“Padayon sa Pagsidlak,” Higala, Abril 2024, 18–19.
Padayon sa Pagsidlak
Si Lynn gusto nga mobuhat sa unsay buhaton sa Manluluwas.
Kini nga istorya nahitabo sa Zimbabwe.
Ang adlaw nisidlak, ug si Lynn midagan sa gawas aron magdula. Ang ubang mga bata sa barangay nagdula og patid-patid sa bola. Sila naghimo og ilang kaugalingon nga bola pinaagi sa pagkumot og mga papel ug pagputos niini og hugot sa plastik nga mga bag.
Si Lynn nagdali aron moapil nila. Apan dayon adunay usa ka butang nga nakapahunong niya.
Naglingkod ilalom sa duol nga kahoy mao ang usa ka batang babaye nga ginganlan og Awesome. Ang uban nga bata mitudlo kaniya ug nangatawa. Apan si Awesome wala mokatawa. Hinuon, iyang gitabonan ang iyang nawong sa iyang mga kamot. Dagko nga mga luha ang miagas sa iyang mga aping.
Sa wala madugay ang uban miapil sa dula sa pagpatid-patid og bola ug gibiyaan si Awesome nga nag-inusara.
Si Lynn mitan-aw sa mga bata nga nalingaw. Dayon mitan-aw siya ni Awesome. Gusto niya nga buhaton kon unsa ang buhaton ni Jesukristo.
“OK ra ka?” Si Lynn nangutana. Mipahiyom siya ni Awesome.
Gipahiran ni Awesome ang iyang mga luha ug mitando.
Si Lynn mipunit og duha ka gagmay nga tukog ug gihatag ang usa ni Awesome. “Gusto nimo nga magdrowing uban nako?”
“Sige.” Gikuha ni Awesome ang tukog ug nagdrowing og lingin diha sa yuta.
“Mora man kana og adlaw,” miingon si Lynn. “Ang adlaw kanunay nga makapalipay nako.” Ang mga batang babaye nangatawa samtang sila nagdrowing og dugang nga mga larawan. Ganahan si Lynn ni Awesome.
Dayon si Lynn adunay ideya. “Ganahan ka ba mokuyog nako sa simbahan ugma? Manganta kita og mga awit ug magkat-on mahitungod ni Jesukristo. Kini makalingaw kaayo.”
“OK,” miingon si Awesome. “Mananghid una ko sa akong inahan.”
Samtang si Awesome midagan aron pangitaon ang iyang inahan, si Lynn ginerbiyos og gamay. Siya nakahibalo nga ang ubang tawo sa ilang dapit adunay dili maayo nga pagbati mahitungod sa Simbahan.
Apan sa wala madugay si Awesome mibalik nga nagdagan. “Mitando ang akong inahan!” Gigakos niya si Lynn pag-ayo. “Giingnan nako siya nga ikaw na ang akong labing suod nga higala!”
Pagkasunod buntag si Lynn ug si Awesome miadto sa simbahan. Layo ang laktonon. Gitudloan ni Lynn si Awesome og pipila ka awit sa Primary samtang sila naglakaw.
Diha sa agianan, ilang nakita ang ubang mga bata nga naglakaw kauban ang ilang mga pamilya padulong sa simbahan. Ang uban nila mao kadtong mga bata nga mipasakit ni Awesome.
“Moadto ba usab sila sa simbahan?” mabalak-on nga nangutana si Awesome.
“Ayaw kabalaka,” miingon si Lynn. “Ma-OK ra kini.” Si Lynn militok og mubo ug kinasingkasing nga pag-ampo nga ang uban mahimong buotan ngadto sa iyang bag-ong higala.
Sa dihang misulod sila sa Primary, ang ubang mga bata mipahiyom ni Lynn. Apan sa dihang nakita nila si Awesome, ang ilang mga pahiyom nawala. Sila mora og nabalaka og gamay ug ginerbiyos usab.
Si Sister Moyo mibasa og kasulatan. “Pasigaa ninyo ang inyong kahayag sa atubangan sa mga tawo, aron makita nila ang inyong maayong mga buhat ug dayegon nila ang inyong Amahan nga anaa sa langit.”* Miyahat siya. “Kita makahatag sa atong kahayag pinaagi sa pagpakita og gugma ngadto sa uban. May bisan kinsa ba ninyo nga makapakigbahin kon giunsa ninyo pagtabang ang usa ka tawo nga mobati nga gihigugma?”
Walay bisan usa nga mitingog. Ang ubang mga bata nagpatabyog-tabyog sa ilang mga tiil ilalom sa ilang mga lingkoranan.
Sa kataposan, usa sa mga batang lalaki ang miingon, “Ahm, Awesome, wala mi magmabination nimo. Pasayloa kami nga gipahilak ka namo. Mapasaylo ba mi nimo?”
Mitan-aw si Lynn ni Awesome. Unsa man ang iyang isulti?
Hinay nga miyango si Awesome. “Oo,” miingon siya. “Ako mopasaylo ninyo.”
Mipahiyom si Sister Moyo. “Kamong duha maisogon ug mabination. Nakahibalo ko nga ang Manluluwas napalipay ninyo og maayo.”
Pagkasunod adlaw, si Lynn ug Awesome naglingkod ilalom sa kahoy ug nanganta sa mga awit nga ilang nakat-onan sa Primary. Sa wala madugay ang ubang mga bata nakadungog nila nga mikanta ug miapil nila. Napuno sa musika ang palibot samtang sila nanganta.
Si Lynn mibati nga ingon og ang adlaw misidlak sa iyang kasingkasing. Siya mapasalamaton nga iyang gipakigbahin ang gugma ni Jesukristo sa iyang higala.
Mga paghulagway pinaagi ni Katie Rewse