“Te Kai ni Kamaiu,” Te Rao, Tianuare 2024, 26–27.
Karaki man Booki Aika a Tabu
Te Kai ni Kamaiu
Kamataata n te tamnei iroun Andrew Bosley
Riaai bon te burabeti. E tuangnga te Atua bwa e na kairiia ana utu nakon te aba ni berita. Inanon mwanangaia, e miia taekan te aroka ae moan te tamaroa. E aranaki bwa te kai ni kamaiu.
Te aroka e unika te uanikai ae mainaina ma ni kangkang. E namakina te kukurei Riaai ngke e kanna. E tangiriia ana utu bwa a na kanna naba.
Riaai e noora naba te kai te biti are e na kairiko nakon te aroka. Aomata a kamatoatoa baia n taua te kai te biti bwa aonga n roko n te aroka ao ni kana uaana.
Te aroka inanon miin Riaai kanga ai aron ana tangira te Atua. Te kai te biti kanga ai aron booki aika tabu. Ngkana ti warekii booki aika tabu, ti namakina kaanra ma te Tama are i Karawa ao Iesu Kristo.