“Jeje ko Rekwojarjar an Sami,” Jera, Jān. 2024, 10–11.
Jeje ko Rekwojarjar an Sami
Sami ekar bar kōņaan riit.
Bwebwenato in ekar bōk jikin ilo Bolivia.
Baba eaar kabbo̧ke pein ke ej m̧ōj nokon in jota eo an baam̧le. “Ewōr juon aō ļōmņak kōn juon an baam̧le in kōttōpar,” eaar ba “Jen riiti Bok in Mormon ippān doon aolep raan.”
Ļaddik ro jein Sami, Andrés im Juan, rekar em̧m̧ajidjid kōn ettōn̄ dikdik eļap kōn ļōmņak eo.
“EM̧M̧AN!” Andrés eaar ba.
Sami eaar bar m̧ōņōņō. Bōtaab ekar keememej juon men. Ekar kajutak pein. “Ijaje kilen riit. Elmen aō naaj jipan̄?”
Juan ekar lelōn̄ļo̧k aeran. “Komaron̄ ron̄jake wōt.”
Ļaddik ro jein Sami em̧ōj aer jeļā riit kadede. Ak ļalem wōt an Sami iiō. Ejan̄in de ekkatak kilen riit.
“Ak ikōņaan bar jipan̄!” Sami eaar ba ilo an kajememe.
M̧am̧a eaar atbokwoje Sami. “Im konaaj” eaar ba. “Aolep iien ej lōn̄ juon iaļ n̄an kōm̧m̧ani men ko Anij ej ba jān kōm̧m̧ani.”
Bon̄en eo juon, baam̧le eo an Sami raar koba ippān doon n̄an riiti Bok in Mormon. Raar aolep boktok jeje ko rekwojarjar make aer, ijelo̧kin Sami. M̧am̧a eaar leļo̧k n̄an e juon pija in bwebwenato ko ilo Bok in Mormon.
“Kojjab maron̄ riit naan ko kiiō. Ak komaron̄ riiti pija ko,” liin ear ba kōn etōn̄dikdik.
Sami ej jibwe bok eo turin. Kiiō emaron̄ riiti kōn ainikien eļļaaj ippān baam̧le eo an!
Raar aolep kajjojo riit. Sami eaar kalimjōk pija ko me rej kwaļo̧k bwebwenato eo. Ke ej iien eo an, eaar jiron̄ļo̧k ro jet ta eo eaar loi ilo pija ko. Eaar kwaļo̧k elōn̄ kōmeļeļe ko jon̄an wōt an maron̄.
Ke raan ko rej mootļo̧k, Sami eaar kōņaan wōt riit eļapļo̧k. M̧am̧a eaar katakini ainikien kajjojo leta ko. Innām eaar kwaļo̧k kilen an ņa ainikien naan ko. Allōn̄ ko tokālik, Sami eaar jab aikuji bok in pija eo. Ijelo̧kin, eaar riiti naan eo āliktata ilo kajjojo eoon baam̧le eo an ej riit. M̧am̧a eaar riiti naan eo jinoin, im Sami eaar bar baļo̧k.
Ilo jinoin, raar jidik jidik riit. Tōparļo̧k āliktata in kajjojo jebta ekar bōk juon iien eaetok. Andrés im Juan rekar kūtōtō n̄e ej iien an Sami. Ak rej riit āinwōt juon baam̧le wōt.
Jidik kōn jidik, ej ļapļo̧k an Sami riit. Ej riiti juon naan juon eoon, innām ruo naan, innām jilu. Innām eaar jinō riit juon likio in eoon!
Turin jem̧ļo̧k in kōttōpar eo aer, Sami emaron̄ make riit jejjo̧ eoon. An riit ekar em̧m̧anļo̧k. An iakwe Bok in Mormon eaar bar eddōkļo̧k.
Āliktata, baam̧le eo an Sami rekar kam̧ōj Bok in Mormon. Ekar bōk ruo iiō! Kiio jiljilimjuon an Sami iiō, im eaar em̧m̧an an ekkatak riit.
“Jeraam̧m̧an!” Baba ekar ba. “Em̧ōj ad kōm̧m̧ane!”
Sami eaar m̧ōņōņō kōn baam̧le eo an. Eaar jipan̄ er kam̧ōj aer riiti Bok in Mormon!
Juan eaar atbokwoje Sami. “Enaaj ta kōttōpar eo am̧ n̄an iiō kane ruo m̧aanwaj?”
Sami eaar ettōn̄ dikdik. Eaar jutak aetok im ba, “Inaaj bar riiti Bok in Mormon!”
Kōm̧eļeļe ko jān Melissa Manwill Kashiwagi