“Na iNaki Levu ni Veivakalesui mai,” Me iSakisaki ni iTabagone, Janu. 2021, 3 – 5.
Na iNaki Levu ni Veivakalesui mai
Na cakacaka erau a tekivutaka o Josefa kei Airame Simici, vata kei ira e vuqa tale na tamata yalodina, e tomani tiko ena Lotu nikua.
Ni lako na cauravou Josefa Simici ki na veikau me laki masu, a sotava o koya e dua na raivotu vakasakiti, ka kilai tu nikua me iMatai ni Raivotu.
Ena raivotu oqo, a kaya kina na iVakabula vei Josefa ni sa vosoti na nona ivalavala ca. A sauma talega na taro nei Josefa ka kaya ni sega ni dua vei ira na Lotu ena gauna o ya a “vakadinadinataka na Kalou ni sa nona Lotu kei na matanitu.”
“Ia ena gauna vata oya,” a nanuma lesu o Josefa, “[Au] ciqoma edua na yalayala ni na taucoko ni kosipeli ena vakaraitaki vei au ena dua na gauna mai muri.”1
Ni oti na raivotu lagilagi oqo, a tadu mai na Veikau Tabu o Josefa me tekivutaka na nona vakavakarau me dua na parofita ni Kalou.
Moronai kei na iVola i Momani
Ni oti toka e tolu na yabaki, ena 1823, sa tadola tale ko lomalagi me tiki ni tomani na Vakalesui Mai ni kosipeli i Jisu Karisito ena iotioti ni gauna. A rairai vua e dua na agilosi na yacana o Moronai ka kaya “ni sa tiko na cakacaka ni Kalou me [koya] me cakava … [ka ni] a vakacurumi kina e dua na ivola, ka volai ena peleti koula ”ka tu kina na” vakataucokotaki ni kosipeli tawamudu” (Josefa Simici—Ai Tukutuku 1:33–34).
Sa qai yaco, vei Josefa me taura, vakadewataka, ka tabaka na itukutuku makawa oqo, ka sa kilai tu nikua me iVola i Momani.
Veitacini Yalodina
Na tacina o Josefa o Airame e dau veitokoni tudei vei Josefa e veigauna. Ena gauna ni nodrau bula, rau a sotava vata o Josefa kei Airame na ilawalawa ca kei na veivakacacani. Me vakataka, nodrau vakasaurarataki ena ituvaki ca sara ena Valeniveivesu e Lipati mai Misuri me lima na vula ena draki batabata sara ni 1838-39.
Ena kena sotavi na vakacacani, a vakaraitaka o Airame na nona vakabauta tu na yalayala ni Turaga, oka kina na veivakadeitaki me drotani mai na nona meca kevaka sa digitaka. Ena June ni 1844, a soli vei Airame na digidigi me bula tiko se me solia na nona bula me vakalagilagi kina na Kalou ka me “dregata ena nona dra na nona ivakadinadina”—ni rau tu veitikivi kei na tacina lomani o Josefa Vunau kei na Veiyalayalati 136:39
Ni vo e dua na macawa me rau labati, a kaya vei Airame o Josefa me kauta na nona matavuvale ka gole yani. Se dau luluvu ga vakalevu na lomaqu niu nanuma lesu na nona sauma o Airame: “Josefa, au sega ni rawa ni biuti iko.2
Rau sa qai gole yani o Josefa kei Airame ki Kaceji, na vanua rau a laki mate kina ena vuku ni inaki kei na yaca i Karisito. “Erau a duavata ena bula oqo, ka rau a sega ni veitawasei ni rau sa mate!” (Vunau kei na Veiyalayalati 135:3; vakamatatataki).
Na Kaci ni Cakacaka
Me da na dau nanuma tiko na isau ni bula rau a sauma o Josefa kei Airame, vata kei ira e vuqa na tagane, yalewa, gonelalai yalodina, me tauyavutaki na Lotu me rawa kina vei iko kei au me daru marautaka e vuqa na veivakalougatataki kei na dina sa vakatakilai mai ka sa tu vei keda nikua. Na nodra yalodina me na kakua ni guilecavi!
Ni bera nona mate ena 1844, a vola o Josefa e dua na ivola qaqa vei ira na Yalododonu. E a veikacivi ni cakacaka, ka sa tomani tiko ena Lotu nikua:
“Taciqu [kei na ganequ], me da kakua beka ni tomana tiko na inaki cecere vakaoqo? Me toso ki liu ka kakua ni suka ki muri. Na yaloqaqa, taciqu [kei na ganequ]; ka toso tiko ga ki liu, ki liu ki na qaqa! …
“… Ia koi keda na lewenilotu, na Yalododonu Edaidai me da vakacabora vua na Turaga nai vakacacabo ena bula dodonu.”Vunau kei na Veiyalayalati 128:22, 24. vakamatatataki)
Vakasamataka mada na ivakacacabo ko na vakaraitaka vua na Turaga ena buladodonu ena veisiga mai oqo. Mo ni yaloqaqa tiko—wasea vua e dua o vakabauti koya, ka kena bibi duadua, yalovinaka taura na gauna mo cakava kina!
Au kila ni iVakabula sa dau lomavinaka ni da cabora Vua e dua na isolisoli mai na yaloda ena buladodonu, me vaka ga Nona lomavinaka ki na nodrau isolisoli yalodina o rau na veitacini, o Josefa kei Airame Simici, kei ira eso tale na Yalododonu yalodina.