“O Le Galuega Faatino o le Saienisi,” Uo, Setema 2024, 18–19.
O Le Galuega Faatino o le Saienisi
“E finagalo le Tama Faalelagi ina ia tatou taumafai pea.”
O lenei tala sa tupu i le ISA.
Sa sasaa e Bradley se isi ipu oneone i totonu o lana pakete. O le a manaomia e ia le tele [o oneone]!
Sa le o toe mamao le faaaliga saienisi a lana aoga. Sa faia e Bradley se mamanu lea na faaalia ai le ala na tupu ai galulolo. Sa ia aoaoina o se galulolo o se galu tele o vai e mafua mai i se mafuie i le sami. Sa manao o ia ia lelei atoatoa lenei galuega faatino. Atonu o le a ia manumalo i se taui!
Ina ua tumu lana pakete, sa ao mai e Bradley ni fasilaau. Ona ia maua lea o se paelo palasitika ma ni tamai fale meataalo i le fogafale i lalo.
Sa sasaa e Bradley le oneone i totonu o le paelo e fai ai le laueleele. Sa ia faatutuina ma le faaeteete ia fale ma laau. Na sosoo ai ma le vaega manaia—o le vai! O le taimi lava na te sasaaina ai i totonu, e mafai ona ia tuleia se fasipepa malō i totonu o le vai e fatu ai le galu.
Peitai sa ia faia se mea sese telē lava. Sa tele naua le vai na ia sasaaina i totonu! Sa lolovaia ia fale—ae o lea na te le’i faia le galu. O le oneone susū na tupu ai se gasu pi’ipi’i ma palapalā.
Sa valaau atu Bradley i lona tina sa i le umukuka. “O le a le mea e tatau ona ou faia nei? Ua tele tele le vai ua ou tuuina i totonu.”
“E le afaina. E mafai ona e toe amata,” o le tala lea a Tina. “Ta faia faatasi ma fua sina mea itiiti i lea taimi ma lea taimi.”
“Ua lelei.” Sa faano’uno’u le ulu o Bradley ma alu atu i fafo e aumai nisi oneone.
O le taimi lea sa la fuaina ai ma le faaeteete le aofaiga sa’o o le vai ma sasaa i totonu. Sa faame’i e Bradley le pepa malo ma matamata i le pa o galu i le oneone. Sa lelei atoatoa!
Na sosoo ai ma le galulue o Bradley ma Tina i lana pepa lautele o ni faamatalaga. Sa amata ona ia tusia ni mea moni malie e uiga i galulolo. Ae sa le’i ofi upu i luga o le itulau.
“Ou te le manao e toe tusi atoa!” o le tala lea a Bradley. Sa amata ona tiga lona ulu.
“Ta te le tau toe tusia atoa,” o le tala lea a Tina. “E mafai ona ta toe faaupuina ia ofi ai i luga o le itulau.”
Sa mapuea Bradley. Sa le’i foliga lana pepa lautele o faamatalaga i le mea sa ia manao ai. “Ou te le fia faia lena mea. O le a lē manaia pe afai e le ofi lelei upu.”
“O le aoao e mafai ona faigata.” Sa opo o ia e Tina. “O nisi taimi tatou te faia ai ni mea sese. Ae o le mea taua ia aua ne’i o tatou fiu. E finagalo le Tama Faalelagi ina ia tatou taumafai pea. Sei ta malolo ma faauma ai i le taeao.”
O le taeao na sosoo ai, na la faamae’aina ai lana pepa lautele o faamatalaga. Sa le’i atoatoa, ae sa lagona e Bradley se lagona lelei teisi e uiga i ai.
Na iu ina oo mai le aso o le faaaliga faasaienisi. Sa momoli e Tina ia Bradley i le aoga. “Manatua,” sa ia fai atu ai, “sa e galue malosi i lau galuega faatino ma aoaoina ni mea se tele. Ma o le mea lena e taua.”
Sa ave e Bradley lana galuega faatino i le faletaalo tele. Sa tumu i galuega faatino ma pepa lautele o faamatalaga. Sa saofafai uma i lalo le vasega fa ma faatalitali mo lo latou avanoa e faaali atu ai a latou galuega faatino.
E le’i umi ae oo i le taimi a Bradley. Sa vave le tata o lona fatu a o ia savali atu i luma. Ae faapefea pe afai e sese mea uma?
Sa tulei e Bradley le pepa malo i le vai ma faaali atu i faamasino le ala na pa ai galu i le laueleele.
“O le a le mea e mafua na galu tetele i le sami?” na fesili ai se tasi o faamasino.
“O galu tetele e mafua mai i le …” Sa leai se mea i le mafaufau o Bradley. “Ou te le manatuaina. Ae e mafai ona ou ta’u atu ni mea moni malie e uiga i galulolo.” Sa ia faitau atu ia i latou mea moni o loo i luga o lana pepa lautele o faamatalaga.
Ina ua tuua le aoga sa oso Bradley i totonu o le taavale ma lana galuega faatino.
“Na a mai?” O le fesili lea a Tina.
“E le o le mea tonu lea na ou manao ai.” na ataata atu ai Bradley. “Ae sa ou faia le mea sili ma taumafai pea.
Ata na tusia e Adam Koford