“Im̧we kōn Pitāto Jep eo,” Jera, Jān. 2024, 14–15.
Im̧we kōn Pitāto Jep eo
Ekar wōr an Maya en̄jake ekajoor n̄an etale ta eo m̧ōn̄ā eo ej kōm̧m̧an jen ta.
Bwebwenato in ekar bōk jikin ilo USA.
Maya eaar m̧wijit strawberry ko im likūt loan booļ in jaļat in leen wōjke eo. M̧ōn̄ā eo ennotata ippan ej leen wōjke. Em̧m̧an ippān kōļar ko remeram. Im ejamin kar inepeta kōn an m̧ōn̄āiki!
Elōn̄ m̧ōn̄ā ko Maya ej kadōki. Ej aikuj kōjparoke kōnke m̧ōn̄āik m̧ōn̄ā ko rebwōd enaaj kōm̧m̧an an lukkuun nan̄inmij. Ke ej dik, eaar idaak milik in kau im kar pen an emenono. Eaar aikuj etal n̄an aujpitōl. Eaar jab kōņaan bwe en bar waļo̧k.
Jet iien ekar pen n̄an m̧ōn̄ā men ko rooktak jān ro m̧ōttan im baam̧le eo an. Bōtaab eaar jeļā ke eaorōk n̄an kōjparoke.
Maya eaar ineek jaļat in leen wōjke eo n̄an kauntōr eo. “Epojak jaļat e.”
Jemān ej reilo̧k jān ainbat eo ej poktak e. “Em̧m̧an! Ejjab to jān kiiō rilotok ro ad renaaj jede.”
Maya eaar ron̄ kōļļaļļal ilo kōjem̧ eo im etal im kōpeļļo̧ke. Baam̧le eo an Johnson im mijenede ro rej ettōn̄ dikdik ļo̧k n̄an e jān m̧aan kōjem eo. Baam̧le eo an Johnson rej ro m̧ōttaer. Maya eaar m̧ōņōņō in lo er. Eaar kōpeļļo̧k kōjem eo n̄an aolep bwe ren deļo̧n̄tok.
Ke rej kōttar n̄an kejota, juon iaan mijenede ro ej kwaļo̧k juon jibain n̄an Maya. Eaar jab maron̄ jeļā elmen an ļein jibwetok jāān eo jān lojiln̄in!
Ejjab to ekar iien m̧ōn̄ā. Būratōr Johnson eaar jar. Innām aolep rekar kanne pileij ko aer.
Ke ej iien n̄an Maya, eaar bōk jidik jaļet in leen wōjke. Eaar etal jān jet m̧ōn̄ā ko ejeļā ke ewōr milik ie.
Innām eaar jibwe tok juon pāāk killep in jeb im lutōke ioon pileij eo an. Rekar āinwōt ejjab jeb rōt ko em̧ōj an kar m̧ōn̄ā moktaļo̧k. Eaar likūt juon ilo lon̄iin.
Bōtaab ke ej jino meme, eaar en̄jake juon men ekajoor. Lale ej kōm̧m̧an jān ta, juon ainikien eaar ba ilo ļōmņak eo an.
Maya eaar bōjrak an meme. Eaar kalimjōk laajrak ta eo m̧ōn̄ā eo ej kōm̧m̧an jān e ilo pāāk eo. Ewōr milik ilo jeb ko!
Maya eaar bōk juon pepa im m̧ōkajin em̧m̧ōjeļo̧k jeb eo. Mejān ekar obrak kōn kōmjaļaaļ. Eaar jab wōrōn̄iļo̧k. Ak en ke waļo̧k juon men enana?
“M̧am̧a! Baba!” Maya eaar ettōrļo̧k n̄an ippān jinen im jemān. “Iaar illik jep ewōr milik ie iloan lo̧n̄iu!”
“Em̧man wōt.” M̧am̧a eaar ba. “Jen etal im ebbōk uno.” Maya eaar wōrōn̄ļo̧k uno eo jinen ej leļo̧k im kar lukkuun bōk kutuwōn. Baba eaar jibwe Maya ke ej kōttar an uno eo jerbal.
Ālkin jejjo̧ minit, M̧am̧a eaar ba, “Ej et am̧ en̄jake?”
Maya eļakkar en̄jake mijak. Bōtaab ejjeļo̧k men eaar bwōd ilo ānbwinin. “Ij ļōmņak EM̧M̧AN. Ak imaron̄ ke bōk juon kōjeraam̧m̧an?”
“Aaet,” Baba eaar ba. “Jen kajjitōk ippān mijenede ro n̄an jipan̄.”
Maya eaar jijōt ilo jea eo, im Baba im mijenede ro raar likūt peier ioon bōran. Raar kōjeraam̧m̧an e bwe en pād ilo kōjparok. Maya eaar en̄jake an meļļak. Aolep en̄jake ko an renana rekar jako.
“Elmen am̧ kar jeļā ke kwon etale m̧ōn̄ā eo ej kōm̧m̧an jān ta ilo pāāk in jeb eo?” Jinen eaar kajjitōk.
“Ikar en̄jake kakōl jān Jetōb Kwojarjar!”
Jemān ekar lukkuun atbokwoje. “Im̧ōņōņō bwe kwaar ron̄jake.”
Maya eaar em̧ajidjid. Ekar jeļā bwe Jemedwōj Ilan̄ ej iakwe im kea kake e.
Kōmeļeļe ko jān Chrisanne Serafin