“Usa ka Mas Maayo nga Batasan,” Higala, Abril 2024, 10–11.
Usa ka Mas Maayo nga Batasan
Sa Primary, akong nakat-onan nga ang ngalan sa Ginoo espesyal.
Kini nga istorya nahitabo sa USA.
Nagsugod kini sa four square [upat ka kuwadrado].
Ang four square usa ka dula nga dulaon sa ubang bata gawas sa eskwelahan atol sa oras nga tingpahulay. Upat ka magdudula ang magbarog sa kuwadrado ug magpauntol og bola sa usag usa. Kon ang bola dili nila maigo sa kuwadrado sa lain nga magdudula, kinahanglan nilang mopahawa sa dula.
Nakuyawan ko sa unang higayon nga ako nagdula. Apan maayo kaayo ko niini. Lingaw kaayo kadto!
Dayon ang bola sa batang babaye sa atbang nako wala makaigo sa kuwadrado. Iyang gisulti ang ngalan sa Langitnong amahan ug mikatawa. “Maayo nga pagkadula, Gwen,” miingon siya. “Matangtang na ko!”
Akong gigunitan og maayo ang bola. Iyang gigamit ang ngalan sa Ginoo sa pagpasipala karon lang! Kadto sama sa pagpamalikas.
Apan morag walay bisan usa ang naghunahuna nga daotan kadto. Silang tanan nangatawa, nga mora ba og kini kataw-anan o nindot.
Kami mipadayon sa pagdula. Dayon kini nahitabo na usab. May usa ka tawo nga ang bola wala makaigo sa kuwadrado ug misulti sa ngalan sa Langitnong Amahan nga sama sa pulong sa pagpamalikas.
Pipila ka minuto human niadto, wala usab maigo sa akong bola ang kuwadrado. Ug sama sa uban, akong gigamit ang ngalan sa Ginoo sa pagpasipala. Nangatawa ang mga bata ug mi-apir nako samtang mibalik ko sa linya aron magdula og usab.
Human niana, magdula na ko og foursquare matag adlaw . . . ug mosulti sa ngalan sa Ginoo og kadaghan ug mas makadaghan pa.
Usa ka adlaw ang akong higala nga si Abby miapil sa dula. Gipasa niya ang bola ngari nako. Wala nako maigo niini ang kuwadrado ug misulti sa ngalan sa Langitnong Amahan.
Si Abby nakapamilok sa kakurat. “Wala ka gayod maanad sa pagsulti niana.”
Husto siya. Sa panimalay ug sa Primary, akong nakat-onan nga ang ngalan sa Ginoo espesyal ug dili nato kini angayan nga gamiton sa pagpamalikas o pagtiawtiaw. Ug kana mao ang akong gibuhat—sa pipila ka semana! Mibati ako og kaluya.
Human sa eskwela, akong gipangita si Mama sa iyang opisina.
“Kumusta anak!” miingon siya.
Misugod ko sa paghilak. Gisultihan nako siya mahitungod sa four square ug sa paggamit sa ngalan sa Ginoo sa pagpasipala. “Wala ko kahibalo kon makahunong pa ko,” miingon ko nga naghingos.
Gigakos niya ako og hugot. “Kini mabati nga ingon ana sa pagkakaron. Apan nasayod ako nga ang Langitnong Amahan makatabang nimo.”
“Unsaon man?” Nangutana ko.
“Ang paghinulsol nagpasabot sa pagbalik ngadto sa Langitnong Amahan ug pagpaningkamot og maayo nga mohimo og mas maayo,” miingon si Mama. “Dili kini sayon, apan makaampo ka alang sa tabang. Sa imong paggamit og mas maayo nga mga pulong, ang imong karaan nga batasan mawala.”
Si Mama mitabang nako nga maghimo og lista sa bag-o nga mga pulong nga akong masulti imbes ang ngalan sa Ginoo. Dayon nagdungan mi sa pag-ampo. Akong giingnan ang Langitnong Amahan kon unsa ang akong pagbasol ug nangayo og tabang nga makagamit og maayo nga pinulongan.
Pagkasunod adlaw miginhawa ko og lawom sa wala pa ko magdula og four square. Sa dihang ang akong bola wala makaigo sa kuwadrado, hapit na usab nako masulti ang ngalan sa Langitnong Amahan, apan nihunong ko. Ug, misulti ko og usa ka pulong gikan sa akong lista.
“Ah, mga saging!” Miingon ko. Nindot kadto nga pagbati!
Matag adlaw naningkamot ko nga mogamit og mas maayo nga pinulongan. Masayop gihapon ko usahay. Apan nagpadayon ko sa pag-ampo ug pagpaningkamot. Sa wala madugay nakahuman ko og tibuok dula nga wala makasulti sa ngalan sa Ginoo. Dayon sa tibuok semana. Dayon sa tibuok bulan!
Nakahibalo ko nga ang Langitnong Amahan ug si Jesukristo mitabang nako nga maghinulsol ug mausab ang akong batasan—ug kana mas nindot nga bation kay sa pagdaog sa bisan unsa nga dula!
Mga paghulagway ni Kiersten Eagan