E Maiu Iesu Kristo

Iroun Beretitenti Henry B. Eyring

Kauoman ni Kauntira n te Moan Beretitentii

Anaaki man “Tamneina E na Mena Iroumi,” Riaona, Meei 2018, 86–89; ao “E a Uti,” Riaona, Eberi. 2013, 4–5.

Te tai aei n te ririki e buokira ni kauringa ana karea te Tia Kamaiu ao Utina man te ruanimate.

I tei ma kainnabau te taina itinanikun te nne ni mate i Ierutarem. I nanona, ti nora te kaintekateka te atibu n raraa te o.

Ma e roko te tamnei teuana n au iango. I iangoa Maria n te ruanimate ae akea kaina. E tang ibukina bwa e a tia ni mate te Tia Kamaiu. E aki ataia bwa e mena ia rabwatana.

I mwiina, “e rairaki nako buki, ao e noora Iesu n tei, ao e aki ataia bwa bon Iesu” (Ioane 20:14). E taku Maria n ana iango bwa Ngaia te tia ununiki.

“E taku nakoina Iesu, Maria” (Ioane 20:16). Ngkai e a ataia Maria ae bon Ngaia. E ataia bwa E a tia n uti.

Ibukina bwa e tokanikai i aon te mate Iesu Kristo, ni kabane natin Tamara are i Karawa ake a bungiaki nakon te aonaaba a na manga uti n rabwataia ae e na aki kona ni mate.

I karabwa Tamara are i Karawa ibukin ana bwai n tangira Ana Rikitemana ae Tangiraki. I kakaitau ngkai I ataia bwa E karaoa te Mwakuri ni Kamaiu ibukin ara bure ao ni Mangauti. I kakoaua bwa Iesu Kristo bon te Kristo ae uti, ara Tia Kamaiu, ao ara banna ni katoto ae kororaoi.

Karakin te Wiiira n te Itita

Korei taian mronron ao katoka te moan mronron i aon ake tabeua. Kabwangabwanga nuukana ao kanimwi raoi n te biin ke te kaibiti. Ngkanne kaminoa te mronron are mai eta ni karakina rongorongon te Itita.

Karakin te Itita

E roko Iesu i Ierutarem n Tabatin te Bwaam (taraa Mareko 11:7–11).
E anganiia ana reirei te toa Iesu (taraa Mataio 26:26–28).
E tataro Iesu n te Onaroka i Ketetemwane (taraa Mareko 14:32–36).
E mate Iesu ibukira i aon te kaibangaki (taraa Ruka 23:46).
E wene rabwatana n te ruanimate i nanon teniua te bong (taraa Mataio 27:59–64).
E a manga maiu Iesu. Ao E maiu n te bong aei. (Taraa Mataio 28:6–9.)