“Ana Boki ae Tabu Sami,” Te Rao, Tianuare. 2024, 10– 11.
Ana Boki ae Tabu Sami
E tangiria Sami bwa e na wareware naba.
E riki te karaki aei i Bolivia.
E uboi baina Papi n tokin te bootaki n utu n te tairiki. “Iai au iango ibukin ara kouru n ara utu,” e taku. “Ti na wareka ana Boki Moomon ni kabane ni katoa bong.”
Tarin Sami aika a ikawai, Andrés ao Juan, a katoutoui atuuia ma te moangare n aron te iango anne.
“Ngaia!” e taku Andrés.
E kukurei naba Sami. Ma ngkanne iai te bwai ae uringnga. E katea baina. “I babanga ni wareware. N na kanga n ibuobuoki?
E kakuia angana Juan. “Ko na tii ongora.”
Tarin Sami a kaman rabakau ni wareware. Ma Samii ai bon tibwa nimaua ana ririki. E tuai reireinna raoi ni wareware.
“Ma I kan ibuobuoki naba!” E taetae Sami ma te matabubuaka.
Mama e rabwata Sami. “Ao kona bon konaa,” e taku. “Iai te kawai n tainako ni karaoa are e tuangiia te Atua bwa ti na karaoia.”
Te tairiki are imwiina, a ikotaki ana utu Sami wareka ana Boki Moomon. A bane ni uotii aia Boki aika Tabu, ma tii Sami ae aki. Mama e anganna te boki n tamnei ae karaki man ana Boki Moomon.
“Ko tuai kona ni wareka te taeka. Ma ko kona ni warekii taian tamnei,” e taetae ma te moangare.
Sami e taua te boki ni kaania mangaia. Ngkai e a kona naba ni wareware ma ana utu!
A wareware temanna imwiin temanna. E tarai taian tamnei Sami are a kaota te karaki. Ngke e a roko n ana tai, e tuangiia ake tabeman te bwai are e nooria inanon te tamnei. E karakini rongorongo aika moan te mwaiti n aron are e konaa.
Ngke e nako te bong ma kanoana, e tangiria Sami ni kan wareware riki. E reireinaki iroun Mama aron tangin manin te reta teuana ma teuana. Ngkanne e kaotia nakoina bwa e na kanga ni katanga te taeka. Namwakaina ake imwiina, e aikoa manga kainnanoa te boki n tamnei Sami. Ma, e wareki kabanean taekan taian kibu ake a warekii ana utu. Mama e wareka te moan taeka, ao Sami e a manga atongnga imwiina.
N te moan ao a wareware ni karaurau. Ni karokoko n te kabanea ni mwakoro teuana ma teuana e anaa te tai ae mwaiti. Andrés ao Juan a ngira ngke e a roko n ana tai Sami. Ma a bon bane ni wareware n aron aia utu.
Teutana imwiin teutana, e a mwaiti riki ae warekia Sami. E wareka taekan teuana te kibu, imwiina uoua te taeka, imwiina teniua. Imwiina e moanna ni wareka te kibu ae bwanin!
Ngke a nang roko n tokin aia kouru, e a kona Sami ni warekii tabeua kiibu i bon irouna. E a moanna n tamaroa riki aron ana wareware Ana tangira ibukin ana Boki Moomon e rikirake naba.
N tokin te tai, e a bane warekan ana Boki Moomon irouia ana utu Sami. E anaa te maan ae uoua te ririki! Ngkai Sami ai itiua ana ririki, ao e a tia n reiakina aron te wareware raoi.
“Tekeraoi n ami tokanikai!” E taku Papi. “Ti a tia ni karaoia!”
E kukurei Sami ma ana utu. E buokiia bwa a na kabanea ni wareka ana Boki Moomon.
Juan e angan Sami te inga ae korakora. “Terana am kouru ibukin uoua te ririki aika ana roko?”
E wiingare Sami. E tei ni kabwakia ao e taku, “N na manga wareka riki ana Boki Moomon!”
Kamataata n te tamnei iroun Melissa Kashiwagi