Ang Akong Bag-o nga Amigo

Ni Sam R., edad 11, Illinois, USA

Sa miaging tuig, naghimo ko og tumong alang sa programa sa Kabataan ug Kabatan-onan nga maghimo og bag-o nga mga higala. Lisod kadto tungod kay nailhan na nako ang tanan sa akong grado sukad pa sa kindergarten. Apan niining tuiga sa ikalima nga grado, miapil ko sa programa nga gitawag og “Tigsuporta nga mga Amigo [Peer Buddies].” Sa Peer Buddies, ang mga naa sa ikalima nga grado motrabaho kauban sa mas manghod nga gagmayng bata nga adunay mga kakulangan sa pagsabot o hinay sa pagsabot.

Sa unang adlaw sa Peer Buddies, gipares ko sa usa ka gamayng bata nga ginganlan og Carter.^* Dili kaayo siya moistorya, apan dihadiha dayon ganahan siya nga magdula sa scooter. Nagkuha ko og usa, ug nagsugod siya sa paggukod nako. Nagpadagan ko sa scooter ug nagpadakop niya sa matag higayon. Sa dihang oras na aron molakaw, ang gusto nako nga buhaton mao ang pagbalik niana nga gym nga magduwa uban ni Carter.

Sa dihang oras na usab alang sa Peer Buddies, milakaw ko padulong sa gym. Sa dihang si Carter nakakita nako nagsugod siya sa paglukso-lukso pababaw ug paubos. Kana nga higayon dako kaayo og kahulogan ngari nako. Nagpasabot kadto nga siya akong amigo sama nga ako iyahang amigo.

Si hari Benjamin miingon diha sa Basahon ni Mormon nga kon kita moalagad sa uban, nag-alagad kita sa Manluluwas. Ang Mosiah 2:17 nag-ingon, “Ug tan-awa, ako mosulti kaninyo niini nga mga butang nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”

Bation kaayo nako ang kalipay kon nangalagad ko ni Carter. Apan mas maayo pa gayod ang akong bation kon akong hunahunaon nga sa matag higayon nga nangalagad ko ni Carter, ako nag-alagad ni Jesus. Mapasalamaton ako nga ang programa sa Kabataan ug Kabatan-onan motabang nako nga makahimo ug makalihok sa mga tumong, ug nga kita makadawat og mga panalangin gikan sa paghimo niadtong mga tumong—sama sa pagkakaplag og bag-ong mga higala!