“Kōttōppar eo n̄an Riit,” Jera, Jān. 2024, 36–37.
Kōttōpar eo n̄an Riit
Anders eaar dike riiti ilo ainikien eļļaaj.
Bwebwenato in ekar bōk jikin ilo USA.
Anders eaar ron̄jake an leddik eo jein riit ilo iien ekkatak jeje ko rekwojarjar an baam̧le. Eaar kajjieon̄ ļoore ilo tablet eo an. Bōtaab ekar pen n̄an mije naan ko.
Ekar baj wōt pen an Anders riit. IIō eo ļo̧k, eaar jeļā ke ewōr an dyslexia Dyslexia ekar juon m̧o̧jņo̧ eo me ekōm̧m̧an bwe en pen riit. Kōmālij eo an ej kōkārereik naan im leta ko, im mejen ej reito reitak ilo peij eo n̄e ej kajjieon̄ riit.
Ej m̧ōj an leddik eo jein riiti eoon eo an, im ļaddik eo jein ekar riiti eo juon. Ak Anders ekar jab riit. Ejjab em̧m̧an ippān riiti ilo ainikien eļļaaj. Kakilep naan ko ilo tablet eo an ekar jipan̄. Ak ekar dike an raaļo̧k im kaipokpok an riit. Eaar kōm̧m̧an bujin bōd. Eaar aikuj in jerbal eļapļo̧k n̄an juon men me āinwōt epidodo n̄an ro jet.
Ke ej m̧ōj aer riit, baam̧le eo an Anders rekar alooje juon pija. Ekar kōn būrookraam̧ eo an Ajri ro im Jodikdik ro.
“Karōk kōttōbar ko am̧ me enaaj kaddōkļo̧k im kapan̄ kwe,” Elder Gong ekar ba ilo pija in. “Kappukōt jeļā ko rekāāl, kōņaan, im kapāāl ko.”*
Anders eaar kōļmenļo̧kjeņ kōn kōttōpar eo emaron̄ karōk e. Bōlen emaron̄ ekkatak kilen kōmat kukiij. Ak em̧m̧anļo̧k an ikkure soccer.
Innām eaar reilo̧k n̄an Bok in Mormon eo ioon tebōļ eo. Jeļā ļo̧k riit ekar jab juon kōttōpar eo āinwōt enkar limo. Ak ekar kōņaan bwe en maron̄ riiti jeje ko rekwojarjar ippān baam̧le eo an.
“Ijeļā ta eo ikōņaan bwe en aō kōttōpar,” eaar jiron̄ jemān.
“Ta ņe?” Jemān ekar kajjitōk
Anders eaar jibwetok Bok in Mormon eo. “Ikōņaan riiti juon eoon ilo Bok in Mormon ilo juon ainikien eļļaaj aolep raan.”
“Ej juon kōttōpar em̧m̧an,” Baba eaar ba. “N̄āāt kokōņaan jinoe?”
“Kiiō!”
Anders eaar etal n̄an ruum̧ eo an im kilōke kōjem eo. Eaar jab kōņaan bwe ren ron̄ ainikien. Innām ekar kōpeļļo̧k Bok in Mormon eo an. Eaar kabōd jet iaan naan ko, ak ekar bōk wōt juon minit n̄an riiti eoon eo jinoin. Ekar jab lukkuun nana, eaar ļōmņak.
Aolep raan Anders ej riiti juon eoon. Ekar pen! Ekar jab en̄jake an em̧m̧anļo̧k, barāinwōt. Ak ekar jerbale wōt.
Innām juon raan ilo jikuuļ, rikaki eo an ear ba, “Wow! Ijjab tōmak kōn m̧ōkaj in am ekkatak.”
Anders eaar reilōn̄ļo̧k jān homework eo an. “M̧ool ke?”
Liin ekar em̧ajidjid. “Eļapļo̧k am̧ em̧m̧anļo̧k.”
Anders eaar reilaļļo̧k n̄an naan ko ilo pepa eo an. Rekar pidodoļo̧k n̄an riiti jān kar m̧okta. Kōttōpar eo an n̄an riiti jeje ko rekwojarjar ekar bar jipan̄ e ekkatak ilo jikuuļ.
Ke eaar roltok n̄an m̧weo, eaar ettōr lōn̄lak n̄an riiti jeje ko rekwojarjar. Ke ej kalimjōk peij eo, naan ko raar kaipokpok wōt. Ak ekar pidodo lak jeļā ta ko rej ba.
Anders ekar m̧ōņōņō kōn iien an baam̧le eo ekkatak jān jeje ko rekwojarjar joteen eo.
“Baba, aa,” eaar ba. “Imaron̄ ke jipan̄ eok riit rainin?”
Baba eaar ettōn̄ dikdik. “Em̧m̧an ippa!
Anders eaar anōk wōt ilo an būratōr im sister eo an kajjojo riit eoon. Ke ej iien eo an, eaar jidikdik riiti eoon eo n̄an lukkun lale bwe en jejjōt aolep naan. Ālkin an m̧ōj an riit, eaar reilōn̄ļo̧k. Aolep rekar ettōn̄dikdik n̄an e.
Jekdoon n̄e ejjab juon ririit eo emōkade, Anders eaar m̧ōņōņō kōn e make. Eaar jeļā bwe n̄e ej ļap an jerbal, Jemedwōj Ilan̄ enaaj pād ijo n̄an jipan̄ e aolep iien.
Kōmeļeļe ko jān Kelly Smith