“O Le Pusa o Popole,” Uo, Setema 2024, 36–37.

O Le Pusa o Popole

Saunia e Olivia Kitterman

(E faavae i se tala moni)

Sa mafaufau tele Olivia i ona popolega.

O lenei tala sa tupu i le ISA.

Sa faanatinati atu i fafo Olivia mai lona potuaoga a o le’i tuua le aoga. Sa ia taumafai e ’aua nei tilotilo atu i mata o se tagata.

O le asō o le aso muamua lea o togafitiga a Olivia. Sa faamatala atu e lona tina o le a ia feiloai ma se fomai e mafai ona fesoasoani ia te ia i ona popolega. Sa lagona e Olivia le popole tele. O nisi taimi sa ia lagonaina le popole tele lea sa faigata ai ona moe pe fiafia faatasi ma ana uo.

Sa oso Olivia i totonu o le taavale ma Tina ma faapupuu i lona nofoa.

“O seki oe?” O le fesili lea a Tina.

E le’i tali Olivia mo sina taimi. “Aisea e tatau ai ona ou alu i le fomai?”

Sa amata ona ave le taavale a Tina. “E tuuina mai e le Tama Faalelagi ia i tatou ni fomai e fesoasoani ia i tatou. E pei lava ona Ia tuuina mai ia i tatou isi mea e fesoasoani ai ia i tatou, e pei o uo ma tusitusiga paia. E te manatua le filifili o mau na ta faia?”

Sa luelue le ulu o Olivia. Sa fesoasoani Tina ia te ia e sue ia fuaiupu o mau na fesoasoani i ona popolega. I fuaiupu taitasi, sa tusi ai e Tina le mea e maua ai le isi fuaiupu e sosoo ai. Pe a popole Olivia i le po, na te faia se tatalo ma sue se tasi o fuaitau o mau i tusitusiga paia. Ona ia faitauina lea o isi mau i le filifili seia oo ina mafai ona ia moe.

Ina ua savavali atu Olivia ma Tina i totonu o le ofisa o le fomai, sa faailoa atu e Dr. Posy o ia lava. Sa ia fesili ia Olivia e uiga i ona lagona. Sa ta’u atu e Olivia ia te ia sina mea itiiti e uiga i ona popolega.

“O le toatele o tagata e i ai se mea e ta’ua o le atuatuvale,” sa fai atu ai Dr. Posy. “Latou te popole tele e pei o oe. Ae e mafai ona e faia ni mea e fesoasoani ai ia te oe ia faaitiitia le popole. E mafai ona ta faataitaia se tasi o na mea?”

Sa tilotilo atu Olivia i ona seevae ma luelue lona ulu.

Sa tuuina atu e Dr. Posy se tamai pusa ia Olivia. “O se pusa lenei o popole. E malu puipuia ai o tatou popolega, o lea e le tatau ai ona tatou mafaufau i ai.”

Sa fuli solo e Olivia le pusa i ona lima. Sa le’i foliga mai o se mea faapitoa.

“O le isi taimi e te lagona ai le fefe, tusi lou manatu popole i se fasipepa ma tuu i totonu o le pusa,” sa fai atu ai Dr. Posy. “Ona filifili lea o se taimi e tatala ai le pusa i aso uma mo le taimi o le popole. Afai e te popole i soo se mea ae le’i oo i le taimi popole, fai atu, ‘E le manaomia ona ou mafaufau i lenei mea i le taimi nei.’”

“Ua lelei,” o le tala lea a Oliva. Sa fesoasoani Dr. Posy ia te ia e tusi ona popolega sili ona tetelē, ma sa tuu i totonu e Olivia i totonu o le pusa.

Mulimuli ane i lena aso, na oo mai ai se tasi o popolega a Olivia i lona ulu. O loo i totonu o le pusa o le popole, sa ia fai ifo ai ia te ia lava. E mafai ona ou popole i lena mea i se taimi mulimuli mai. Sa taumafai o ia e taofi le mafaufau i ai. Nai lo lena, sa la taaalo ma lona tuagane.

Ina ua oo i le taimi e moe ai, sa lagona e Olivia le le mautonu. O le po o le taimi lea na sili atu ai ona leaga ona popolega. Sa ia tuu lana pusa o popole ma ana tusitusiga paia i autafa o lona moega ma valaau atu mo Tina.

“Ae faapefea pe afai e le aoga?” sa ia fesili ai.

Sa opo o ia e Tina. “Ona tatou taumafai pea lea. O le a fesoasoani le Tama Faalelagi ia te oe e saili isi auala e fesoasoani ai.”

Sa luelue le ulu o Olivia. “Atonu e tatau foi ona ou tusia lena mea mo le pusa o popole.”

“Manaia le manatu,” o le tala lea a Tina. Sa ia faia lea o se tatalo ma Olivia. Na fesoasoani lena mea ia te ia e maua ai se lagona lelei sili atu.

I sina taimi ina ua uma ona tape e Tina moli, sa oso ifo se popole i le mafaufau o Olivia. Sa ia kiina lana lamepa. Sa ia tusia i lalo le manatu popole ma tuu i totonu o le pusa mo se taimi mulimuli mai. Sa ia faia se isi tatalo e ole atu ai i le Tama Faalelagi e faamafanafana o ia.

Ona ia susueina lea o ana tusitusiga paia ma vaavaai mo se fuaiupu ua makaina mai lana filifili o mau. O le mau muamua na ia maua o le Isaia 41:10. Na fai mai, “Aua e te fefe; aua Ou te ia te oe.”

I autafa o le mau, na tusia ai e Tina le “Mataupu Faavae ma Feagaiga 6:36.” Sa saili e Olivia lena mau ma faitau leotele. “Vaai mai ia te aʼu i mafaufauga uma; aua le masalosalo, aua le fefefe.”

Sa lagona e Oliva le toafilemu. Sa ia iloaina atonu o le a ia mafaufau i nisi popolega. Ae na tuuina mai e le Tama Faalelagi le tele o mea ia te ia e fesoasoani ai ia ona maua se lagona lelei. Sa tali mai o Ia i ana tatalo. Ma sa fesoasoani tele lena mea!