Tinuod ba nga mga Higala?

Ni Alissa Holyoak

(Gibase sa usa ka tinuod nga istorya)

Si Henry dili gusto nga mag-inusara na usab.

Kini nga istorya nahitabo sa USA.

alt text

“Oy, dali tan-awa kini,” si Darren miingon ni Henry. “Kataw-anan kini!”

Gibati og kabalaka si Henry. Lain na usab nga bidyo.

Milingkod siya tupad ni Darren ug Drake diha sa sopa. Nangatawa sila sa bidyo, apan si Henry gusto nga mouk-ok ug motago ngadto sa mga kutson aron dili siya makadungog sa daotan nga mga pulong.

Sa pagkahuman gayod sa bidyo, si Henry nagdali og barog. “Manggawas ta ug magbisikleta.”

“Unya na,” miingon si Drake. Si Darren nagsige og scroll sa iyang cellphone.

Nanghupaw si Henry ug milingkod og balik samtang si Darren nagsige og tuslok sa salida.

Sa dihang si Henry nagbisikleta pauli pagkahuman, naghunahuna siya mahitungod sa tanang uban nga higayon nga siya dili mahimutang kauban ni Darren ug Drake. Sama sa dihang moistorya sila og dili maayong mga komedya sa eskwelahan. O nangawat og mga mansanas gikan sa kang Mr. Garcia nga punoan.

Tingali kinahanglan ko nga makig-istorya ni Mama, naghunahuna si Henry. Apan unsaon naman lang kon moingon siya nga dili na siya pwede nga mokuyog ni Darren ug Drake? Dayon mag-inusara na siya. Pag-usab.

Si Mama nag-andam sa lamesa sa dihang misulod si Henry. “Oy, kumusta ang imong adlaw?” nangutana siya.

Mikibo si Henry. Milingkod sila alang sa panihapon, ug si Mama misulti og pag-ampo. Giukay ni Henry ang iyang sabaw nga wala gani mokaon og gamay.

“Aduna bay nahitabo sa balay ni Darren karon?” Nangutana si Mama.

Gibati ni Henry nga dili mahimutang. Dili siya gusto nga mosulti niya sa tanan mahitungod ni Darren ug Drake. Apan tingali siya sultihan niya og gamay. “Ang gibuhat ra namo kay nagtan-aw og mga bidyo. Ganahan ko nga magbisikleta, apan si Darren ug Drake magsige lang og ingon nga dili.”

“Aduna bay dili maayo sa mga bidyo?” nangutana siya.

Gikulbaan si Henry. Kinahanglan ba siya nga motug-an niya? Dili siya makasulti og bisan unsa mahitungod sa daotan nga mga pulong. Dili mahimo nga mag-inusara siya pag-usab. “Wala ko mobati nga mora og moistorya karon.”

Miginhawa og lawom si Mama. “Nakahibalo ko nga ang pagbalhin dinhi lisod. Malipayon kaayo ka sa dihang nahimo nimo nga mga higala si Darren ug Drake. Apan naglaom ko nga dili sila mopugos nimo sa paghimo o pagtan-aw og butang nga daotan. Ang tinuod nga mga higala motabang nimo sa paghimo sa sakto.”

Miduko si Henry. “Si Darren ug Drake mga tinuod nako nga higala.”

“Nan, kon mao, ilang respetohon ang imong mga desisyon. Bisan kon moingon ka og dili.”

Sa balay ni Darren pagkasunod adlaw, ang mga pulong nga “tinuod ba nga mga higala” nagpabilin sa hunahuna ni Henry.

“Tan-awa kining bag-o nga bidyo,” miingon si Darren.

“Dili,” miingon si Henry.

Si Darren ug Drake mitutok kaniya.

“Dili na ko motan-aw,” miingon siya, mas kusog og gamay niining higayona. “Dili ko ganahan kon unsay gipabati niini nako.”

“Ayaw pagbinata ,” miingon si Drake.

Nangatawa si Darren ug Drake. Nagsugod sila sa pagpanungog ni Henry mahitungod kon giunsa pagpamula kanunay sa iyang nawong kon sila mopakita niya og mga bidyo o kon mangomedya sila sa eskwelahan.

Kini ba ang buhaton sa tinuod nga mga higala? Naghunahuna si Henry.

Mibarog siya gikan sa sopa. “Mosakay ko sa akong bisikleta. Mahimo kamong mokuyog kon gusto ninyo.”

“Dili,” miingon si Darren. “Magpabilin lang mi dinhi.”

Migawas si Henry nga nag-inusara. Sa pagsira gayod sa pultahan sa iyang likod, iyang naamgohan nga ang dili maayong pagbati sa iyang tiyan nawala. Gibati hinuon niya ang kagaan ug kakalma.

Dayon nakaamgo siya og usa pa ka butang. Wala siya mag-inusara. Ang Espiritu Santo kauban niya. Si Henry naguol gihapon mahitungod ni Darren ug Drake. Apan ang Espiritu Santo misulti niya nga siya mihimo sa saktong pagpili. Nagpahiyom, gikuha niya ang iyang bisikleta ug misakay pauli sa balay.

alt text

Istorya nga naa sa PDF

Mga paghulagway pinaagi ni Matt Smith