“Tuoan te konabwai n Ira te Takakaro,” Te Rao, Nobembwa 2023, 30– 31.
Tutuon te Konabwai n Ira te Takakaro
E ataia Jared bwa e memena irarikina Iesu Kristo.
E riki te karaki aei i Buranti.
A katebetebea te booro Jared inanon te tabo n takakaro. A biribiri irarikina taan takakaro, aia kau ae tangitang iaon te timanti.
“Bwatinna nakoiu!” E wewete Gabriel.
Jared e angan Gabriel te booro ao e teimatoa ni biri. Imwiina e a manga anga te booro rikaaki Gabriel. Jared e karea kourun te booro.
SWOOSH!
E rin te booro!
“Tikiraoi, Jared,” e taetae ana tia kairiiri imwiin te takakaro. “Ko ataia, ai ti uoua te wiiki ngkai te tutuo ibukin te konabwai n te takakaro ibukin rinean te tiim”
E wiingare Jared. Bon ti tabeman taan takakaro ake a kaokaki n ira te tutuo aei ibukin te tiim.
E na karaoaki te tutuo n te Tabati,” e taetae ana tia kairiiri. E na kona n reke am tai iai?”
E buanako kukurein Jared.
“N te Taabati?” E titiraki Jared.
“Eng. Iai te kangaanga?”
E tabe n iangoia Jared. Aei ana tai n takakaro n te tiim ae rangi n tamaroa! Ma te Tabati bon ana tai n nakon taromauri ao ni kabanea ana iango iroun ana tia Kamaiu.
“Te Taabati bon te bong ae e onoti irou,” e taetae Jared. “N na marooro ma au karo iaon anne.”
N te tairiki anne, e tekateka Jared iaon ana kainiwene ma ana karo. E kakibarakea ana bwatiketibooro ngke e iango. “I rangi n tangiria n iira te tutuo ibukin te tiim,“ e tuanga Tinana ao Tamana. “Ma I aki tangiria ni karaoia n te Tabati. I ataia bwa e kakawaki riki te Atua nakon te bwatiketibooro.”
Tera ae ti kona ni karaoia bwa ti na ibuobuoki iai?” E titiraki Tinana.
E taua te booro i baina Jared. “Ti kona n tataro ni ikotaki?”
E katuka ana booro ni bwatiketi ao ni katorobubua ma Tinana ao Tamana. “Tamara are i Karawa,” e taku, “I rangi, rangi n tangiria ni tuoaki ibukin te tiim ni bwatiketibooro aei. Ma te tutuo e na boo n te Taabati! I ataia bwa te Tabati bon te bong ae I anga Nakoim. Tera ae N na kona ni karaoia?”
Imwiin te tataro, Jared e namakina e rau n nano .
“Tera am namakin?” E titiraki Tinana.
“I aki nakon te tutuo ngkana e na karaoaki n te Taabati,” e taku. “Ma I namakinna bwa e na bon Nakoraoi”
Uabong te bong imwiina, e karekea te imeeri tinan Jared. E taku bwa te tutuo e nang karaoaki n te Kaonobong!
E a kona n ira te tutuo Jared ao ni katabua te bong ae te tabati! E ataia bwa e ongo ana tataro Tamara are i Karawa.
Inanon uoua wiiki imwiina, e kabatiaa ana kataneiei Jared n te bwatiketibooro. Ngke e a roko te bong arei, e kabanea ana kona Jared. E kabirimwaaka imarenaia taan takakaro, reke ana rin aika a mwaiti, ao ni kaungaia kaain ana tiim.
“Taan takakaro aikai a na reitanako te tutuo n te konabwai ibukin te tiim, e taetae te tia kairiiri imwiin te moan raaun. “Taiaoka kakauongo nakon arami.”
E bukibuki mwanawan Jared. E wetea aran temanna te tia kairiiri. Ao imwiina temanna. Ao are imwiina. E namakina nanona Jared ibukin kan irakin te tiim bwa e moana ni bua.
Imwiina e a bane warekan taian ara iroun te tia kaira te takakaro. E aki weteaki aran Jared. Jared e naaki ira te mwaing nakon te kauoua n raaun n te tutuo .
E tekateka iaon te benti iakuun te tabo n takakaro Jared ao n taratara ana kau. E a tia ni mwakuri korakora. Ma e namakinna bwa ana mwakuri mwaaka bon akea nanona.
Ngke e anaia tinana, e ioiowa atuuna Jared. “I aki riki bwa kaain te tiim.”
E koonaki iroun Tinana. “I nanokawaki ngkai e aki nakoraoi are ti tangiria,” e taetae tinana.
E ikerake Jared. Ma imwiina, e roko n ana iango te rau.
“A aki nanakoraoi n taainako bwaai ake I tangiria,” e taku. “Ma e ataa au namakin raoi Iesu Kristo. E mena irarikiu.”
E wiingare tinana. “Eti ae ko taku! E atai ara namakin.”
E wiingare Jared. E bon nanokawaki, ma e namakina riki ataakina bwa ana Tia Kamaiu e oota n ana namakin. E ataia Jared bwa Iesu e na bon teimatoa n tangiria ao ni boutokaia.