“Mga Higala nga Nagsunod kang Jesus,” Higala, Peb. 2024, 14–15.
Mga Higala nga Nagsunod kang Jesus
Si Saria wala magdahom sa pangutana ni Katy.
Kini nga istorya nahitabo sa Australia.
“Babay, Saria! Nasayod ko nga magmalamposon kaayo ka karong adlawa ,” miingon si Mama.
Milukso si Saria pagawas sa sakyanan. “Salamat!”
Karong adlawa gusto ni Saria nga dapiton ang iyang mga higala sa iyang bunyag. Gitabangan siya ni Mama nga magpraktis sa pagdapit nila samtang nagpadulong sa eskwelahan.
Si Saria milakaw dala ang paglukso paingon sa dako nga doble nga pultahan sa iyang klasehanan. Nag-eskwela siya sa usa ka Kristiyano nga eskwelahan. Nagpasabot kana nga silang tanan nagkat-on mahitungod ni Jesukristo bisan kon dili ang tanan nagsimba sa sama nga simbahan. Ang iyang titser nagbutang og lain-laing mga ngalan ni Jesus sa pultahan sa ilang klasehanan. Nagsulti kini og mga butang sama sa “Tigbuhat og Milagro” ug “Akong Dios.” Karong adlawa, nabantayan ni Saria ang usa nga nag-ingon “Tigtuman sa Saad.”
Mingisi si Saria tungod sa kahinam. Kon mabunyagan na siya, usa na usab siya ka tigtuman sa saad!
Sa pagpaniudto, mitapad si Saria nila ni Katy ug Jenny sa hagdanan sa gawas sa klasehanan. Samtang nagkaon sila, naghunahuna si Saira nga karon mao ang maayong panahon nga iyang buhaton ang iyang gipraktis.
Miginhawa og lawom si Saria. “Mabunyagan na ko sa dili madugay. Gusto ba ninyong motambong?”
“Nganong magpabunyag man ka karon?” Nangutana si Katy.
Gisulayan ni Saria sa paghinumdom ang mga butang nga iyang gipraktis kauban ni Mama. “Tungod kay gusto ko nga mohimo og pakigsaad. Ang pakigsaad mao ang usa ka saad uban sa Dios. Human ko mabunyagan, madawat nako ang gasa sa Espiritu Santo.”
Gikab-ot ni Katy ang iyang sandwich. “Gibunyagan ako sa gamayng bata pa ko.”
“Ako sab,” miingon si Jenny. “Nagtuo ko nga ang tanan gibunyagan sa dihang bata pa sila.”
Naglibog si Saria. Wala siya kahibalo unsa ang isulti.
Human sa klase, gisultihan ni Saria si Mama unsay nahitabo. “Nganong gibunyagan man sila si Katy ug Jenny sa dihang bata pa sila?”
Mitupad niya si Mama. “Ang ubang simbahan lahi og pamaagi. Sa ubang simbahan, ang mga bata bunyagan pinaagi sa pagbisbis nila og tubig. Apan kita nagtuo nga kon kita bunyagan, mohimo kita og sagrado nga pakigsaad. Ug kinahanglan nga anaa kita sa sakto nga edad aron makasabot sa mga saad nga atong himoon.”
Naghunahuna si Saria sa ubang mga kalainan nga iyang nabantayan didto sa eskwelahan. Ang iyang mga higala misimba sa daghang mga paagi nga lahi kay sa iyang naandan.
Gigakos siya ni Mama. “Maayo ang imong nahimo karong adlawa.”
Miarang-arang ang gibati ni Saria. Wala siya mahibalo kon unsaon sa pagtubag ang mga pangutana sa iyang mga higala, apan gihimo niya ang iyang labing maayo nga mahimo. Gusto gihapon niya nga dapiton sila sa iyang bunyag.
Sa pagkasunod adlaw, si Saria ug Katy nagkuyog padulong sa klase. Adunay nahulog nga dala si Katy, ug gipunit kini ni Saria para niya. Usa kadto ka kwentas nga adunay krus.
“Salamat!” Gikuha ni Katy ang kwentas. “Maguol gyod ko kon mawala ni. Magpahinumdom kini nako bahin ni Jesus.”
Mingisi si Saria ug iyang giisa ang iyang CTR nga singsing. “Kini usab magpahinumdom nako ni Jesus! Nagpasabot kini nga ‘pilia ang husto.’ Nagpahinumdom kini nako nga buhaton ang mga butang nga buhaton ni Jesus.”
“Ganahan ko ana,” miingon si Katy.
Si Saria ug Katy miabot sa pultahan sa ilang klasehanan. Si Katy mitudlo sa ngalan ni Jesus nga anaa sa pultahan nga nag-ingon “Tighimo og Agianan.”
“Kana ang akong paborito!” Miingon si Katy.
“Ganahan pud ko ana.”
Usa ka malipayon nga pagbati mipuno sa dughan ni Saria. Ang iyang titser nagsulti niya nga ang “Tighimo og Agianan” nagpasabot nga si Jesus mihimo og usa ka paagi aron mahitabo ang mga butang. Si Jesus mihimo og paagi alang kang Saria aron makighigala sa mga bata gikan sa lain-laing mga simbahan! Aduna silay mga kalahian, apan adunay usa ka butang nga parehas. Silang tanan naghigugma ni Jesus ug gusto nga mosunod Kaniya. Nasayod si Saria nga nakahimo kadto ni Jesus nga malipayon.
Mga paghulagway pinaagi ni Violet Lemay