“Te Nimatutu n Tain Booki aika Tabu,” Te Rao, Tianuare. 2024, 30–31.
Te Nimatutu n Tain Booki aika Tabu
E ngae ngke e rangi ni moantaai, e ataia Elvira bwa warekan booki aika tabu e bon materaoi.
Te karaki aei e riki i Norway.
E uti Elvira ni bwaanan Tamana. “Tain booki aika tabu,” e taku.
E tekateka iaon ana kainiwene ao e kaoi matana aika nimatutu. E bon roo tinaniku. Ao e mwaitoro! E aki tangiria Elvira bwa e na kitana ana kainiwene ae rang ni kamweengaraoi.
E taku Tinana bwa warekan booki aika tabu anne aron ae a na kona ni kinaa riki Iesu. Ma warekan booki aika tabu ni katoa moaningabong koraki e bon kangaanga!
E karaurau Elvira n rierake iaon te kaintamwarake ao n tekateka irarikin tarina ae ikawai, ae Sigrid, iaon te kaintekateka te kaauti. E koona te uninga ao ni mwanokaia inanoaan ana burangketi ae maraurau ma ni kamweengaraoi. Mwaanena inanon te ruu are teuana a waakina aia aonraain kiraati n te tieminari.
E a tang ana tareboon Tamana. E kaeka, ao a kaoti aia utu iaon te tikuriin. Ai tinana ae Liv e oneia ao n tauraoi n nako ni mwakuri. Ai tariia, ae Dorthea, e bon rin naba kunnikaina ni matu, n aron Elvira.
E kateitea baina Elvira nakoia rinanon te marooro n te witeo ao e waanna te aa ni kanimatu. A bon kakaraoa aia tai ibukin booki aika tabu ma ai tinaia ae Liv ao Dorthea. A maeka ni mwakoron Norway are te iterana aua te aoa raroana. E bon bebete nakoia ni kabane te wareware ni booki aika tabu ngkana iai aia kouru bwa a na tarebonia i bon imarenaia ibukin aia reitaki ni katoa bong. Ao Elvira e tangiria ni kan noora ai tarina!
Tabeua te miniti imwiina, raoia naba Tinaia n tareboon. “Mauri, ataeinnaine!” e taku. Iai mwanangana ibukin ana mwakuri n te wiiki aei, ma e bon tareboon ibukin ana tai te utu ibukin booki aika tabu.
A tataro. Ngkanne e kauka ana boki aika tabu Elvira. A bane ni ikotaki ni wareware n ana Boki Moomon. A bane n ikaruoruo te koraki ni warekii taian kibu.
E ongora Elvira ngke a wareware ake tabeman, ma e bon kangaanga ae a na uti matana. E a manga moan bwaka ni matu Sigrid iaon te kaintekateka te kaauti. E a koteaki iroun Elvira. Ma ngkanne iai te bwai teuana inanon te kibu ae katika ongoraana.
Ao I a noora te kai ae te biti, ae tei n ira bangakin te karaanga, ni karokoa te aroka are I tei i rarikina,” e taku Dorthea.*
“I ataa te karaki aei!” E taku Elvira. “Bon miin Riaai.” E a tia n noora tamnein te boki ae tabu n aron rongorongona. Iai te aroka ae rangi n tamaroa ma uaana ae mainaina, ao aomata a taua ni kamatoa te kai te biti bwa a na buokaki aonga n roko iai.
“Ko uringnga bwa aekakira aron te kai te biti?” e titiraki Tinana.
“Booki aika tabu?”
“Eti anne!” E taku Tamana. “E reirei Nibwaai imwiina bwa te kai te biti kanga ai aron ana taeka te Atua. N am iango ti na kanga n taua ni kamatoa te kai te biti n aroia aomata ni miin Riaai?”
“Ti taua ni kamatoa te kai te biti n te tai aei!” Elvira e tabeka ieta ana Boki Moomon. “Ni karekean te tai ibukin booki aika tabu.”
E katoutoua atuuna Tinana. Ngkana ti warekii koroboki aika tabu, ti namakina kaanra ma Iesu Kristo. N aroia aomata ake a kaan ma te kai ni kamaiu ngkana a taua ni kamatoa te kai te biti.”
Ngkai a tabe ni wareware, e iango Elvira i bon irouna ai angkoa are e taua ni kamatoa te kai te biti ao n nakonako ni kaineta te aroka ae moan te tamaroa. E aikoa namakina te nimatutu imwiina.
Imwiina e a roko aia tai ni mwananga. A riai n nako ni mwakuri ai tinana ae Liv ao Tinana. Ao Elvira, Sigrid, ao Dorthea a riai ni katauraoiia ibukin te reirei.
“Tiabo, ni kabane!” E kateitea baina Elvira ni kaboo nakoia ana utu iaon te tikuriin. “I tangiri ngkami!”
Ngke e biri rikaaki nako naano bwa e na katauraoia nakon te reirei, E namakina te abuee Elvira inanona. Ao tiaki ibukin ana burangketi ae maraurau ma ni kamweengaraoi. E ataia bwa te namakin are e abuee bon te Tamnei ae Raoiroi ae tuangnga bwa ana Boki Moomon e bon koaua. Bon te kawai ae nakoraoi ni waakina kanoan te bong!
Kamataata n te tamnei iroun Hector Borlasca