“Faamalosiau mo ‘Au Uma e Lua,” Uo, Setema 2024, 30–31.
Faamalosiau mo ‘Au Uma e Lua
Sa faanonou mata o Jayne. Sa le’i manao o ia e malo le isi ‘au!
O lenei tala sa tupu i Korea i Saute.
Sa u e Jayne le u mulimuli o lana saimini. Mmmm. Manaia!
“Tatou taaalo i le Yut Nori!” Na fai mai ai Uncle Ji-Ho.
Ua toe oo i lena taimi o le tausaga! Sa faamanatuina e lona aiga le Chuseok, o le Aso Faafetai i Korea. O le asō ua potopoto ai le aiga o Jayne e aai i le tele o meaai ma taaalo faatasi i le Yut Nori. O le Yut Nori o le taaloga lea e sili ona fiafia i ai Jayne.
Sa saofafai tagata uma i se lio i luga o le fola. Sa tilotilo solo Jayne. O le a le ‘au sa manao e i ai? Sa sōsō atu o ia e nofo i autafa o Uncle Ji-Ho. “Ou te fia i ai i lau ‘au!” o lana tala lea. “O le a mamao lo tatou manumalo!”
Sa ata Uncle Ji-Ho. “O lou i ai i le tatou ‘au, e mautinoa lava e lelei ai so tatou avanoa!”
Na seti e le tina o Jayne le laupapa o le taaloga i le ogatotonu o le li’o. Sa fesoasoani Jayne ia te ia e faatulaga maa o le taaloga. Sa latou pasiina fasilaau e fa i le ‘au o le a muamua.
O le tausoga o Jayne o Ana na taalo muamua. Sa ia togiina fasilaau i le ea. O le auala e tulaueleele ai fasilaau e faaalia ai le tele o avanoa e mafai ona me’i i ai lena ‘au i luga o le laupapa o le taaloga. Sa faasasaga i lalo fasilaau uma e fa, o lona uiga ua maua le Yut a Ana! Sa mafai ona ia faame’iina le maa a lana au i luma o avanoa e fa ma maua ai se isi avanoa faaopoopo.
Ae sa le’i i ai Ana i le au a Jayne.
Sa piilima Jayne ma faanounou. “Sa ou faamoemoe o le a le lelei lana togi,” sa ia musumusu atu ai ia Uncle Ji-Ho.
“Lototele!” Na fai mai ai Uncle Ji-Ho. “Lea faatoa amata le taaloga.” Sa ia ataata faamalosiau atu ia te ia.
Ina ua uma le taimi lona lua a Ana, sa togi e le au a Jayne ia fasilaau. Ae sa lei mamao le mei a le latou maa e pei ona sa faia e le au a Ana.
I avanoa uma, sa faamalosiau atu ma talie tagata o le aiga o Jayne. Sa matamata Jayne i le mei faataamilo o maa o le taaloga i le laupapa. Sa fiafia tagata uma.
Tagata uma vagana ai Jayne. O loo faiaina pea lana au.
Mulimuli ane, na oo i le taimi o Jayne. Sa ia togiina fasilaau i le ea, ae na o le tasi le fasilaau na pa’u faasaga lalo. Sa na o le tasi le avanoa na me’i ai i luma le maa a lana au.
Sa piilima Jayne. “Ua ou musu!” sa ia ee ai. “Sa ou manao ia tatou manumalo.”
Na faafuasei ona filemu tagata uma. Ina ua ia tepa a’e i luga, sa faataupupula atu lona aiga ia te ia. Sa foliga mai sa faateia i latou ona sa ita tele o ia.
Sa vevela foliga o Jayne. Sa ia lagona le faanoanoa ona sa le fiafia o ia mo lona aiga. Sa le masani ona ita tele o ia. Sa tu o ia i luga e aluese ma le li’o.
Sa faaloaloa atu e Uncle Ji-Ho lona lima. “E te le tau aluese!” o lana tala lea. “O le manumalo e le o mea uma ia. Tau lava o le taumafai ia maua le fiafia.”
“Ua lelei.” Sa toe nofo i lalo Jayne. Sa manao o ia ia fiafia e pei o isi tagata uma. Sa manava loloa o ia ma tilotilo atu i lona tausoga o Ben o togiina fasilaau.
“Manaia, Ben!” Na fai mai ai Uncle Ji-Ho. Sa leo fiafia o ia leo.
Sa tilotilo atu Jayne ia Uncle Ji-Ho ma ni mata lapopoa. Sa faamalosiau o ia mo le isi au! Atonu o le mafuaaga lena sa ia maua ai le fiafia tele.
Ina ua amata le isi faasologa, sa filifili Jayne e faamalosiau atu i tagata uma o ‘au uma e lua. Sa sa’o Uncle Ji-Ho. O le manumalo e le o mea uma ia. E mafai ona fesoasoani Iesu ia te ia ia fiafia mo tagata o lona aiga e tusa lava pe na faiaina o ia.
Ina ua toe oo i le taimi o Ana, sa ataata atu Jayne ia te ia. “Ia manuia! E te mafaia.”
Mai le isi itu o le li’o, sa ataata atu ai Ana. Sa lagona e Jayne le mafanafana i totonu. Ua sili atu lona fiafia lea ua i ai!
Ata na tusia e Uran Duo