O Gaoioiga o le Sau, Mulimuli Mai ia te A’u

Mo afiafi faaleaiga po o le suesueina o tusitusiga paia—pe tau lava o se mea manaia!

26 Aokuso–1 Setema

O Faavae Malolosi

Mo le Helamana 1–6

Na aoao atu e Helamana ona atalii e fausia o latou olaga i luga o le faavae malosi o Iesu Keriso (tagai Helamana 5:12). O se faavae o le mea lea o loo fausia ai i luga se mea. O se faavae malosi e malosi ai le fale atoa, e oo lava i afa. Fau ni olo se lua—tasi i luga o se faavae malosi ma le tasi i luga o se faavae vaivai. O le fea o olo e sili atu ona mautu? E faapefea ona tatou fausia o tatou olaga i luga o Iesu Keriso?

Mo tamaiti laiti: Fesoasoani i au fanau laiti e saili se mea latou te manatu e matuai malosi lava. O a ni mea na latou mauaina? Aoao atu e mafai ona tatou malolosi faatasi ma Iesu Keriso.

2–8 Setema

Molimau ia Keriso

Mo le Helamana 7–12

E toatele tagata i tusitusiga paia na aoao ma molimau atu ia Iesu Keriso (tagai i le Helamana 8:16–20). E mafai foi ona e amata fausia lau molimau e uiga ia te Ia! O se molimau o le mea e te talitonu pe iloae moni e uiga i le Tama Faalelagi ma Iesu Keriso. Tusi i lalo lau molimau ma faataitai ona faasoa atu i lou aiga po o uo.

Mo tamaiti laiti: Fesili i lau fanau laiti po o le a le mea latou te fiafia i ai e uiga ia Iesu Keriso. Ona faasoa atu lea o lau molimau i le Faaola ia i latou.

9–15 Setema

O Samuelu o loo A’e i se Pa

Mo le Helamana 13–16

O Samuelu o se perofeta na aoao atu e uiga ia Iesu Keriso i luga o se pa o le aai (tagai i le Helamana 13:4). Alu i le itulau 12 ma fai le galuega taulima e fesoasoani ia te oe e faamatala ai le tala a Samuelu.

Mo tamaiti laiti: Taofiofi lau fanau laiti a o latou tutu i luga o se nofoa ma faasoa mai mea latou te iloa e uiga ia Iesu Keriso, e pei ona sa faia e Samuelu.

16–22 Setema

Taaloga o le Faapotopoto

Mo le 3 Nifae 1–7

Na folafola mai e Iesu Keriso o le a Ia faapotopotoina Ana fanau uma aua e alofa o Ia i tagata uma ma finagalo ia latou maua le talalelei (tagai i le 3 Nifae 5:24). Taaalo i se taaloga e faatatau i le faapotopotoina. Fai atu i le au taaalo e tutu i se li’o. Fai atu i le tagata o loo i le ogatotonu e ta’u mai se mea moni e uiga ia i latou lava, e pei o le lanu e sili ona latou fiafia i ai. Afai e moni lena mea mo soo se tasi lava, latou te o mai foi i le ogatotonu. Faaauau pea seia faapotopoto tagata uma i le ogatotonu.

Mo tamaiti laiti: Taaalo i le igave’a ma lau fanau laiti. Tuu atu ia i latou se opo lapoa pe a e mauaina i latou. Talanoa atu e uiga i le auala na folafola mai e Iesu Keriso o le a Ia faapotopotoina ai i tatou e tusa lava po o fea o tatou i ai.

23–29 Setema

O Iesu o le Malamalama

Mo le 3 Nifae 8–11

O Iesu Keriso “o le malamalama ma le ola o le lalolagi” (3 Nifae 9:18). Matamata faatasi ma lou aiga i se la oso po o se la goto. Ona tusi lea o se ata o mea na e vaaia. A o e tusia se ata, talanoa e uiga i mafuaaga e te alofa ai ia Iesu Keriso ma le auala Na te aumaia ai ia te oe le malamalama.

Mo tamaiti laiti: Alu i fafo ma tilotilo i malamalama eseese, e pei o le la, fetu, po o le masina. Fesili i lau fanau laiti pe o a ni o latou lagona e maua i le malamalama. Talanoa pe faapefea ona avea Iesu Keriso ma o tatou malamalama.

O ata na tusia e Katy Dockrill