“Te Onimaki Teutana,” Te Rao, Maati 2024, iteraniba 30–31.
Te Onimaki Teutana
Iai ana kangaanga Jacob—e aki toki ni kakan matu!
E riki te karaki aei i Brazil.
“Jacob, ko ata te reke?” Mrs. E titiraki Lelis.
E kaurei matana Jacob ao e tabeka atuuna man ana taibora. A bane n taraia raona n reirei. E taraia naba ana tia reirei. E namakina te bwainrang. E a manga matuunako naba n te kiraati!
“Kabwara au bure, Mrs. Lelis,” e taku. “Ko kona ni manga taekina riki te titiraki?”
“Eng. Ma taiaoka tai manga matu n te kiraati.”
E kakomakiia rikaaki i nanon ana kaintekateka. “Ngaia, ma’am.”
E a tibwa roko n ana reirei ae boou Jacob tabeua te wiiki n nako. E tangiria n reireinaki, ao raona n reirei a rang tikiraoi. Ma iai teuana te kangaanga—e a bon kakan matu naba n tainako! E rangi n raroanako ana reirei ae boou, ngaia are e kakautimwaaka bwa e aonga n roko i aon te tai.
N te moan tai, e bon beebete bwa e na kakauongo raoi n te kiraati. Ma e rikirake ni kangaanga ao ni matoatoa riki. N tabetai e a rangi ni kua Jacob ao e a matuunako.
Te bong are imwiina, e tuatua te mataniwi n te reirei bwa e kan kaitibo ma Jacob ao ana karo. E moangare ao e butimwaaia nakon ana aobiti.
“I rangi ni kukurei ngkai kam roko,” e taku. “Jacob bon te teei ae rangi n tamaroa. Ma ana tia reirei e taku bwa e botu n ana kiraati. N tabetai e iangoi bwaai tabeua, ao e taraa n rangi ni kua. “Iai ana kanganga?”
E katoua atuuna tinana. “E mwakuri korakora Jacob bwa e na kona n roko n te reirei ikai, ma e rangi n raroa ma ara auti. E bon riai ni kauti mwaaka ni katoabong. Ngaia are e kakanimatu n ana kiraati ni katoa ingabong.”
“O, bon ti ngaia anne?” e taku te mataniwi. “Ko riai ni kataa te kobee! Kabwaka teutana te kobee n niman Jacob bwa e rang korakora ni katoa ingabong. Anne e na teimatoa ni kauta matana.”
E un Jacob. “Ma ti aki ninima te koobe n ara utu, ma’am.”
E taraa n aki oota te mataniwi. “E na bon kangaanga iroum bwa ko na atatai ngkana ko teimatoa ni mamatu. Ko bon riai n iangoa anne.”
Ngke a kiitana ana aobiti te mataniwi, e a bon mengo ana iango Jacob. E tangiria ni kanakoraoa ana kekeiaki n te reirei, ma e tangiria naba ni kawakina te tua.
Te tairiki anne, a wareka taekan tuan te Mauri ana utu n koroboki aika a tabu.
Ngke e a roko n ana tai Jacob, e warekia, “Ao ni kabane aomata aika itiaki ake a uringnga n kawakina ao ni karaoi taeka aikai a na kunea te wanawana ao kaubwain te rabakau ae korakora. Ao a na biri ao n aki kua, ao a na nakonako ao n aki mamaara.”*
Ngkanne e a rio ana iango!
E teiraki man ana kaintekateka. “N onean mwiin te koobe, N na kabongana au onimaki teutana!”
“Tera ae ko nanonna?” e titiraki tamana.
E moangare Jacob. “Ni katoa ingabong i mwain te kaingabong, ti na tataro ao ti na butiia Tamara are i Karawa bwa e na kakabwaiaai bwa I aonga n aki namakina te nimatutu. Ara tataro a na riki bwa te onimaki teutana!”
A moangare naba Tinana ao Tamana. “Taraan ae e na rangi n tamaroa te iango anne!” E taku Tamana.
Te ingabong are i mwiina, a katorobubua n tataro aia utu bwa Jacob e na anganaki te korakora bwa e aonga n teimatoa n taratara. A manga karaoia naba n te bong are imwiina. Ao te bong are imwina. Ni katoa tairiki, Jacob e kataia ni moantaai ni matu naba. Ao ni katoa ingabong ana utu Jacob iai aia onimaki bwa Tamara are i Karawa e na buokia.
I nanon te tai, aia onimaki are teutana e mwakuri. E a kona n uti ana iango Jacob ni kabwanina te bong! E kaekaaki aia tataro iroun te Atua. Ao e ataia Jacob bwa E kakatonga irouna ngkai e kawakina tuan te Mauri.
“Ko tauraoi nakon te kiraati, Jacob?” Mrs. Lelis e titiraki n te ingabong teuana ngke e rianna i nanon ana umwa n reirei.
E katoua atuuna Jacob ma te moangare i ubuna. E a tia ni karekea ana onimaki teutana imwain te reirei. E a tauraoi nakon bwaai ni kabane!
Tamnei ni kamatata iroun Raquel Martin