“Jeorļo̧k Bōd Āinwōt Nipai,” Jera, Jān. 2024, 4–5.
Jeorļo̧k Bōd Āinwōt Nipai
Aisea eaar jab kōņaan illu wōt ippān Josh n̄an indeeo.
Bwebwenato in ekar bōk jikin ilo USA.
Aisea eaar ettōr im juurļo̧k bo̧o̧ļ eo n̄an rikkure eo m̧ōttan, Timothy. Eaar kalimjōke ilo an Timothy juur likļo̧k neen im juurļo̧k bo̧o̧ļ eo n̄an lowaan ook eo.
“Score!” Timothy ej lam̧ōj ke bo̧o̧ļ eo ej itaak ilo ook eo.
Aisea eaar m̧ōņōņō. Raar wiin ilo ikkure eo!
Ke ej etal jān meļaaj eo, eaar en̄jake m̧ōņōņō! Innām juon iaan ajri ro ilo tiim eo juon, Josh, eaar kūri juon āt enana.
Aisea eaar ilbōk im metak. Eaar jab jeļā en ba ta. Eaar kalimjōkļo̧k laļ im etetal kadikdik n̄an ippān rikkure ro m̧ōttan.
“Em̧ōj ad kōm̧m̧ane!” Timothy eaar ba. “Em̧m̧an pass eo am, Aisea.”
Ak Aisea eaar jab em̧m̧an an en̄jake. Jab ālkin ta eo Josh eaar jiro̧n̄ļo̧k! Eaar en̄jake būrom̧ōj im illu.
Ilo aolepen raan eo, Aisea eaar en̄jake juon men eo ej kaddoiki. Eaar jab em̧m̧an Josh ippān kiiō.
Bon̄en eo, Aisea eaar jijjōt ippān baam̧le eo an ilo iien riiti jeje ko rekwojarjar. Eaar kajjieon̄ ron̄jake an sister eo an riit. Ak eaar jab maron̄ bōjrak an ļōmņak kōn ta eo Josh ekar ba.
Aisea eaar kalimjōkļo̧k peij ko ilo Bok in Mormon eo an. Ekar bōjrak ilo juon eoon ilo 1 Nipai. Ej kōn juon iien ļōm̧aro jein Nipai raar jab jouj n̄an e.
“Im ālkin men kein, iaar m̧ool ilo jeorļo̧k aer bōd,” eoon eo ej ba.*
Nipai eaar jeorļo̧k an ļōm̧aro jein bōd? Aisea eaar ļōmņak. Jekdoon ālkin aer kar lukkuun nana?
Aisea eaar kōļmenļo̧kjeņ kōn Josh. Eaar jab kōņaan dāpij en̄jake eo an enana ņae Josh. Eaar 10 iiō dettan!
Aisea eaar kōņaan āinwōt Nipai. E emaron̄ jeorļo̧k an Josh bōd, āinwōt an kar Nipai jeorļo̧k an ļōm̧aro jein bōd. Im ke Josh ebar ba juon men enana, e naaj kajjitōk ippān bwe en jab.
Eaar en̄jake m̧ōņōņō im aenōm̧m̧an itulowa. Āinwōt n̄e Jetōb Kwojarjar ekar ba, “Kwoj kōm̧m̧ane men eo ejim̧we.”
“Aisea, ta eo kwaar ekkatak jān eoon kein? Jinen eaar kajjitōk.
Aisea ekar reilōn̄tak. “Joļo̧k bōd, ikar riiti juon eoon eoktak,” ekar ba. Eaar ba n̄an baam̧le eo an ta eo ekar waļo̧k ilo soccer eo.
M̧ama im Baba raar atbakwoj Aisea. Joļo̧k bōd bwe Josh ekar nana n̄an kwe,” Baba eaar ba. “Men eo ekar ba ejjab m̧ool. Ak EM̧M̧AN wōt n̄an en̄jake metak jān menin.”
Aisea eaar etōn̄dikdik. “Kom̧m̧ool. Ilo juon iien eaetok iaar lukkuun illu. Ak kiiō ke em̧ōj aō riiti eoon kein, ijjab kōņaan illu ippān. Ikōņaan jeorļo̧k an bōd. Im ekar em̧m̧anļo̧k aō en̄jake!”
“Lukkuun em̧m̧an!” M̧am̧a eaar bar ettōn̄ dikdik. “Jeorļo̧k bōd ejjab pidodo aolep iien. Ak kojim̧we. Ewōr tokjān.”
Aisea eaar kalimjōkļo̧k jeje ko an rekwojarjar. Rekar jipan̄ e! Men eo eddo ekar jako. Būruōn ekar en̄jake m̧ōņōņō im obrak kōn aenōm̧m̧an.
Kōmeļeļe ko jān Alyssa Tallent