“Ti na Kaai ni Karaoa Aio,” Te Rao, Nobembwa 2023, 40– 41.
Ti na Kaai ni Karaoa Aio
E maaku Annie ni moani waaki n te Bootaki n Ataeinnaine.
E riki te karaki aei i Amerika.
E bubui baina n ana kunikai Annie. E kataia ni kakauongo nakoia taian taetae. Ma e namakina te nakonnanona, i biritona.
Te bong aio bon te bong are e na moana kaean te Bootaki n Ataeinnaine Annie. E na kaea te kiraati imwain bwaran te bootaki n toa. E tuangaki Annie irouia aomata bwa e na riai ni kukurei, ma, e bon maaku.
E taraa Tami, tarina ae ikawai riki. E a tia ni kaaina te Bootaki n Ataeinnaine Tami inanon teniua te ririki, ao e rangi ni kukurei iai. E aki toki n tutuanga Annie tamaroana. “Ane ana reke raorom aika a mwaiti,” e taku Tami. E kaokoro ma te Buraimwarii. Kanga taraan ae ko a ikawai riki.”
Ma bon tiaki aekakin tarina Annie. E tatangiria ni kakaitibo ma aomata aika a boou Tami, ao e rangi ni bebete irouna te iraorao ma aomata. E rangi n aki tataetae Annie ao n tangiria riki ni wareware ke n korotamnei nakon ae te marooro ma aomata.
Iai naba kairaa iroun Annie, ao e namakina te maama n aron taraakina. E kakabonganai kuriim aika a onoti, ake a ibuobuoki. Ma urauran mwiina ni kunna e bon tiku n aki bua.
Imwiin te bootaki n toa, E karauraua nakonakona Annie in kawai ni mwananga. “I aki kona n nakon te Bootaki n Ataeinnaine n te bong aei,” e tuanga Tinana ao Tami.
Tinana e taraa n raraoma. “I taku bwa ko rangi ni kukurei ibukin kaean te Bootaki n Ataeinnaine. Tera ae riki?”
“I aki kinaia ataeinnaine ake a ikawai riki.” E riinga ubuna Annie. “Ao ane a ngareakinai ngkana a noorai.”
E rabwata Annie Tinana. “Uringnga bwa e na bon mena naba ikekei Tami.”
“Tiaki aekakin Tami ngai,” e taku Annie. E taraa tarina. “Ko rangi ni bwaati n taetae nakoia aomata.”
“I ataia bwa e kangaanga kaean te kiraati ae boou,” e taetae Tami. “Ma tina kaai ni karaoa aio. I namakina te nano maroaa ngke I moan kaea te Bootaki n Ataeinnaine naba.”
Annie e karekea taraan Tami ma matana aika a toka. E rangi n taraa n ninikoria n taainako Tami! E a tia naba ni ira buakon te anene n ana reirei ao e kairiiri iai. E aki kakaraoi bwaai akanne Annie. E bon kataia irouna bwa e na aki ataaki arona.
“Ma ko aki kona ni mamaaku.” E taku Annie.
E wiingare Tami. “Eng I bon mamaaku! I maaku naba ngke I kataia n rin bwa kaain te anene. Ko ataia bwa tera ae I karaoia?”
E ioioa atuna Annie.
“I tataro ao ni karaoa au kabane ni kona. Ao I buokia naba ataei ake tabeman. A taraa ni mwaiti ibuakoia ae a maaku naba n ai arou. Buokaia aomata bwa a na ninikoria e ibuobuoki nakoiu n ninikoria.”
E iangoa anne Anne. E kona ni karaoa are e karaoia Tami ao ni buokia ataeinnaine tabeman n ana kiraati bwa a naaki maaku?
Ko kona n kaea te Bootaki n Ataeinnaine n te bong aei?” E titiraki Tinana.
E ikerake mwaaka Annie. Imwiina e katoutoua atuuna. E kona ni karaoia.
A kaai n nakonako Annie ao Tami nakon aia ruu kaain te Botaaki n Ataeinnaine. E taraia ataeinnaine ake tabeman Annie . Tabeman ibuakoia a taraa naba n nankonano n ai arona. Julie e minominota buraen irana ni baina ao e tenatena ukinbaina Erica.
E iangoia Annie bwa e na kangaa ni buokiia. E nako n tekateka irarikin Julie. “E nako nanom naba?” E wirikiriki Annie. “E na bon NAKORAOI.”
E wiingare Julie, ao ni ngare nakoina Annie. E a keerikaaki namakinan te maaku ngkai iroun Annie. Tao e bon rangi ni nakoraoi te mena n te Bootaki n Ataeinnaine.
Kamataata n te tamnei iroun Toby Newsome