ni wareka te karaki nakoiu?” E titiraki Lashia.
“N nang teboka Liam n te taabu,” e taku Tinana. “Tao ko konaa n wareka te karaki ma Ariana.”
E tekateka iaon te timanti ma tarina ae uarereke Lashia. A rairairii baan booki. Ma bon tiaki arona n akean Tinaia.
“Tamau, ko kona n takakaro ma ngai?” E titiraki Lashia.
“N na riai ni buoka Tinam ma te teei imwain ae N na nako ni mwakuri,” E taku Tamana.
E mata n un Lashia. Ai akea aia tai Tinana ao Tamana ngkai ibukina! A bon buobuoka naba Liam.
E nako imwiina ni mwakuri Tamana. E katuka Liam Tinana n rawea motirawana teutana. E tekateka ma Lashia ao Ariana n te kaintekateka. E taraa ni kainano.
“Ti a bon rangi n tabetabe ma Liam” E taku Tinana. “Ko a tia n namakina te maroa teutana?””
E katoutoua atuuna Lashia. E namakinna ae kaanga e na tang.
E koonia Lashia ao Ariana Tinaia. “E rangi ni kainnanoa te buoka ae mwaiti Liam ngkai ibukina bwa e uarereke. Akea te bwai ae e kona ni karoaia i bon irouna moa ngkai, n arom ae ko kona.”
“I ataia,” e taku Lashia.
Ma ngkana ko kukurei, ko kona ni buokai n tararuaa Liam.” E wiingare tinana.
“Ko koaua raoi?” E titiraki Lashia. E kukurei n te iango anne.
“Ngai naba!” e taku Ariana.
“Ngke naba,” e taku Tinana.
N te tai ae aki maan ao e moana tangina Liam. Ngke e onea ana taaibwa Tinana, e uota te bwai ni kaokao Lashia.
“Ko rabwa!” e taku Tinana.
N te bong are imwiina, ngke e tebokaki Liam, Lashia ao Ariana.a uota ana kunikai are e na bwainna. Iai tamneia maan aika a tikiraoi iaona! A uotia nakon Tinaia bwa e aonga n onea Liam.
“Kam rabwa!” e taku Tinaia.
A iangoi riki angaa ni ibuobuoki Lashia ao Ariana. A karaoa aia kainiwene ni katoa ingabong n akea tuangakiia. N tabetai a karaoa aia kainiwene naba Tinaia ao Tamana! Ao ngkana tain te katairiki, a buoka Tamaia n te umwa ni kuuka.
“Kam rabwa!” a taetae Tinaia ao Tamaia.
Ngkana e tang Liam, e kataia ni buokia Lashia bwa e na mwengaraoi. E taua ao ni kataetaea n te bwanaa ae maraara. E aki kona ni karabwarabwa moa ngkai Liam. Ma n te bong teuana e moangare nakon Lashia!
E manga wiingare nakoina Lashia. E kukurei ngkai e kona ni buoka mwanena ae uarereke ao tinana ma tamana naba!
Kamataata n te tamnei iroun Shawna J. C. Tenney