Komaron̄ Kōm̧m̧an Oktak

Jān Būreejtōn Susan H. Porter

Būreejtōn eo Eutiej an Būraimere

Jān juon intōrpiu ippān Olivia Kitterman im Rachel Peterson.

Jemedwōj Ilan̄ im Jisōs Kraist eļap aer iakwe eok. Kōnke Rej iakwe eok, Er rej karuwaineneik eok n̄an kōm̧m̧ani bujen ko, ak kallim̧ur ko, Ippāer. Kwoj jino kōm̧m̧ani kallim̧ur ko ilo iien eo kwoj peptaij.

Ālkin am̧ peptaij, kwoj bōk menin letok eo an Jetōb Kwojarjar. Kwoj erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. M̧eļeļein bwe Jemedwōj Ilan̄ ej lōke eok n̄an kōjparok bujen ko am̧.

Ta komaron̄ kōm̧m̧ane āinwōt juon uwaan Kabun̄ in n̄an kōjparok bujen ko am̧? Komaron̄ karuwaineneik ro jet n̄an Būraimere. Komaron̄ jijōt turin juon eo ekāāl im jipan̄ er ekkatak al ko. Komaron̄ jipan̄ ilo m̧akūtkūt ko an Būraimere. Komaron̄ bar juon ritōl ilo baam̧le eo am̧. Komaron̄ kajjitōk bwe en wōr jar an baam̧le ak kwaļo̧k ta eo kwaar ekkatak ilo Būraimere.

Ālkin am̧ bōk Jetōb Kwojarjar, komaron̄ loe aikuj ko an ro jet ilo juon wāween eo ekāāl. Komaron̄ jar n̄an Jemedwōj Ilan̄ im ba, “Jipan̄ eō jeļā wōn imaron̄ jipan̄e rainin.” Innām Jetōb Kwojarjar emaron̄ jipan̄ eok kile juon eo ej jijōt make iaan ak jiron̄ eok n̄an ba iakwe n̄an juon m̧ōttam̧. Komaron̄ kōm̧m̧an juon oktak eļap n̄e kwoj kāālet n̄an jipan̄ ro jet. Kwoj rijerbal in Kabun̄ eo an Jemedwōj Ilan̄!

Jemedwōj Ilan̄ ej iakwe eok. Ej kōņaan bwe kwon tōl kōn waanjon̄ak jabdewōt jikin kwoj etal ie bwe kwon maron̄ boktok ro jet n̄an epaake tok E. Ak kwojjab aikuj kōm̧m̧ane make iaam̧. Jemedwōj Ilan̄ im Jisōs Kraist reban bōjrak aer jipan̄ eok. Komaron̄ kōjatdikdik kōnke kojeļā Er rej pād ibbam̧. Komaron̄ pijaiklo̧k an Jisōs jutak turim aolep iien.