“Te Itita ae e na Uringaki,” Te Rao Maati 2024, 14–15.
Te Itita ae e na Uringaki
E namakina ana tangira Iesu Jonas ngkai e anene.
E riki te karaki aei i Finland.
E ngarengare Jonas ngkai e kabo birimwaaka ma tarina nakon te ruu ni katangaina ni mweengana ibukin te kai n utu n te tairiki. E teimatoa n aroka boin te tiibu ae umunaki ae kangkang n te katairiki n tain te Itita. Ao e kona n teimatoa ni katoonga te pasha ae karewerewe, ni katein aia Itita n te taonanimwi.
I mwiin tekatekaia n aki karongoao te utu, e teiraki, tarin Jonas are te ikawai ae Tristan.
“Kukurei n te Itita,!” E taku Tristan. E waakina aia kainutu ni mweengaia n te tairiki ma te anene ao te tataro. I mwiina e a roko tain aia burokuraem n te anene ae onoti. A tia ni katauraoa te kuna ae a na tibwaian taekan Iesu Kristo.
E katang kitaa Tristan,e karaua ni katanga karaina nako te kitaa ni waebuan baina. I mwiina e katanga te biano tarina ae Einar. A kakamwakuri tabonibaina i aona. Tinana, Tamana ao tarin Jonas ake tabeman a katanga naba kunaia. E kan ongongora Jonas aia katangitang ana utu.
N tokin te tai ai ana tai Jonas. E ikerake ni karina angina ao e a waaki n anene.
“Iai taai aika I kaririaki iai bwa N na karaoi rinerine aika kairua, ma I kataia ni kakauongo ngkai e wirikiriki te bwana ae uarereke, ‘kam na Itangitangiri n aron ae tangiri ngkami Iesu.’”*
Inanon ana tai n anene Jonas, e kaonaki nanona n te tangira. A onrake matana n rannimata ni kukurei. Ai aron ae e tuanga Jonas te Tamnei ae Raoiroi bwa a tangiriira Tamara are i Karawa ao Iesu.
“Kam rarabwa ni kabane ibukin tibwauaan ami tarena,” e taetae te Tamaia. E taua i eta te tamnei. E kaota tamenin Iesu Kristo ni katorobubua ao n tataro irarikin te aroka. “Antai ae ataia bwa tera ae riki n te tamnei aei?”
E katea baina Jonas. “E tataro Iesu i Ketetemwane.”
E katoutoua atuuna Tamana. “Eng. Anne te tai are e namakina iai marakira ni kabane ma rawawatara.”
“E nakon te Onaroka are i Keketemwane i mwain ae E mate,” e taku Tinaia. “I mwiin matena, E a manga uti. Aio bon mwakoron ni kabane Ana Mwakuri ni Kamaiu. E karaoi ni kabane aikai Iesu ibukina bwa E tangiriira.”
E kamaiua Tinau te witeo ni kaota te moan Itita. Ngke e moti te tamnei, a bane n aki karongoaa n te tai ae uarereke. E a manga namakina naba aia tangira Tamara are i Karawa ao Iesu Kristo Jonas.
“Ngkai ai bon tain ara waaki ni kakukurei?” E titiraki Jonas.
E teirake Tinana man ana kaintekateka ao e nakon te kaebineti. “Eng! Jonas, ko kona n buokai?”
A kaotinakoa te kanim, te tati, ao bwariko ni beebwa n ana maekatiin te Ekaretia Jonas ao tinana. A kamaenakoi i aon te timanti. I mwiina e katoaia n anganiia aia tienoo ae onoti ibukin te Itita Tinaia. “Ti na karaoa tamnein Iesu Kristo i nanon ara tienoo ibukin te Itita.”
E tekateka Jonas iaon te timanti ao e kauka ana boki ni koroboki.
E anaa ana been Tamaia bwa e na koroboki n ana tienoo. “Irarikin ami tamnei, kam na korea te bwai ae kam na karaoia n iriira Tamara are i Karawa ao Iesu bwa kam aonga ni kona n riki n ai aroia.”
E raibaea teuana te maekatiin Jonas. E kunea tamnein Iesu Kristo ngke e wiingare.
E koreia ni kanakoa Jonas ao e kanimmwa i nuukan baan ana tienoo. E iangoa taekan te tangira ni kabane ake e a tia n namakin mai iroun te Tia Kamaiu n te bong arei. Imwiina e koreia, “N na iriira Tamara are i Karawa ao Iesu n ongongo irouia Tamau ao Tinau ao n ibuobuoki n taian mwakuri nako. N na tatangiriia riki tariu.” E taua i eta ni kaotia nakon Tinana. E wareka te bwai are e koreia tinana ao e moangare.
E na bon ururinga te Itita aio Jonas n te tai ae maan. E namakina ana tangira Iesu Kristo ngkana e anene ao e reiakina rongorongona. Ao e namakina ana tangira Iesu ngkai e kataia n riki n ai Arona.
A bon rangi n tangira Jonas Tamara are i Karawa ao Iesu Kristo. Ao e tatangiriia naba Jonas.
Kamataata n te tamnei iroun Steliyana Doneva