“Usa ka Malipayong Lunar nga Bag-ong Tuig,” Higala, Peb. 2024, 30–31.
Usa ka Malipayong Lunar nga Bag-ong Tuig
Mas daghan ang atong nahibaloan mahitungod sa atong pamilya, mahimo kita nga mas lig-on.
Kini nga istorya nahitabo sa Malaysia.
Nakadungog si Claire sa isda nga nagpiti-piti sa kusina samtang nakigdula siya sa iyang manghod nga babaye. Samtang si Mama ug Papa nagluto og panihapon alang sa Lunar nga Bag-ong Tuig, si Claire ug Chloe nagpakaaron-ingnon nga mao ang dragon sa kasaulogan.
Si Chloe nagtingsi sa dihang si Claire nag-undak sa tiil palibot sa iyang kwarto nagsul-ob sa iyang dragon nga maskara ug pula nga t-shirt. Ang tanan nagsul-ob og pula karon. Sa Lunar nga Bag-ong Tuig, ang pula nagpasabot nga ikaw magmalipayon ug lig-on. Ganahan si Claire sa mga tradisyon sa iyang pamilya sa Lunar nga Bag-ong Tuig!
“Ma, makig-istorya ba kita ni Lola ug Lolo karon?” Nangutana si Claire sa dihang si Chloe miadto sa higdaanan aron matulog og kadiyot. Kasagaran magsaulog sila kauban si Lola ug Lolo. Apan nagpuyo na sila sa lain nga nasod karon.
“Oo. Tawagan nato sila inig ka human sa panihapon,” miingon si Mama. Gitrapohan niya ang iyang mga kamot sa iyang pula nga apron. “Ganahan ka ba nga motabang nako sa paghimo og cookies?”
Mitando si Claire ug mikatkat sa lingkoranan duol sa lamesa. Mainampingon siya nga mibuak og mga itlog ngadto sa dako nga panaksan.
Samtang ang cookies giluto, si Claire mitabang ni Papa sa pag-andam sa lamesa. Gipagawas nila ang espesyal nga mga plato alang sa holiday nga adunay nindot nga mga pattern niini. Dayon gibutang ni Claire sa lamesa ang mga litrato ni Lola, Lolo, ug uban pa nga mga sakop sa pamilya. Ang pagbutang sa mga litrato makatabang nga mabati nga mora og magkauban silang tanan.
Sa wala madugay ang kusina nanimaho na nga sama sa buttery cookies. Panahon na aron mangaon! Si Claire, Chloe, ug ang ilang mga ginikanan naglingkod libot sa lamesa.
Si Claire ang misulti sa pag-ampo. “Salamat Kanimo sa lain nga tuig nga makauban ang akong pamilya.” Human ang tanan miingon og amen, si Claire nagbutang og pilit nga gibola nga kan-on sa iyang ba-ba ug mipahiyom. Lami kaayo kadto!
Pagkahuman sa panihapon, si Papa mikuha og duha ka pula nga sobre. Kini lain pa nga tradisyon. Kini nagpasabot og maayo nga swerte sa bag-ong tuig. “Usa alang ni Claire ug usa alang ni Chloe,” miingon si Papa. Giuyog ni Claire ang sobre duol sa iyang dunggan. Iyang gipaminaw ang mga sensilyo nga ningkagay sa sulod.
“Salamat,” miingon si Claire sa iyang mga ginikanan. “Karon pwede na ba kitang motawag ni Lola ug Lolo?”
“Siyempre!” Miingon si Papa. Iyang gipahimutang ang cellphone sa lamesa, ug ang mapahiyomon nga mga nawong ni Lola ug Lolo milukop sa screen. Mikaway si Claire ug Chloe.
“Kumusta, Lola! Kumusta, Lolo!” Miingon si Claire. “Gimingaw na kaayo mi ninyo!”
“Gimingaw usab kami ninyo. Kumusta mo?” Nangutana si Lola. Si Claire nakig-istorya nila og dugay kaayo.
Human si Claire nakig-istorya ni Lola ug Lolo, si Mama nangutana nila mahitungod sa mga tawo nga wala mailhi ni Claire.
“Ma, kinsa kadto nga mga tawo?” Nangutana si Claire human sila manamilit ni Lola ug Lolo.
“Sila ang pipila sa mga sakop sa atong pamilya. Akong gihibaloan ang ilang mga ngalan ug mga istorya aron maapil nako sila sa atong kasaysayan sa pamilya,” miingon si Mama.
Naghunahuna si Claire mahitungod niana. “Unsa ang kasaysayan sa pamilya?”
“Kini mao ang pagkat-on nato mahitungod sa tanan sa atong pamilya,” miingon si Papa samtang si Chloe mipasabak kaniya. “Mas daghan ang atong nahibaloan mahitungod sa atong pamilya, mahimo kita nga mas lig-on.”
Mitando si Claire. “Mahimo ba nga sultihan ko nimo sa mga istorya?”
“Siyempre!” Si Mama mikawhat sa lamesa ug mipunit sa album sa mga litrato sa pamilya. Mitan-aw siya sa usa ka karaan nga litrato nga itom ug puti [black and white]. “Kini ang amahan sa lolo ni Papa. Nabuhi siya dugay na kaayo nga panahon kaniadto. Apan mabati nato nga duol kaniya kon mahibaloan nato ang mahitungod sa iyang kinabuhi.”
Si Claire mitan-aw sa mga litrato samtang si Mama ug Papa nagsulti niya og mga istorya. Samtang naminaw siya, gibati niya ang kalipay. Dili kinahanglan nga naa siya kanunay sa duol sa iyang pamilya aron mabati ang ilang gugma. Mipahiyom siya. Nindot kaayo kadto nga Lunar nga Bag-ong Tuig.
Paghulagway pinaagi ni Hannah Li