Higala ngadto sa Higala

Pagpabilin nga Lig-ong Magkauban

Ni Elder Kazuhiko Yamashita

Emeritus nga Kinatibuk-ang Awtoridad nga Seventy

Gikan sa usa ka interbiyo ni Diana Evelyn Nielson ug Olivia Kitterman.

Paghulagway pinaagi ni Ola Szpunar

Nagpuyo ko sa Japan samtang nagtubo. Ang akong pamilya sakop sa Budhista nga relihiyon, sama sa daghang pamilya didto. Usa ka adlaw, nakahimamat ko og mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw. Duna koy espesyal nga pagbati mahitungod kanila. Gusto kong mahisama kanila.

Sa dihang mipasakop ko sa Simbahan, usa lang ka lain nga estudyante sa akong eskwelahan ang miyembro sa Simbahan. Ang pagkahimong mao rang usa nga miyembro sa Simbahan lisod gayod. Pipila sa akong mga higala sa eskwelahan mihimo og daotan nga mga pagpili, ug gusto nila nga ako mohimo usab sa samang mga butang. Nakigbisog ko sa pagpili sa matarong.

Miundang ko sa pagsimba sulod sa upat ka bulan. Apan matag Dominggo, ang akong mga higala sa simbahan motawag nako ug mangutana, “Kumusta man ka?” Nakatabang kini kanako. Usa ka buntag ako adunay kusog nga pagbati. Kahibalo ko nga gikinahanglan nga moadto ko sa simbahan nianang adlawa. Busa miadto ko. Sukad nianang adlawa, wala na gayod ako moundang sa pag-adto sa simbahan. Midesisyon ko nga magpabilin sa dalan sa pakigsaad.

Kon nagpuyo ka sa usa ka dapit nga walay daghan nga miyembro sa Simbahan, mingaw ang pagbati. Ang paghimo og maayo nga mga higala lisod. Ang pag-inusara makapahimong lisod sa pagsunod sa ebanghelyo. Apan makaangkon ka og imong kaugalingong pagpamatuod nga makatabang nimo nga magpabilin nga lig-on. Nakat-onan usab nako nga ang pagkaadunay mga higala sa simbahan aron makasuporta nimo makatabang gayod.

Kon mobati ka og kamingaw, tutoki ang pagsunod ni Jesukristo. Padayon sa pagtuon sa mga kasulatan, sa pag-ampo, ug pag-adto sa simbahan. Mobati ka nga nakuhaan ang kamingaw tungod kay ang Dios anaa uban kanimo.