“Te Moaaine ma Bun ni Kiokio,” Te Rao, Maati 2024, 4–5.
Te Moaaine ma Bun ni Kiokio
“E taekin baikai Iesu Kristo i nanon koroboki aika a tabu,” e taku Tamau.
E riki te karaki aei i USA.
Niiman kiokio aika a babobo buraeia a tararake n taraa Clara. Peep, peep, peep!
Ni katoa te tiburing a kabooi kiokio ana utu Clara bwa a na kaikawaiia. N te bong aei e buoka Tamana ni uotiia nakon mweengaia bwa a na maeka ma aia moa ake tabeman.
Te kawai are a buti i aona e bon tabukibuki. Ma e taua te bwaoki ni kiokio ni kamatoa Clara i aon rangana. E karaurau ni kamanana temanna mai ibuakoia ma tabon baina. E bon rangi n maraurau!
Ngke a roko ni mweengaia Clara ma Tamana, a rianna nakon te auti ni moa mai bukin aia auti. Aia auti mooa bon te auti ae uarereke are a bane ni maeka iai aia moaine ao a karaoi ngaoia.
“Te moaine raa ae tina katikui kiokio irarikina?” E titiraki Tamana.
E taratara nako Clara . Temanna te moaaine e rikoi uteute nakon ngaona. Te uteute e karika te ngao ae kamwengaraoi ibukiia kiokio aika a boou. Tao e na bon riki bwa te tina ni moaaine ae tamaroa.
“Aio,” e taku Clara, ni kotea te moaaine.
E karaurau Tamau n tabeki kiokio ni kaotinakoi man te bwaoki ao e katikui irarikin te moaaine. E taraa te kiokio te moaaine e taraa te kiokio. E tabeki baina, ao n te tai ae waekoa ao akea bwa e a bua te kiokio!
“E nakea? E mweengaraoi te kiokio?” E titiraki Clara.
E katoutoua atuuna Tamana. “Taraia.”
E kaotinakoa atuuna te kiokio mai iaan buraen te moaaine.
“Bukin tera e karaoa anne te moaaine?” E titiraki Clara.
“Bwa e kamanoa te kiokio,” e kaeka Tamana. “E na kamanoa ao ni kaabueea iaan baina.”
Clara e buoka Tamana ni karuoi kiokio ake tabeman irarikin tinaia te moaine ae boou. E tabeka baina te moaine n ikotiia ni kabane nakoina.
“Ko ataia, e taetae ibukin aio Iesu Kristo ni koroboki aika a tabu,” E taku Tamana.
“Ko koaua raoi?” E titiraki Clara. “Tera ae E taekinna?”
“N na kaotia nakoim.”
A nakon aia auti Clara ao Tamana. E kaotinakoa ana boki ae tabu Tamana. I mwiina e a waaki ni warekia.
“Ai iraua au tai n ikoikotingkami n aron te moaaine ngkana e ikoikotiia natina i aan baina, ngkana kam rairinanomi man okirai ma nanomi ni koaua.”*
E iangoia kiokio n tatabemaniia iaan buraen te moaaine Clara. “Nanona e ikoikotiira n ai aron te moaaine Iesu ni ikotiia kiokio iaan baina?” E titiraki Clara.
“E koaua anne,” e kaeka Tamana. “E kamanoira, n ai aron te moaaine ni kawakiniia bunna ni kamanoiia. Ma E kamanoira riki man ae mwaiti riki nakon te mwaitoro. E ataia ngkana ti maraki ke n aoraki ke n nanokawaki. E anganiira te rau ao e karaui nanora. E tabeaianga ibukira.”
Te ingabong are imwiina, e kamwarakeia ana moaaine Clara ma bunna aika a boou. E uringa are e warekia Tamana nakoina man koroboki aika a tabu. E moangare ngke e iangoa Iesu. E ataia bwa E tangiria ao e tabeaianga ibukina, n ai aron te moaaine n tabeaianga ibukiia kiokio.
Kamatata n te korotamnei iroun Assia Ieradi