“Ana Bootaki Papa ae Moan te Nakoraoi,” Te Rao, Tianuare. 2024, 18– 19.

Ana Bootaki Papa ae Moan te Nakoraoi

Iroun David Dickson

(E boboto i aon te karaki ae koaua)

Ai tera ngkana e aki toki te karau?

E riki te karaki aei i Samoa.

E roo, man uanangnang ni kaota te nang ni karau i karawa. E tabe n taratarai Alex.

BOOM!

E ruoruo man rurungaa te baa. E a bwaka te karau ae moan te korakora ni kabuta aon te aba.

E ioioa atuuna Alex. E aki raoiroi aei E aki bati n tamaroa N tabetai, i Samoa, e kona ni kakarau inanon irabong ao e kangaanga tokina. Ma e tangira ana bootaki tibuna te unimwaane bwa e na rangi n nakoraoi!

E a nako n ana ruu Alex ao e katorobubua irarikin ana kainiwene.

“Tamara are i Karawa ae tangiraki,” e taku. “Taiaoka tai kabwakaa te karau n tain ana bootaki Papa nakon ningabong. Ti a kaman kanakoi taian beeba ni kakao. N aran Iesu Kristo, amen.

Ngke e teirake Alex, e noora Tinana ao Tamana n tei irarikin te mataroa. A wiwingare.

“Au kantaninga bwa ko aki tabe ngkai ti ongo mwanewen am tataro,” e taku Tinana.

E wiingare Alex. “Akea te Kaangaanga. I tii tangira kanoan te ingabong bwa e na rangi n onoti ibukin Papa. E aki kona n ae titebo ngkana ti bon kainanoia bwa tina tiku inanona. E na aki tau te tabo ibukin te mwaiee!”

E koonaki angan Alex iroun Tamana. “E aki kakawaki bwa e raoi ke e buaka kanoan te bong, ma e na ataia Papa bwa mwaitira tangirana iroum.”

N te ingabong are imwiina, a butiia Alex Tamana ao Tinana bwa e na anga te tataro n utu E bon teimatoa ni bwaka ni korakora te karau. Ao e teimatoa naba n taraa n ae na aki toki.

“Taiaoka kakabwaia te karau bwa e na aki bwaka n tain raoi te bootaki,” e taku. “Ao taiaoka kakabwaiaira ni kabane bwa ti na karekea te tai ae kakukurei. Ai moarara riki Papa!”

E tabe Alex ni mamatakuakina karawa ni kabanea te ingabong anne. N te tai ae maan, bon akea te bitaki. Ma imwiina iai te bwai ae kamiimi ae riki.

“Taraia!” E takarua Alex. “Te nang ae buru i karawa!” A biri n otinako ana utu nakon te katawanang i tinaniku. Ea moanna ni itiaki te nang.

Inanon tabeua te aoa, akea te nang! Aontano are e aoneinei aona e mwaauu n te tai aei. E kawaekoa Alex n nako ni katamaroa te katawanang itinaniku. Iaon kawaia n roko Papa ao tabeman iruwa.

Ngke e roko Papa ikekei, e bon rangi ni kubanako. E tarai taian taura, beeba ni katamaroa aika kirimatamata, ao iruwa ni kabane. “A rangi n tamaroa bwaai ni kabane,” e taku. “Kam rangi n rarabwa!”

E rangi ni kaunga te bootaki n aron are e kantaningaia Alex. E a boo atin te mwaiee ni kunan nako Papa are e mamate nanona iai. E oro kangkangin te amwarake—riki te baere te kariki ae karewe ae renganaki ma te ben. E reke naba ana tai n anene Alex ma Papa.

Te mwakoro ae te kabanea n tamaroa, e ngae n anne, ngke e a boo tain te Siva Taualuga. E aki toki ni kakaraoaki te mwaiee aei iroun te aomata ae te kabanea ni kakawaki n te bong anne. Ao, eang, anne bon Papa!

E teirake Papa ni mwaiee, ma ngkanne ao e a taraa Alex. “Nakomai raonai, Alex!” E wewete Papa. E kibarake Alex ao ni mwaiee irarikin Papa. N te tai ae waekoa ao a bane naba ni mwaiee aomata ni kabane.

E rara nako naano Papa bwa e na inga ma Alex. “Ko a tia ni karaoai bwa te aomata ae rangi ni kakawaki n te bong aei,” e taku Papa. “Aio bon te kabanea n nakoraoi ni bootaki ibukin te koronririki.”

Imwiin tokin te bootaki, e tararake Alex nako karawa. E a manga okira arona karawa are e roo man uanangnang. A moanna ni bwakaraki n te karau. Ma n te tai aei, e aki tabe iai Alex. E ataia bwa e a tia Tamara are i Karawa ni katamaroa tauan kanoan te bong n te tai ae bon tau maanna ibukin ana bootaki Papa.

“Ko rabwa ngkoe ae te Atua ibukin kanoan te bong ae moan te tamaroa,” e tataro Alex. “Ao ko rabwa Ngkoe ae te Atua ibukin Papa ae akea n ai arona.”