“Pade eo Ejejjōt an Jim̧m̧a,” Jera, Jān. 2024, 18–19.

Pade eo Ejejjōt an Jim̧m̧a

Jān David Dickson

(Pedped ioon juon bwebwenato em̧ool)

Ak n̄e ejjab bōjrak an wōt?

Bwebwenato in ekar bōk jikin ilo Samoa.

Kōdo ko remarok, im nana rej pād ilan̄. Alex eaar reilōn̄ļo̧k im lali.

BOOM!

Elōn̄ļo̧k jouruur. Wōt ko rekilep, reddo rej wōtļo̧k aolep jikin.

Alex eaar kajibolooli bōran. Menin eaar jab em̧m̧an. Ejjab em̧m̧an n̄an jidik. Jet iien, ilo Samoa, emaron̄ wōt ium̧win elōn̄ raan im ejjab bōjrak. Bōtaab eaar kōņaan bwe raan in kōļak eo an jim̧m̧a en jejjōt!

Alex eaar etal n̄an ruum̧ eo an im bukwelōlō ilo peet eo an.

Eaar ba, “Jema Ilan̄.” “Joij im kōm̧m̧an bwe wōt in en jako ilo iien pade in kōļak eo an Jim̧m̧a ilju. Em̧ōj am kadede ba armej ren itok. Ilo etan Jisōs Kraist, amen.”

Ke Alex ej jutak, eaar lo M̧am̧a im Baba rej jutak ilo kōjem̧ eo an. Raar ettōn̄ dikdik.

“Ij kōjatdikdik kwojjab kea ke kōm kar ron̄ am̧ jar” M̧am̧a eaar ba.

Alex eaar ettōn̄ dikdik. “Ej EM̧M̧AN Wōt. Ikōņaan bwe ilju en jejjōt im jenolo̧k n̄an Jim̧m̧a. Enaaj oktak n̄e jenaaj aikuj in pād wōt loan em̧. Eban lōn̄ rūūm̧ in ad tuuj!”

Baba eaar keeņ aeran Alex. “Jekdoon ta mejatoto eo, Jim̧m̧a enaaj jeļā ewi jon̄an am̧ iakwe.”

Jibbon̄ōn eo tok juon, M̧am̧a im Baba raar kajjitōk bwe Alex en jar ilo jar an baam̧le. Ekar baj ļap wōt an wōt. Im ekar baj wōt wōt im āinwōt eban bōjrak.

“Joij kōjeraam̧m̧an wōt in bwe en jako n̄an iien pade eo,” eaar ba. “Im joij kōjeraam̧m̧an kōm aolep bwe kōmin m̧ōņōņō ilo iien in. Eļaptata Jim̧m̧a!”

Alex eaar lale lan̄ aolepen jibbōn̄en eo. Ilo juon iien aetok, ejjeļo̧k oktak. Innem juon men ekabwilōn̄lōn̄ ekar waļo̧k.

“Lale!” Alex eaar ekelo̧k. “Juon likio in būļū ilan̄!” Baam̧le eo an raar ettōr n̄an nam̧ōj. Kōdo ko rekar jino jakoļo̧k.

Ilo jejjo̧ awa, aolepen kōdo eo rekar jako! Bar dān dikdik ko ilaļ rekar m̧ōrāļo̧k. Alex eaar kōkairiir n̄an kainōknōk ijo nam̧ōj. Jim̧m̧a im rilotok ro jet renaaj pād ijin ejjab to jān kio.

Ke Jim̧m̧a ej tōpartok ijo, eaar ilbōk. Eaar kalimjōk ļait ko, bōļeak ko rekōļarļar, im aolep rilotok ro. “Aolep men relukuun aibojooj,” eaar ba. Kom lukkuun em̧m̧ool!”

Pade eo ekar limo āinwōt an kar Alex kōtmene. Raar tuuj kōn al ko rem̧m̧antata ippān Jim̧m̧a. M̧ōn̄ā ko renno—eļaptata bilawe waini tōn̄al eo. Jon̄an Alex eaar al ippan Jim̧m̧a.

M̧ōttan eo em̧m̧antata, kar iien eo eiien Siva Taualuga. Eb in aolep armej eo eaorōktata ilo raan eo ej eb kake. Im, Aaet, kar Jim̧m̧a!

Jim̧m̧a eaar jutak im eb, innām eaar reilo̧k n̄an Alex. “Itok im kobatok ippa, Alex!” Jim̧m̧a ekar ikkūr. Alex eaar irruj im eb turin Jim̧m̧a. Ejjab to ro jet rekar bar eb.

Jim̧m̧a eaar malļo̧k im atbakwoje Alex. “Kwaar kōm̧m̧an bwe in en̄jake aō aorōk rainin,” Jim̧m̧a eaar ba. “Ekar jejjōt pade in kōļak in.”

Ālkin an m̧ōj pade eo, Alex eaar reilōn̄ļo̧k n̄an lan̄. Kōdo ko remijjel im kilmeej raar bar waļo̧k. Ekar bar jino an wōtļo̧k wōt. Bōtaab iien in, Alex eaar jab kea. Ejeļā bwe Jemedwōj Ilan̄ eaar jipan̄ mejatoto eo bween em̧m̧an toon wōt an kōm̧m̧an pade eo an Jim̧m̧a.

“Kam̧oolol Eok kōn mejatoto eo em̧m̧an,” Alex eaar jar. “Im kam̧oolol Eok kōn juon jim̧m̧a em̧m̧an.”