“Ko Kona ni Karaoa te Bitaki,” Te Rao, Tianuare 2024, 32.
Te Rao nakon te Rao
Ko Kona ni Karaoa te Bitaki
Man te intawiu ma Olivia Kitterman ao Rachel Peterson.
Tamara are i Karawa ao Iesu Kristo a rangi n tangiriko. Ibukina ngkai a tangiriko, A kaoko bwa ko na karaoi berita aika tabu, ke berita, ma Ngaiia. Ko moanna ni karaoi berita akanne ngkana ko bwabetitoaki.
Ngkana ko a tia ni bwabetitoaki, ko karekea te bwaintituaraoi ae te Tamnei ae Raoiroi. Ko a riki bwa te membwa n Ana Ekaretia Iesu Kristo Ibukiia Aika Itiaki ni Boong aika Kaitira. Nanon anne bwa e onimakiniko Tamara are i Karawa bwa ko na kawakin am berita aika tabu.
Tera ae ko kona ni karaoia ngkai te membwa n te Ekaretia ae bwanin am tai ni kawakinan am berita aika tabu? Ko kona ni butimwaaia tabeman nakon te Moanrinan. Ko kona n tekateka irarikin temanna are e boou ao ni buokiia n reireiniia te anene. Ko kona n ibuobuoki ma waaki ni kakukurei n te Moanrinan. Ko kona naba n riki bwa te tia kariiri n am utu. Ko kona ni bubuti ibukin karaoan te tataro n utu ke n tibwaua are ko a tia n reiakinna n te Moanrinan.
Imwiin reken te Tamnei ae Raoiroi, ko kona n noori kainnanoia tabeman n te anga ae boou. Ko kona n tataro nakon Tamara are i Karawa ao ni kangai, “Buokai bwa N na ataia antai ae N na kona ni buokiia n te bong aei.” Ngkanne e kona ni buokiko te Tamnei ae Raoiroi n noora temanna are e tekateka n tii ngaia ke e tuangko bwa ko na kamaura raoraom. Ko karaoa te bitaki ae korakora ngkana ko rineia bwa ko na buokiia tabeman. Ko mwakuri n aron ae te membwa n ana Ekaretia Tamara are i Karawa!
Tamara are i Karawa e tangiriko. E tangiriko bwa ko na kairiiri ma am katooto n te tabo are ko nako iai bwa ko aonga ni kairiia tabeman ni kaaniaki riki ma Ngaia. Ma ko aki riai ni karaoia n ti ngkoe. E bon aki kona n toki aia ibuobuoki Tamara are i Karawa ao Iesu Kristo ibukim. Ko bon kona n onimakiniko ibukina ngkai ko ataia bwa A mena irarikim. Ko kona n katamneia Iesu n am iango bwa e tei irarikim.