5 ka Paagi aron Mahimong Tigpasiugda og Kalinaw

Ni Charlotte Larcabal Speakman

Kon maghunahuna ka og tigpasiugda sa kalinaw, unsa ang imong makita? Makita ba nimo ang imong kaugalingon? Kinahanglan gyod! Gihangyo kita ni Jesus nga mamahimong tigpasiugda og kalinaw (tan-awa sa Mateo 5:9). Dili ka kinahanglan nga makiggubat og mga sundalo o mahimong lider sa kalibotan aron makahimo niana. Ania ang lima ka paagi nga ikaw mahimong usa ka tigpasiugda sa kalinaw dinhi, karon dayon.

Paminaw bisan kon dili ka mouyon. Kon nakiglalis ka og tawo, hunong ug paminaw. Kon ang usa ka tawo adunay lahi nga ideya, hunong ug paminaw.
Paningkamot sa pagsabot kon unsay gibati sa uban. Kon mas nakasabot ka sa usa ka tawo, mas dali ang pagtratar kanila uban sa pagkamabination ug pagbaton og malinawon nga relasyon ngadto nila.
Pagpraktis sa pagsulbad og problema. Daghang tawo magtan-aw sa mga problema. Ang tigpasiugda og kalinaw magtan-aw usab sa mga solusyon. Kon mas magpraktis sa paghunahuna og mga solusyon, mas mahimo kang maayo sa pagsulbad og mga problema.
Pilia ang pagkamapailobon. Hunahunaa ang kataposang higayon nga nahutdan ka sa pailob. Malinawon ba kadto nga pagbati? Tingali dili. Kon bation nimo kanang walay pailob nga mga pagbati, ginhawa og lawom. Kon mapailobon ka sa imong kaugalingon ug sa uban, mobati ka nga mas malinawon.
Hinumdomi si Jesukristo. “Pag-ampo aron makabaton og kaisog ug kaalam sa pagsulti o pagbuhat unsa ang Iyang gusto,” nagtudlo si Presidente Nelson. “Kon kita mosunod sa Prinsipe sa Kalinaw, kita mahimong Iyang mga tigpasiugda og kalinaw.”^*