Sikolasivi Karou (Mushroom)

Mai vei Jun Hori

Na lesoni cava au rawa ni vulica mai na dua na ka vakasisila me vaka na karou (mushroom)?

goneyalewa vakimono kei na karou

Droini mai vei Julia Yellow

Au sega ni taleitaka na karou. Na iboi kei na ituvaki—au sega sara ga ni taleitaka! Ia rau sa tekivu tei karou na noqu itubutubu niu se gone, ka keitou dau kania ena veisiga. Ena gauna ni tatamusuki, au na vukei rau na noqu itubutubu me yacova na bogilevu. Au na vakarautaka e 200 na karamu na karou, vakatawana ena dua na taga, ka tabaka na drega ena pakete. Au nanuma niu dau marautaka na noqu veivosaki kei na noqu matavuvale. E voleka ni vaka me dua na lotu vakamatavuvale ena veisiga.

E vakarautaka talega na ilavo me baleta na matavuvale, ka sa dodonu me keitou veivuke. Ia e rua na yasana malumalumu: imatai, e dua vei ira na noqu parokaramu taleitaki ena retioyaloyalo a yaco ena gauna keitou cakacaka kina, kau sega ni rawa ni sarava. Kena ikarua, ena gauna e oti kina noqu cakacaka, sa loaloa tu na ligaqu mai na karou, ka dredre me kau tani na roka kei na kena iboi ena sovu. Niu se gone, au dau kudruvaka ena so na gauna na vuna meu veivuke vakalevu kina ena veisiga.

E dua na ilavo vinaka dau rawa mai na karou e vakarautaka e dua na ilavo vinaka me dua ga na gauna, ia sa yaco me lutu mai na kena isau ni ra lewelevu na dauteitei era sa tei karou, ka rau sa sega tale ni qai tei karou na noqu itubutubu. Au nanuma ni rau sa mai muduka baleta ni sa lutu na kena isau, ia au a vulica e dua na ka dina a vakidacalataki au niu taurivola mai na koliji.

Erau a tekivu tei karou na noqu itubutubu me rau vakabula na ilavo ni koliji me baleti au kei rau na taciqu. Erau sa cegu ga baleta ni rau sa rawata na levu ni ilavo erau a taketetaka. Niu sa kila, au sa madualaka na noqu a vosakudrukudru. Au a sega ni kila niu cakacakataka tiko na isau ni noqu vuli torocake ena veigauna mai muri. Ia ena dela ni ka oqo, a vukei au na noqu matavuvale!

Au a vosa kudrukudru ka sega ni kila ni keitou a tei karou me baleta saraga na noqu sikolasivi. Na noqu vosakudrukudru e vakataki rau o Leimani kei Lemueli ena 1 Nifai 2:12: “Erau sa vosakudrukudru … ko Leimani kei Lemueli baleta ni rau sa sega ni kila na nona cakacaka na Kalou ko ya ka a buli rau.” Au marau dina ni kilai au vinaka na Turaga ka vakalougatataki au, se cava ga na noqu vosakudrukudru.

Au sega ni vakabauta niu na via kana karou. Ia kevaka e sega na karou, au na rarawa vakalailai, baleta ni na sega ni rawa vei au meu nanuma tiko na veika keitou a sotava vakamatavuvale. Ena vuku ni veika oqo, au a vulica kina na kena yaga na noqu veivakalougatataki ka vakararavi ki na ituvatuva ni Turaga—ka kakua ni kudruvaka! E dina ga niu cata na karou, au sa vakavinavinakataka ena gauna oqo. Sa dua na ivakatakarakara bibi vei au meu nanuma na noqu isema ni matavuvale.

E vakaitikotiko mai Kantō, Japani o koya e vola.